قازاقستان جازۋشىلار وداعىنىڭ توراعاسى نۇرلان ورازالين, جازۋشىنىڭ جارى كلارا مىڭجاسارقىزى, فيلولوگيا عىلىمدارىنىڭ دوكتورى, پروفەسسور فاۋزيا ورازباەۆا, رۋدا زايكەنوۆا, گۇلجاھان وردا, سەرىكقازى قوراباەۆ باستاعان قوناقتار ەڭ اۋەلى قالامگەر تۋىپ-وسكەن, كەيىن ەسىمى بەرىلگەن ءادي ءشارىپوۆ اۋىلىنا ات باسىن تىرەپ, ەلدىمەكەن تۇرعىندارىمەن كەزدەستى. كەلەسى كۇنى اۋدان ورتالىعى قالباتاۋدا «قازاق ادەبيەتىنىڭ وزەكتى ماسەلەلەرى» اتتى رەسپۋبليكالىق عىلىمي-تەوريالىق كونفەرەنتسيا ءوتىپ, الماتىداعى م.اۋەزوۆ اتىنداعى ادەبيەت جانە ونەر ينستيتۋتى مەن شاكارىم اتىنداعى سەمەي مەملەكەتتىك ۋنيۆەرسيتەتىنىڭ عالىمدارى مازمۇندى بايانداما جاساپ, تۇلعا جايىندا ەستەلىكتەرىن ايتتى. «قاسيەتتى ولكە, قازىنالى ءوڭىر – جارما اۋدانىندا ەلىنىڭ, جەرىنىڭ داڭقىن شىعارعان تانىمال تۇلعالار از ەمەس. سولاردىڭ ءبىرى دە بىرەگەيى – ادەبيەتشى عالىم, قاھارمان پارتيزان, بەلگىلى جازۋشى ءادي ءشارىپوۆ. ادەكەڭنىڭ ەسىمى جەرلەستەرىنىڭ, ۇرپاقتارىنىڭ, حالقىنىڭ جادىندا ماڭگىلىك ساقتالادى. جازۋشىنىڭ تۋعان اۋىلى ءادي ەسىمىمەن اتالىپ, اۋدان ورتالىعىنداعى ءبىر كوشەگە اتى بەرىلگەنى جەرلەستەرىنىڭ ارداقتى ۇلىنا دەگەن قۇرمەتى دەپ بىلەمىز. دارا تۇلعانىڭ 105 جىلدىعىنا وراي جازۋشىنىڭ رۋحىنا تاعزىم ەتە كەلگەن قادىرلى قوناقتارىمىزعا, زەرتتەۋشى-عالىمدارعا العىسىمىزدى بىلدىرەمىز», - دەدى جارما اۋدانىنىڭ اكىمى نۇرلان سىدىقوۆ كونفەرەنتسيانىڭ اشىلۋ سالتاناتىندا سويلەگەن سوزىندە.
قازاقستان جازۋشىلار وداعىنىڭ توراعاسى نۇرلان ورازالين قالامگەردىڭ شىعارماشىلىعى, سوڭىندا قالدىرعان مۇرالارى, ازاماتتىق بولمىسى, كىسىلىك كەلبەتى جايىندا وي قوزعاپ: ء«ادي ءشارىپوۆ الاشتىڭ ارداقتىلارى مۇحتار اۋەزوۆ, قۇدايبەرگەن جۇبانوۆ, ساكەن سەيفۋلليننەن ءدارىس العان, ءىلياس جانسۇگىروۆپەن بىرگە ەڭبەك ەتكەن, ولاردىڭ قۇندى مۇرالارىن ۇرپاققا جەتكىزە بىلگەن كورەگەن جان. احمەت بايتۇرسىنوۆتىڭ «ادەبيەت تانىتقىش», م.اۋەزوۆتىڭ «قيلى زامان» سىندى ەڭبەكتەرىن كوزىنىڭ قاراشىعىنداي ساقتاپ, ەلۋ جىل وتكەن سوڭ باسپاعا تاپسىرۋى ەرلىكپەن پارا-پار ءىس» دەي كەلىپ, جازۋشىنىڭ ەسىمىن ۇمىتپاي ۇلىقتاپ جاتقان جەرلەستەرىنە العىسىن جەتكىزدى.
