ۆيتسە-ءمينيستردىڭ سوزىنە قاراعاندا, 2017 جىلدىڭ 1 شىلدەسىندەگى جاعداي بويىنشا جۇمىسپەن قامتۋ ورىندارىندا جۇمىسسىز رەتىندە 151,7 مىڭ ادام تىركەلگەن. «باعدارلامانىڭ تەحنيكالىق-كاسىبي بىلىممەن جانە قىسقا مەرزىمدەگى كاسىبي وقۋمەن قامتاماسىز ەتۋ كوزدەلگەن العاشقى باعىتى اياسىندا بيىل تەحنيكالىق ءارى كاسىبي ءبىلىمى بار 21,3 مىڭ كادر دايارلاۋ جانە دە 70,3 مىڭ قازاقستاندىقتى قىسقا ارالىقتا كاسىبي وقىتۋ جوسپارلانىپ وتىر. وقۋ ساباقتارى بۇگىندە قاجەتتىلىككە يە كاسىپتەر بويىنشا قولعا الىنۋدا.
1 شىلدەدەگى دەرەككە سۇيەنسەك, 21 127 ادام قىسقا مەرزىمدى وقۋعا جىبەرىلدى», دەپ اتاپ ءوتتى ب.نۇرىمبەتوۆ.
سونىمەن قاتار, كوشىپ-قونۋشىلاردىڭ ماسەلەسىنە ءمان بەرىپ, ولاردىڭ كوشىپ- قونۋى ەرىكتى بولۋى كەرەكتىگىن العا تارتتى. بىلتىر سولتۇستىك قازاقستانعا قونىس اۋدارعان 1-2 وتباسىنىڭ قايتادان كوشۋىنە تۋرا كەلگەن. «بىرىنشىدەن, ادامنىڭ كوشىپ-قونۋى ءوز قالاۋىمەن جۇزەگە اسۋى كەرەك. مەملەكەت ەشكىمدى ماجبۇرلەمەيدى. سەبەبى, بۇل – كونستيتۋتسيالىق قۇقىق. ەكىنشىدەن, كوشەمىن دەگەن ازاماتتى ىنتالاندىرۋ كەرەك. ول سول ايماققا قىزىعۋشىلىقپەن بارۋى قاجەت. ءبىز ولارعا ءۇي الىپ بەرەمىز, جاعدايىڭدى جاساپ بەرەمىز دەپ ۇمىتتەندىرمەۋىمىز كەرەك. مەملەكەت ەشكىمگە بارا سالىپ, ءۇي اپەرمەيدى. سەبەبى, ەلىمىزدە تۇرعىن ۇيمەن قامتاماسىز ەتۋدە بىرىڭعاي ساياسات قالىپتاسقان. ال كوشىپ جاتقاندارعا ءبىز تۇرعىن ۇيلىك نەسيەنىڭ جەڭىلدەتىلگەن تۇرلەرىن نەمەسە جالعا العان ءۇيدىڭ شىعىندارىن وتەۋ سياقتى قۇرالداردى قاراستىرىپ جاتىرمىز», دەدى ۆيتسە-مينيستر.
سونىمەن قاتار, ب.نۇرىمبەتوۆ 5 جىلدىڭ ىشىندە 59 مىڭ وتباسىن كوشىرۋ كوزدەلىپ وتىرعانىن تىلگە تيەك ەتتى. ء«بىز ولاردى كوشىرۋدى 2018 جىلدان باستاپ كەتسەك دەيمىز. قازىر سونىڭ بارلىق تەتىكتەرىن قاراستىرىپ جاتىرمىز», دەدى ول.
راۋان قايدار,
«ەگەمەن قازاقستان»
