وسى كۇنگە دەيىن «تاراز» فۋتبول كلۋبىنا قاتىستى ءجيى سىن ايتىلىپ كەلدى. ماسەلەن پرەمەر-ليگانىڭ وسى ۋاقىتقا دەيىنگى كەزەڭىندە «تاراز» كومانداسى 5 رەت جەڭىسكە جەتىپ, 5 رەت تەڭ تۇسكەن ەكەن. سونداي-اق ويىن بارىسىندا 9 كوماندادان جەڭىلىس تاپقان «تاراز» قۇراماسى قازىرگى تاڭدا 20 ۇپاي يەلەنىپ, تۋرنير كەستەسىندە 7 ورىندا كەلەدى. فۋتبولشىلار وسى كەزەڭگە دەيىن وزگە كوماندالار قاقپاسىنا 17 گول سوققانىمەن, ءوز قاقپالارىنا 28 گول جىبەرىپ العان.
الايدا جۋىردا عانا «تاراز» فۋتبول كلۋبىنىڭ اتىراۋ تورىنەن ابىرويعا كەنەلىپ قايتقانى سپورتسۇيەر قاۋىمعا بەلگىلى. فۋتبولدان قازاقستان پرەمەر-ليگاسىنىڭ 19-تۋرى اياسىندا اتىراۋ قالاسىندا جەرگىلىكتى كومانداعا قارسى الاڭعا شىققان «تاراز» فۋتبولشىلارى قارسىلاستارىن 3:1 ەسەبىمەن ۇتقان بولاتىن. تورەشىلەردىڭ ايتۋىنشا, كەزدەسۋدىڭ ون جەتىنشى مينۋتىندا جان-ەد مورريس مەرگەندىگىمەن كوزگە ءتۇسىپ, «تاراز» كومانداسىن العا شىعارعان. سونداي-اق, كەزدەسۋدىڭ الپىس ءتورتىنشى مينۋتىندا مارات حايرۋللين تارازى باسىن تەڭەستىردى. بۇدان كەيىنگى مينۋتتاردا دا ەسە جىبەرە قويماعان ولار ءساتتى ويىن كورسەتىپ, ەسەبىن تۇگەندەپ قايتقان بولاتىن. ءتىپتى ماماندار «تاراز» قۇراما كومانداسى جەڭىستى جولىن جالعاستىرا بەرەتىن بولسا, العاشقى التىلىققا ەنۋگە مۇمكىندىگى بار دەپ وتىر.
جۋىردا عانا «تاراز» كومانداسىندا بىرقاتار ويىنشىلار اۋىستى. فۋتبولدان قازاقستان پرەمەر-ليگاسىنىڭ جازعى ترانسفەرلىك تەرەزەسى اشىلعاننان بەرى «تاراز» كومانداسىنىڭ قۇرامى ءتورت بىردەي جاڭا ويىنشىمەن تولىقتى. بۇدان بىلاي سەنەگالدىق سۇرمەرگەن اتانعان ماليك مانە, قۇراما ساپىندا وتكەن جىلى ويناعان يليا ۆوروتنيكوۆ, ەۆگەني گورياچي مەن جارتىلايقورعاۋشى رينات حايرۋللين «تاراز» قۇراماسىندا ونەر كورسەتەدى. جىل باسىندا ەۆگەني گورياچيدىڭ «قايسار» كومانداسىنىڭ نامىسىن قورعاعانى ەل ەسىندە. ەندى ول الداعى ۋاقىتتاردا «تاراز» كومانداسىنىڭ نامىسىن قورعايتىن بولادى. جانكۇيەرلەر دە جاڭا ويىنشىلاردان ۇلكەن ءۇمىت كۇتىپ وتىر.
ال «تاراز» فۋتبول كومانداسىنىڭ قۇرامىندا ونەر كورسەتىپ كەلگەن رۋسلان مۋحامەتشين, ماديار رايىمبەك جانە ماكسيم ازوۆسكي سىندى ويىنشىلار باسقا كومانداعا اۋىسۋلارىنا بايلانىستى قۇراما قاتارىنان شىعارىلدى.
حاميت ەسامان,
«ەگەمەن قازاقستان»
جامبىل وبلىسى