كوپ جىلدان بەرى قالامگەردىڭ شىعارماشىلىعىن زەرتتەپ جۇرگەن فيلولوگيا عىلىمدارىنىڭ دوكتورى, پروفەسسور گۇلجاھان وردا ءادي ءشارىپوۆ وقۋ مينيسترلىگىن باسقارعان جىلدارى قازاق تىلىندەگى ءبىلىم وردالارىن قايتا اشۋعا اتسالىسىپ, قازاق ءتىلىن وركەندەتۋ ماقساتىندا مەكتەپ مۇعالىمدەرىنىڭ ادىستەمەلىك وقۋ قۇرالى رەتىندە «قازاق ءتىلى مەن ادەبيەتى» جۋرنالىن, «قازاقستان مۇعالىمى» گازەتىن شىعارۋعا مۇرىندىق بولعانىن تىلگە تيەك ەتتى. شارا سوڭىندا ءسوز العان جازۋشىنىڭ اسىل جارى كلارا جاعىپارقىزىنىڭ اسەرلى ءسوزى جينالعان جۇرتشىلىقتى ويعا شومدىرىپ, دارا تۇلعانىڭ جارقىن كەلبەتىن ءبىر ءسات كوز الدارىنا ەلەستەتكەندەي بولدى. «ادەكەڭ تۋعان اۋىلى تۋرالى ءجيى ايتاتىن ەدى. ءومىرىنىڭ سوڭىندا قاتتى ناۋقاستانىپ جاتىپ, تۋعان جەرىنە الىپ بارۋىمدى ءوتىندى. وكىنىشكە قاراي ناۋقاسىنىڭ اۋىرلىعىنا ءارى دارىگەرىنىڭ كەڭەسىنە بايلانىستى بۇل ءوتىنىشىن ورىنداي المادىم. ءۇش كۇننەن سوڭ ادەكەڭ ومىردەن وزدى. مەن ءوزىم دە ءوتىنىشىن ورىنداي الماي قالعانىما وكىنىش ءبىلدىرىپ, كەيىن «اياۋلى ادەكەم» اتتى ەڭبەگىمدى جازدىم. ءادي قازاق ادەبيەتىنە كەلگەن جاستاردىڭ بولاشاعىنا ۇلكەن سەنىممەن قاراپ, باعىت-باعدار بەرىپ, اعالىق اقىل-كەڭەسىن اياعان ەمەس. بۇگىندە ولاردىڭ قازاقتىڭ مارعاسقا ۇلدارى بولىپ جۇرگەنىنە ماقتانىشپەن قارايمىن. كەڭەستىك زاماندا سولاقاي ساياساتتىڭ زاردابىن دا از تارتقان جوق, بىراق تايىر جاروكوۆ, شاھماردان ەسەنوۆ, جۇمابەك تاشەنوۆ سىندى ەل اعالارى رۋحاني كۇش بەرىپ, اركەز قاسىنان تابىلدى. جازۋشىنىڭ 105 جىلدىعىنا وراي وسىنداي تاعىلىمدى كەزدەسۋ ۇيىمتاستىرعان جارما اۋدانىنىڭ اكىمدىگىنە, اۋدان باسشىسى نۇرلان ءباتتاش ۇلىنا انالىق العىسىمدى ايتامىن», - دەدى.
شارا اياسىندا الماتى مەن استانادان, سەمەيدەن ارنايى كەلگەن زيالى قاۋىم وكىلدەرى اۋدان كىتاپحاناسىنا جازۋشى جايىندا جازىلعان كىتاپتارىن تارتۋ ەتىپ, بيىل جارما وڭىرىندە اۋداندىق دەڭگەيدە وتكەن ء«ادي وقۋلارى» كەلەشەكتە رەسپۋبليكالىق دارەجەدە ۇيىمداستىرىلسا دەگەن ۇسىنىستارىن جەتكىزدى.
ازامات قاسىم,
«ەگەمەن قازاقستان»
شىعىس قازاقستان وبلىسى,
جارما اۋدانى
