تۇجىرىمدامانىڭ باستى ماقساتى – قازاقستان رەسپۋبليكاسىنداعى زايىرلىلىق قاعيداتتارىن نىعايتۋ. سونداي-اق, تۇجىرىمداما جوباسىنىڭ نەگىزى قازاقستاندىقتاردىڭ ءدىني سەنىم بوستاندىعىن, ءدىندى ۇستانۋ نەمەسە ۇستانباۋ قۇقىعىن قامتاماسىز ەتۋ بولىپ تابىلادى.
قۇجات قوعامىمىزدا ءىس جۇزىندە ورنىققان كونفەسسياارالىق كەلىسىمدى نىعايتۋ باعىتىنداعى مەملەكەتتىك-كونفەسسيالىق قاتىناستارعا الداعى ۋاقىتتا ءوزىنىڭ ەلەۋلى ۇلەسىن قوسا وتىرىپ, ءدىندى دەسترۋكتيۆتى ماقساتتاردا قولدانۋعا جول بەرمەۋگە سەپتىگىن تيگىزەتىندىگىنە سەنىمدىمىز.
قۇجاتتا مەملەكەت ساياساتىنىڭ ءدىن سالاسىنداعى ۇستانىمى, ستراتەگيالىق ماقساتتارى مەن باعىتتارى ايقىن كورسەتىلگەن. اتالعان قۇجات جوباسى بىرقاتار ساراپشىلار مەن ءدىنتانۋشى مامانداردىڭ, سونىمەن قاتار, ازاماتتىق قوعام ينستيتۋتتارى وكىلدەرىنىڭ تالقىلاۋىنان وتكەن.
تۇجىرىمدامادا ەلىمىزدە ءدىني ءبىلىم بەرۋ ءتارتىبىن رەتتەۋ, جاسوسپىرىمدەردى ءدىني قىزمەتكە زاڭسىز تارتۋعا جول بەرمەۋ, ءدىني ادەبيەتتەردى تاراتۋ ءتارتىبىن جەتىلدىرۋ جانە ت.ب. ماسەلەلەردى شەشۋ جولدارى قاراستىرىلعان. ءدىندى ۇستاناتىن ازاماتتارىمىزدىڭ ءدىني راسىمدەردى جۇزگە اسىرۋىنا قولايلى جاعداي جاساۋ تەتىكتەرى دە قامتىلعان.
اسىرەسە, بىزگە زايىرلىلىق قاعيداتتارىن حالقىمىزدىڭ ءومىر ءسۇرۋ سالتىنا اينالدىرۋ ماقساتىندا مەملەكەتتىك باسقارۋ مەن مەملەكەتتىك قىزمەت, قۇقىق قورعاۋ, ارنايى قىزمەت پەن قارۋلى كۇشتەر, بۇقارالىق اقپارات قۇرالدارى, ءبىلىم بەرۋ, دەنساۋلىق ساقتاۋ, مادەنيەت پەن سپورت سالالارىن جۇمىلدىرا وتىرىپ, تۇجىرىمداما نەگىزىندە ەلىمىزدە الەۋمەتتىك-ەكونوميكالىق جانە وتباسى ينستيتۋتىنىڭ ماسەلەلەرىن شەشۋدى كوزدەيتىن مەملەكەت پەن ءدىني بىرلەستىكتەردىڭ قارىم-قاتىناسىنا جاعداي جاسالاتىندىعى بىزگە قۇلشىنىس تۋعىزىپ وتىر.
اتالعان قۇجات بويىنشا ءدىن سالاسىنداعى مەملەكەتتىك ساياسات ىسكە اسىرىلماق, ءدىني بىرلەستىكتەرمەن ءوزارا قارىم-قاتىناس دامىتىلماق, ازاماتتاردىڭ ءدىني سەنىم بوستاندىعى قامتاماسىز ەتىلمەك. سونىمەن قاتار, مەملەكەت پەن ازاماتتىق قوعام اراسىندا ءوزارا ارەكەتتەسۋ مودەلى قالىپتاسىپ, زايىرلىلىق قاعيداتتارى نىعايا تۇسپەك.
جالعاس ساندىباەۆ,
ءدىنتانۋشى
