راسىندا, ەلىمىزدە حالىقارالىق دارەجەدەگى ۇلكەن شارالاردىڭ الدىندا قىلمىستىق احۋال جاقسارىپ سالا بەردى. ارينە, ەلدەگى قىلمىسپەن كۇرەس, قوعامدىق ءتارتىپتى جاقسارتۋ شارالارى بۇرىن دا ءوز دەڭگەيىندە جۇرگىزىلىپ كەلە جاتقانى ايان. بىراق ماسەلەن, ەكسپو-2017 حالىقارالىق مامانداندىرىلعان كورمەسىن وتكىزۋ كەزىندە استاناداعى قۇقىقتىق ءتارتىپتى قامتاماسىز ەتۋ بارىسىندا قابىلدانىپ جاتقان شارالار تەك ەلوردادا عانا ەمەس, تۇتاس ەلىمىزدىڭ قىلمىستىق احۋالىنىڭ جاقسارۋىنا سەرپىن بەردى. سوندىقتان دا, «قىلمىس جاساۋ 16 پايىزعا ازايدى. ولاردى اشۋ كورسەتكىشى 60-تان 70,2 پايىزعا كوتەرىلدى. 26 مىڭ ادامعا راقىمشىلىق جاسالىپ, 1 200 ادام باس بوستاندىعىنان ايىرۋ ورىندارىنان بوساتىلدى», دەدى قازاقستان پرەزيدەنتى. مىنە, بۇل قۇقىق قورعاۋ ورگاندارىنىڭ اتقارعان جۇمىستارىنىڭ زور ەكەندىگىن بىلدىرەدى.
ەلباسى ەكسپو-2017 حالىقارالىق مامانداندىرىلعان كورمەسىنىڭ اشىلۋىندا ءتيىستى قاۋىپسىزدىكتى قامتاماسىز ەتكەنى ءۇشىن قۇقىق قورعاۋ ورگاندارىنىڭ بارلىق قىزمەتكەرىنە ريزاشىلىق ءبىلدىردى. «كوپتەگەن مەملەكەتتەر باسشىلارى مەن قوناقتار قاتىسقان ەكسپو-2017 كورمەسىنىڭ اشىلۋىندا قاۋىپسىزدىكتى قامتاماسىز ەتكەن ەلىمىزدىڭ بۇكىل پوليتسيا قىزمەتىنە, ۇلتتىق قاۋىپسىزدىك كوميتەتىنە, «سىربار» سىرتقى بارلاۋ قىزمەتىنە جانە باسقا دا ورگاندارعا العىس ايتامىن. ءبىز كورمەنىڭ اشىلۋىن ۇيىمشىلدىقپەن وتكىزدىك», دەدى مەملەكەت باسشىسى. نۇرسۇلتان نازارباەۆ مۇنداي ءىس-شارالاردى وتكىزۋ كەزىندە قاۋىپسىزدىكتى قامتاماسىز ەتۋدىڭ ايرىقشا كۇردەلى ماسەلە ەكەنىنە توقتالىپ, بارلىق قۇقىق قورعاۋ ورگاندارىنىڭ جۇمىسىن جوعارى باعالادى. ءدال قازىرگى ۋاقىتتا ەلىمىزدە مۇنداي الەمدىك دەڭگەيدەگى ماڭىزدى ماسەلەلەردى كوتەرگەن, ادامزاتتىڭ بولاشاعىن الدىن الا ويلاعان ءىرى شارالاردىڭ بىرەۋى ەمەس, بىرنەشەۋى ءوتىپ جاتقانى جانە وتە بەرەتىنى بەلگىلى. وندا جاھاندىق ماڭىزى زور پروبلەمالار شەشىمىن تاۋىپ جاتىر. سوندىقتان دا, مۇنداي ءىرى شارالاردى استانادا وتكىزۋدىڭ وزىندىك ورنى مەن ءمانى بار. ويتكەنى, جاھاندىق جايدى جاقسارتار جاقسىلىقتىڭ نەگىزى استانادان باستاۋ الىپ جاتقانىن الەم ءبىلىپ وتىر. ونىڭ ءبارى حالقىمىزدىڭ بىرلىگى, ەكونوميكامىزدىڭ جەتىستىگى, ادامداردىڭ ءال-اۋقاتىنىڭ ارتۋى, قوعامدىق تىنىشتىق پەن بەيبىت تۇرمىستىڭ ارقاسىندا ىسكە اسىپ جاتىر.
ال ەلىمىزدىڭ تىنىشتىعىن, ادامداردىڭ بەيبىت تۇرمىسىنىڭ بۇزىلماۋىن, قوعامدىق قاۋىپسىزدىكتى ساقتاۋ تەك قۇقىق قورعاۋ ورگاندارى قىزمەتكەرلەرىنىڭ عانا جۇمىسى ەمەس. ول بارشا قازاقستاندىقتاردىڭ مىندەتى ەكەنى ءسوزسىز. ەكسپو-2017 سەكىلدى حالىقارالىق كورمەنىڭ قاۋىپسىزدىگىن قۇقىق قورعاۋ ورگاندارى جوعارى دەڭگەيدە قامتاماسىز ەتىپ جاتقاندا, مۇنداي قۇرمەتتى مىندەتكە ەلىمىزدىڭ وزگە سالالارى دا ءبىر كىسىدەي اتسالىسۋى كەرەك دەپ ويلايمىز. ولار دا ءوز قىزمەتتەرىن وسىنداي جوعارى دەڭگەيدە ورىنداپ, ىستە ادال ەكەندىكتەرىن كورسەتە بىلۋلەرى كەرەك.
مەملەكەت باسشىسى قۇقىق قورعاۋ ورگاندارىنىڭ جۇمىسىنا تەككە ريزاشىلىق بىلدىرگەن جوق. مەملەكەتتىك قىزمەتتەردىڭ ء بارى جۇدىرىقتاي جۇمىلىپ, بىرلەسە قيمىلداعاندا عانا ورتاق مىندەتتى باعىندىرۋ وڭايعا تۇسەتىنى ءسوزسىز. بۇل ورايدا, «سىربار» سىرتقى بارلاۋ مەن ىشكى ىستەر ورگاندارى سەكىلدى الدارىنا قويىلعان تاپسىرمالاردى ناقتى ورىنداپ جاتقاندار بار. ولاردىڭ ءوز مىندەتتەرىن ورىنداۋداعى ەرەكشە ىستەرىنەن وزگە دە مەملەكەتتىك قىزمەتتەر قالىسپاسا, ەلباسىمىز ەلىمىزدىڭ الدىنا قويعان سىندارلى تاپسىرمالاردى, جاھاندىق پروبلەمالاردى شەشۋدە, ادام مەن ادامزاتتىڭ مۇددەسىنە ارنالعان ءىس-ارەكەتتەردى اتقارۋدا بيىك دەڭگەيدەن كورىنە بەرەتىنى انىق. ەندەشە, جاھاندى جاقسارتار جاقسى ىستەرگە باستاماشى بولعان استانامىزدىڭ اسقاقتاي بەرۋىنە ءبىر كىسىدەي اتسالىسا بەرەيىك, اعايىن!
الەكساندر تاسبولاتوۆ,
«ەگەمەن قازاقستان»
