قوعامدىق ءتارتىپتى ساقتاۋعا, اۋە جانە تەمىر جول كولىكتەرىمەن قاتىنايتىن جولاۋشىلاردىڭ, سونىڭ ىشىندە شەتەلدىك قوناقتاردىڭ قاۋىپسىزدىگىن قامتاماسىز ەتۋگە دەپارتامەنتتىڭ جۇزدەن اسا قىزمەتكەرى كۇندەلىكتى جۇمىلدىرىلادى. ەسەپتى مەرزىم ىشىندە قابىلدانعان شارالاردىڭ ناتيجەسىندە شەتەلدىك قوناقتار مەن دەلەگاتسيالاردى كۇتىپ الۋ مەن شىعارىپ سالۋ كەزىندە توتەنشە وقيعالارعا جول بەرىلگەن جوق.
كولىكتەگى ءىىد باستىعىنىڭ ورىنباسارى, پوليتسيا پولكوۆنيگى تالعات وتەتىلەۋوۆتىڭ ايتۋىنشا, جىل باسىنان بەرى ەلىمىزدىڭ كولىك پوليتسەيلەرى 29772 قۇقىق بۇزۋشىنى انىقتاپ, اكىمشىلىك جاۋاپكەرشىلىككە تارتىلعان.
«ەكسپو-2017 كورمەسىنە دەيىن استانا قالاسىنىڭ تەمىر جول ۆوكزالدارىنداعى جولاۋشىلار اعىنى 11-12 مىڭ ادامدى قۇراسا, بۇگىندە ولاردىڭ سانى 19 مىڭعا جەتتى. باسشىلىق قۇرامداعى جاۋاپتى لاۋازىمدى تۇلعالار كەزەكشىلىككە بەكىتىلگەن. قىلمىستى انىقتاۋ, ورىن العان وقيعالاردىڭ ءىزىن سۋىتپاي اشۋ بويىنشا قوسىمشا جەدەل-تەرگەۋ توپتارى قۇرىلدى. بۇدان بولەك, رەسپۋبليكالىق جانە حالىقارالىق باعىتتاعى بارلىق پويىزدارعا دەپارتامەنتتىڭ قىزمەتكەرلەرى ىلەسىپ جۇرەدى. سونداي-اق, كينولوگيالىق قىزمەت ورتالىعىنىڭ قىزمەتكەرلەرى قىزمەتتىك-ىزدەستىرۋ يتتەرىنىڭ كومەگىمەن پەرروندار, ۆوكزالدار مەن اۋەجايلارداعى جۇك بولىمشەلەرىن, جۇك ساقتاۋ قويمالارى مەن كۇتۋ زالدارىن ۇدايى تەكسەرۋدەن وتكىزۋدە», دەدى پوليتسيا پولكوۆنيگى. كولىكتەگى ءىىد-ءنىڭ جەكە قۇرامى 10 قىركۇيەككە دەيىن كۇشەيتىلگەن رەجىمدە جۇمىس ىستەيدى.
اسحات رايقۇل,
"ەگەمەن قازاقستان"
