اتىراۋلىق پاراليمپياداشى ولجالى ورالدى

ەرجاندى جەرلەستەرى جىگەرى مول, قاجىر-قايراتى مۇراتىنا  جەتكىزگەن رۋحى بيىك جان رەتىندە جاقسى بىلەدى. توعىز جاسىندا الاڭسىز ويىن ويناپ ءجۇرىپ, ەلەكتر توگىنا تارتىلىپ قالعان ول ءبىر اياعى مەن ءبىر قولىنان ايىرىلعان. بىراق تاعدىردىڭ قاتال سىنى ورىمدەي جاستى جاسىتپادى. ارباعا تاڭىلىپ قالعان كۇندەرىندە دە ساۋلەلى ەرتەڭىنە سەندى. اياعىنان تۇردى. "وقىسام, بىلسەم" دەگەن قۇلشىنىسى مەكتەپ پارتاسىنا قايتا ورالتتى. ستۋدەنت بولدى. جوعارى ءبىلىم الدى. قىزمەتكە ورنالاستى. كىشكەنە كەزىنەن فۋتبولدى جانى سۇيەتىن ەرجان ومىرىنە سپورتتى سەرىك ەتۋمەن كەلەدى. ينستيتۋت قابىرعاسىندا ءجۇرىپ وبلىستىق مۇگەدەكتەر سپورت كلۋبىنا بارىپ, سۋعا جۇزۋمەن اينالىستى. دامير ەشەنقۇلوۆ, باۋىرجان اقىنبەك, نۇرلان جۇماعازيەۆ سىندى جاتتىقتىرۋشىلارى دا ەرجاننىڭ جىگەرىن جانىپ, تالاي ءدۇبىرلى دودالاردا جەڭىپ شىعۋىنا قولداۋ كورسەتىپ ءجۇر. بەرليندەگى حالىقارالىق جارىستا وزىپ شىققان سپورتشى الەم چەمپيوناتىنا جولدامانى ۇتىپ الدى.

-مۇمكىندىگى شەكتەۋلى جانداردىڭ سپورتپەن اينالىسۋىنا وبلىستا بارلىق جاعداي جاسالعان, - دەيدى مۇگەدەكتەر سپورت كلۋبىنىڭ باسشىسى قونىسباي شپانوۆ. – ەرجان سالىمگەرەەۆ – ءبىزدىڭ ماقتانىشىمىز. ەندى مەكسيكادا وتەتىن الەم چەمپيوناتىندا دا ەرجانعا جانكۇيەر بولامىز, جەڭىس تىلەيمىز.

باقىتگۇل باباش,

«ەگەمەن قازاقستان».

اتىراۋ.