باستان-اياق جاندى داۋىستا وتكەن «Bastau live show» كونتسەرتىن دۇنيە ءجۇزى تاماشالادى دەسەك ارتىق ايتقانىمىز ەمەس. زالداعى حالىقتىڭ 30-40 پايىزى قىتاي, رەسەي, اقش, ەۋروپا ەلدەرىنەن كەلگەن. اسىرەسە, «ديماشي, ديماشي» دەپ ايقالاعان قىتايلىق جانكۇيەر قىزداردىڭ داۋىسىنان قۇلاق تۇنادى.
الەمگە «دايديداۋ» دەپ ءان سالدىرعان ديماش اۋەلى ساحنادا ءجۇز دومبىراشىمەن بىرگە اۋەلەتە كۇي تارتىپ, جۇرتشىلىقتى ءبىر سەرپىلتتى. ونىمەن بىرگە ساحنادا قازاقستاننىڭ ەڭبەك سىڭىرگەن ءارتىسى, تانىمال وپەرا ءانشىسى مايرا مۇحامەدقىزى, قىتايدىڭ ايگىلى ءانشىسى تەرري لين, Eurovision-2012 جەڭىمپازى لورين (شۆەتسيا), ۇلىبريتانيا ءانشىسى سوفي ەليس بەكستور ونەر كورسەتتى.
بەس بولىمنەن تۇراتىن كونتسەرت بارىسىندا ديماش قۇدايبەرگەن ءتۇرلى وبرازدا ءان سالىپ, اكتەرلىق قىرىمەن دە تانىلدى. ولاي دەيتىن سەبەبىمىز, پوپ مۋزىكانىڭ گ ۇلى رەسەيلىك كريستينا ورباكايتەمەن بىرگە دۋەت قۇرىپ, ساحنادا العاش رەت تەاترلاندىرىلعان كورىنىس ۇسىندى.
– كەزىندە «سلاۆيان بازارى-2015» ءان بايقاۋىندا ديماشقا ۇلكەن تابىس اكەلگەن ءان – «مەتەل». ءان بيىكتىگىن, بولماسا داۋىس دياپازونىن تانىتۋ ماقسات ەمەس. كريستينا ورباكايتە – بۇل ءاننىڭ العاشقى ورىنداۋشىسى. وسى سەبەپتى دە شىعارماشىلىق ۇجىممەن اقىلداسا كەلە دۋەت قۇرۋدى ويلاستىردىق, – دەيدى, ديماشتىڭ اكەسى, ءارى پروديۋسەرى قانات ايتباەۆ.
شەتەلدىك جانكۇيەرلەرىنىڭ دە جايىن ويلاستىرعان ديماش قۇدايبەرگەن كەشتە «SOS d’un terrien en détress», «All by myself» سياقتى تانىمال اندەردى ورىنداپ, ءتورت تىلدە شارىقتاتا شىرقادى.
– الەمنىڭ تۇكپىر-تۇكپىرىندەگى تىڭدارماندارىمنىڭ باسىن قوسىپ, كونتسەرت وتكىزۋ ارمانىم ەدى. بۇگىن مەنىڭ سول ارمانىم ورىندالدى – دەپ تەبىرەنگەن ديماش كوپشىلىكتى كوڭىلدى وتىرۋعا شاقىردى.
مادەنيەت جانە سپورت مينيستر ارىستانبەك مۇحامەدي ۇلى ءانشىنى ەۋروپانى تاڭقالدىرعان امىرە قاشاۋباەۆتىڭ جالعاسى دەپ اتادى.
– «بۇلاق كورسەڭ, كوزىن اش» دەيدى دانا حالقىمىز. ەلوردامىزداعى ەكسپو-2017 كورمەسى اياسىندا ءوتىپ جاتقان سالتاناتتى كەشكە قوش كەلدىڭىزدەر. تاريحىمىزدا ونەر ساڭلاقتارى جەتەرلىك. سوناۋ ۇكىلى ىبىراي, ءبىرجان سال, اقان سەرىلەردىڭ ءىزىن جالعاپ, ەۋروپانى تاڭقالدىرعان امىرە قاشاۋباەۆ, «الەم فيگاروسى» اتانعان ەرمەك سەركەباەۆ, قازاقتىڭ بۇلب ۇلى بيبىگۇل تولەگەنوۆا, الىبەك دىنىشەۆ سەكىلدى ساڭلاقتارىمىزعا الەم قول سوقتى. ونەردەگى وسى ءبىر ءداستۇردىڭ جالعاسىنداي بولعان ديماش ءۇشىن بارلىعىمىز قۋانىشتىمىز, – دەدى ا.مۇحامەدي ۇلى.
سول ارادا تاعى ءبىر بىلگەنىمىز ديماشقا قىتاي, اقش, ەۋروپا ەلدەرىنەن ارىپتەستىك ورناتۋعا ۇسىنىستار تۇسكەن. اتالعان ەلدەردىڭ كومپوزيتورلارىمەن بىرلەسىپ جازىلعان اندەر تاياۋ كۇندەرى جارىققا شىعۋى ءتيىس.
ايا ءومىرتاي,
«ەگەمەن قازاقستان»
