جاتتىعۋ بارىسىندا كوماندا كاپيتانى, ريو وليمپياداسىنىڭ قاتىسۋشىسى ولجاس ساتتىباەۆتى اڭگىمەگە تارتىپ, فينالدىق كەزدەسۋ الدىنداعى كوماندانىڭ دايىندىعى تۋرالى سۇراعان بولاتىنبىز.
– فينالدىق ايقاسقا جىگىتتەر ساقاداي ساي. بۇيىرسا, 18 كۇندىك دايىندىقتا توككەن تەرىمىزدىڭ ناتيجەسىن كورىپ, ەكسپو-2017 كورمەسى اياسىندا استانا مەن بۇكىل قازاقستانعا ۇلكەن قۋانىش سىيلايمىز دەگەن سەنىمدەمىز. ءوز ەلىمىزدە, جانكۇيەرلەرىمىزدىڭ قولداۋىنىڭ ارقاسىندا جەڭىسكە جەتۋ ءۇشىن بار كۇشىمىزدى سالامىز. كوماندالاستارىم دا سوعان نيەتتى.
– قارسىلاسىڭدى قانشالىقتى زەرتتەپ ۇلگەردىڭ؟
– فينالداعى كۋبالىق قارسىلاسىم يوسۆاني ۆەيتيا سوتومەن وسى جوبانىڭ 2015 جىلعى فينالىندا جولىعىپ, جەڭىسكە جەتكەنمىن. بۇل جولى دا سول جەڭىسىمدى قايتالاعىم كەلەدى. جالپى, ءبىز ءبىر-ءبىرىمىزدى جاقسى بىلەمىز دەسەك تە بولادى. باپكەرلەرىممەن بىرگە ونىڭ جەكپە-جەكتەرىن كورىپ, ءالسىز تۇستارىن تاپتىق. سوعان ساي الدىن-الا جوسپار دا قۇرىپ قويدىق. دەگەنمەن, بارلىعىن شارشى الاڭ شەشەتىن بولادى.
– اسا اۋىر سالماقتاعى قامشىبەك قوڭقاباەۆ پەن 91 كيلوداعى ۆاسيلي لەۆيتتىڭ الداعى كەزدەسۋگە شىقپايتىنى بەلگىلى بولدى. ولاردىڭ جوقتىعى كومانداعا قانشالىقتى اسەر ەتەدى؟
– ول بوكسشىلاردىڭ جوقتىعى كومانداعا سونشالىقتى قاتتى اسەر ەتە قويمايدى. سەبەبى, ءبىز قامشىبەك پەن ءۆاسيليسىز دە جەڭىسكە جەتەمىز. ارينە, كوماندادا ەلىمىزدىڭ ءبىرىنشى ءنومىرلى تاجىريبەلى بوكسشىلارىنىڭ بولعانىن قالاپ ەدىك. دەگەنمەن, ەكەۋى دە بەلگىلى سەبەپتەرمەن كومانداعا كومەكتەسە المايتىنى وكىنىشتى. قۇداي قالاسا, دۇنيەجۇزىلىك بوكس سەرياسىنىڭ ءۇش دۇركىن چەمپيونى اتانۋعا بارىمىزدى سالامىز.
اڭگىمەلەسكەن
ءالي بيتورە
«ەگەمەن قازاقستان»
