ءتۋرنيردىڭ ەكىنشى كۇنىندە اتلەت 200 مەترگە جارىسىپ, مارەگە 23,01 سەكۋندتا جەتتى. وسىدان كەيىن ۆيكتوريامەن از-كەم سۇحباتتاسىپ, مەموريال جايلى, الداعى ازيا چەمپيوناتى تۋرالى سۇراعان ەدىك.
– وسى جولى مەموريال كەرەمەت ءوتتى. ۇيىمداستىرۋشىلارعا العىس بىلدىرەمىن. فەدەراتسيانىڭ جاڭا باسشىلىعى, پيار-ءبولىمى بارلىعى كەرەمەت جۇمىس ىستەگەنى كورىنىپ تۇر. وسىلاي-وسىلاي الەمدىك دەڭگەيدەگى جارىستاردى جوعارى دەڭگەيدە وتكىزۋگە ماشىقتانىپ كەتەمىز دەپ ويلايمىن.
– جارىستىڭ ەكىنشى كۇنىندە جاڭبىردىڭ قۇيىپ تۇرعانىنا قاراماستان 200 مەترگە جۇگىرىپ, جەڭىسكە جەتتىڭىز.
– 100 مەتردە جەڭىسكە جەتكەننەن كەيىن ەكىنشى كۇنى ەشقانداي قىسىمسىز ەركىن تۇردە جۇگىرىپ ءوتتىم. ارىپتەسىم ولگا سافرونوۆانىڭ الەم چەمپيوناتىنىڭ ءنورماتيۆىن ورىنداعانىن قاتتى قالاعان ەدىم. ولگاعا كومەكتەسۋدى ويلادىم. وكىنىشكە قاراي, ءسال عانا سەكۋندتار جەتپەي قالدى. قۇداي قالاسا, ازيا چەمپيوناتىندا جولداماعا قول جەتكىزەدى دەپ سەنىم ارتامىن. ازيانىڭ ەكى ۇزدىك سپرينتەرى مىندەتتى تۇردە الەم چەمپيوناتىنا بارۋى ءتيىس. ال اۋا رايىنىڭ قولايسىزدىعىنا كەلسەك, سپورتشىنىڭ قۇلشىنىسىنا جاڭبىر كەدەرگى بولا المايدى. سپورتشى بارلىعىنا دايىن بولسا, كوزدەگەن ماقساتىنا قول جەتكىزەدى.
– 6-9 شىلدە كۇندەرى ءۇندىستاننىڭ بحۋبانەشۆار قالاسىندا ازيا چەمپيوناتى وتەدى. الدىڭىزعا قانداي ماقسات قويىپ وتىرسىز؟
– ءبىرىنشى كەزەكتە 100 مەترگە جۇگىرۋدەن لوندونداعى الەم چەمپيوناتىنىڭ ءنورماتيۆىن ورىنداۋدى كوزدەپ وتىرمىن. سونداي-اق, مۇمكىندىگىنشە, ءوزىم قاتىسقان سايىستىڭ بارلىعىندا جەڭىسكە جەتكىم كەلەدى.
– بۇعان دەيىن ءۇندىستاندا جارىسقا قاتىسىپ كوردىڭىز بە؟ ول جاقتىڭ كليماتىنا دايىندىعىڭىز قانداي؟
– مەن 2013 جىلى ازيا چەمپيوناتىنا قاتىسقانمىن. سول كەزدە دە ازيا چەمپيوناتى ءۇندىستاندا وتكەن. كليمات, اۋا رايى پروبلەما ەمەس. مەن ءۇشىن ەڭ قيىنى – سۋ مەن تاماق. بىراق ەشتەڭە ەتپەيدى, وزىمىزبەن بىرگە قازى-قارتا الىپ بارامىز. بارلىعى جاقسى بولادى دەپ ويلايمىن (كۇلدى).
بەك تولەۋوۆ,
جۋرناليست
استانا
