ەڭ الدىمەن ايماق باسشىسى «ERNUR» كورپوراتسياسىنىڭ باسپاحاناسىندا بولىپ, ونىڭ جۇمىسىن كوردى. بۇل مەكەمە – باسپا ىسىمەن قاتار باسپا ونىمدەرىن ساتۋ جانە تاراتۋمەن, تانىمدىق باعىتتاعى گازەت-جۋرنالدار شىعارۋمەن اينالىسادى.
«ERNUR» كورپوراتسياسىنا قاراستى باسپاحانادا بۇگىنگى تاڭدا 80 گازەت-جۋرنال باسىلادى. ولاردىڭ قاتارىندا رەسپۋبليكالىق «ەگەمەن قازاقستان», «كازاحستانسكايا پراۆدا», «ۆرەميا, سىندى بەدەلدى باسىلىمداردىڭ وڭتۇستىك ايماعىنا تارايتىن تارالىم مەن رەسپۋبليكا كولەمىنە تارايتىن جەرگىلىكتى باسىلىمدار دا باسىپ شىعارىلادى. ياعني, باسپا ستانوگى ءبىر ايدا 4 ميلليونعا جۋىق تارالىمدى باسىپ شىعارادى. 450-دەن استام ادام جۇمىسپەن قامتىلعان باسپاحانادا جوعارى تەحنولوگيالى ستانوكتار ورناتىلعان.
باسپاحانانى ارالاپ كورگەن اكىم مەديانارىقتاعى باسەكەگە لايىقتى جۇمىس ىستەۋ ءومىر تالابى ەكەنىن ايتىپ, جۇمىستارىنا ساتتىلىك تىلەدى.
مۇنان بولەك, اكىم وڭىردەگى «وڭتۇستىك قازاقستان», «يۋجنىي كازاحستان», «جانۋبي قوزوعيستون» گازەتتەرى رەداكتسيالارىنىڭ جۇمىسىمەن تانىسىپ, جۋرناليستەرمەن تىلدەستى.
شىعارماشىلىق ۇجىممەن بولعان جۇزدەسۋدە اكىم باسىلىم - مەملەكەتىمىزدىڭ تىنىس-تىرشىلىگى مەن ايناسى ەكەنىن ايتىپ, ەلباسىنىڭ ساياساتى مەن «بولاشاققا باعدار:رۋحاني جاڭعىرۋ» باعدارلامالىق ماقالاسىنىڭ وبلىستا كەڭ كولەمدە ناسيحاتتالۋىنا ۇلەس قوسقاندارى ءۇشىن العىسىن ءبىلدىردى.
«ەلباسىمىز نۇرسۇلتان ءابىش ۇلى نازارباەۆ «بولاشاققا باعدار: رۋحاني جاڭعىرۋ» اتتى باعدارلامالىق ماقالاسىندا جۋرناليستەردىڭ ەگەمەندىكتىڭ ەلەڭ-الاڭىنان بەرى قوزعاپ جۇرگەن مەملەكەتىمىزدىڭ بولاشاعى ءۇشىن بارلىق ماڭىزدى تاقىرىپتارعا ەرەكشە ءمان بەرگەنىن كوردىڭىزدەر. رۋحاني جاڭعىرۋ, ۇلتتىق جاڭارۋ سىندى اۋقىمدى جۇمىستاردى اتقارۋدا سىزدەردىڭ ەڭبەكتەرىڭىز بەن كومەكتەرىڭىز اۋاداي قاجەت. بۇقارالىق اقپارات قۇرالدارى زاماناۋي دامۋ ۇدەرىستەرىنە ساي قالىپتاسۋ كەرەك. ول ءۇشىن ءىرى مەدياحولدينگ اياسىنا توپتاسىپ, اقپاراتتىق باسەكە بارىسىندا جاڭاشا ۇلگىدە جۇمىس ىستەۋگە كوشكەنىمىز ابزال بولار»,- دەدى اكىم.
ءوڭىردىڭ ينتەلەگەنتسياسىنىڭ ءوسىپ, وركەندەۋىنە مول ۇلەس قوسىپ كەلە جاتقان ۇجىمدارعا قولداۋ كومەك كورسەتۋ قاجەتتىگىن ايتقان ايماق باسشىسى مەملەكەتتىك ءۇش گازەتتىڭ عيماراتىنا كۇردەلى جوندەۋ جۇمىسىن جۇرگىزۋگە تاپسىرما بەرەتىنىن ايتتى. سونىمەن قاتار, مەدياسالاداعى تىڭ جاڭالىقتاردان كوش قالماي, سۇرانىسقا قاراي جۇمىس جاساۋدى جانە ينتەرنەتتىك جۋرناليستيكانى دا قولعا الۋدى اتاپ ءوتتى.
ساپارى بارىسىندا وبلىس اكىمى 25 جىلدىق تاريحى بار «وتىرار» تەلەارناسىندا بولدى. وندا «سوبكور» جاۋاپكەرشىلىگى شەكتەۋلى سەرىكتەستىگىنىڭ باسشىسى كۋليكوۆا ۆالەنتينا «رابات», «وڭتۇستىك رابات» گازەتتەرى مەن تەلەارنا جۇمىسىن تانىستىردى. سونداي-اق, ول بۇگىنگە دەيىن جەتكەن جەتىستىكتەرىن بايان ەتتى.
وسى رەتتە, اكىم جاڭالىقتىڭ جارشىسى بولىپ جۇرگەن تەلەارنا ۇجىمىنا العىسىن ءبىلدىرىپ, ولارعا جاڭا يدەيالار مەن جوبالاردى جۇزەگە اسىرۋدا تابىسقا جەتە بەرۋلەرىن تىلەدى.
وسى كۇنى ءوڭىر باسشىسى 28 ماۋسىم – قازاقستان رەسپۋبليكاسى بايلانىس جانە اقپارات قىزمەتكەرلەرى كۇنىنە وراي ۇيىمداستىرىلعان مەرەكەلىك شاراعا قاتىسىپ, اقپارات سالاسى قىزمەتكەرلەرىنىڭ كاسىبي مەرەكەسىمەن قۇتتىقتادى.
مەرەكەلىك شارادا ج.تۇيمەباەۆ وڭتۇستىكتىڭ قوعامدىق-ساياسي, الەۋمەتتىك-ەكونوميكالىق, مادەني ومىرىندەگى جەتىستىكتەرىن ناسيحاتتاۋعا جانە وبلىس تۇرعىندارىنىڭ بىرلىگىن نىعايتۋعا قوسقان ۇلەسى ءۇشىن بىرقاتار جۋرناليستەردى ماراپاتتاپ, تاجىريبە الماسۋ ماقساتىندا تۇركيا ەلىنە وڭىردەگى باس رەداكتورلارمەن مەنشىكتى تىلشىلەرگە جالپى سانى 20 ادامعا جولداما بەردى.
ايتا كەتەيىك, وڭتۇستىك قازاقستان وبلىسىندا بۇگىندە جۇمىس جۇرگىزىپ جاتقان بۇقارالىق اقپارات قۇرالدارىنىڭ سانى 258-گە جەتىپ وتىر.
