سۋ ايدىندارىندا دەمالىس الدىندا مىندەتتى تۇردە سۋداعى ءجۇرىس-تۇرىس قاعيداسىن زەردەلەۋ قاجەت. بۇگىنگى كۇنى ادامدار بارلىق قاعيدالاردى ساقتامايتىنىن اتاپ وتكەن ءجون. كوبىنەسە, اتا-انالار قاۋىپكە باعا بەرمەي, بالالارىن ءتيىستى نۇسقاۋلىقسىز, قاراۋسىز جىبەرىپ جاتادى. 2017 جىلعى 23 ماۋسىمداعى جاعداي بويىنشا سۋعا شومىلۋ ماۋسىمى باستالعالى بەرى ەلىمىزدىڭ سۋ ايدىندارىندا 56 ادام, ونىڭ ىشىندە 31 بالا سۋعا كەتىپ, كوز جۇمعانىن اتاپ وتكەن ءجون. بارلىق قايعىلى وقيعا سۋعا شومىلۋعا رۇقسات ەتىلمەگەن ورىنداردا بولىپ جاتادى.
سۋعا شومىلۋ ماۋسىمى كەزەڭىنە جەدەل-قۇتقارۋ جاساقتارىنىڭ قۇتقارۋ بولىمشەلەرى جەكە قۇرامىنان 1 300-دەن استام قۇتقارۋشى, 300-دەن استام اۆتوموبيل جانە قۇتقارۋ تەحنيكاسى, 400-دەن استام ءجۇزۋ قۇرالى, 1 500-دەن استام سۇڭگۋىر جابدىقتارى مەن جاراقتارى جوعارى ازىرلىككە كەلتىرىلدى. جابدىقتالماعان جانە تىيىم سالىنعان ورىنداردا جەدەل-قۇتقارۋ جاساقتارىنىڭ 50-دەن استام كوشپەلى ءموبيلدى قۇتقارۋ بەكەتىنىڭ جۇمىسى ۇيىمداستىرىلدى. 400-دەن اسا قوعامدىق (وبەكتىلىك) قۇتقارۋشى دايىندىقتان ءوتتى, جاعاجايلارداعى جالپىلاما دەمالىس ورىندارىندا 120-دان استام قۇتقارۋ بەكەتى قۇرىلدى.
جالپى, قابىلدانعان شارالار بيىل سۋعا كەتۋشىلەردىڭ سانىن شامامەن 50%-عا, ونىڭ ىشىندە سۋعا كەتىپ جاتقان بالالاردىڭ سانىن 20%-دان استام ازايتۋعا مۇمكىندىك بەردى.
حالىقتىڭ سۋ ايدىندارىنداعى قاۋىپسىزدىك قاعيدالارىنىڭ تالاپتارىن ساقتاۋى اسا ماڭىزدى. ماسەلەن, الكوگول جانە ەسىرتكىدەن ماس بولعان كۇيىندە سۋعا تۇسۋگە جانە شومىلۋعا, سۋعا قايىقتاردان, كاتەرلەردەن, ايلاقتاردان سەكىرۋگە, تەكسەرىلمەگەن جانە جابدىقتالماعان ورىنداردا سۇڭگۋگە, ءجۇزۋ شەگىنەن اسپاۋ ءۇشىن قويىلعان بەلگىلەردەن اسۋعا, تەحنيكالىق جانە ەسكەرتۋ بەلگىلەرىن اسىپ جۇزۋگە, بالالاردىڭ ەرەسەك ادامدارسىز سۋعا شومىلۋىنا تىيىم سالىنادى.
ءاربىر ادام سۋعا شومىلعالى جاتقان سۋ ايدىنداردىڭ قاۋىپتى جەرلەرى مەن ەرەكشەلىكتەرىن ءبىلۋى ءتيىس, سەبەبى, جابدىقتالماعان ورىنداردا باتىپ كەتكەن دىڭگەكتەر, تەمىر, شىنى جانە تاعى باسقا زاتتار بولۋى مۇمكىن. جاقىن جەردە ءجۇزىپ بارا جاتقان كاتەرلەرگە, كەمەلەرگە جانە موتورلى قايىقتارعا جاقىن ءجۇزىپ بارۋ اسا قاۋىپتى.
ۇزاق ۋاقىت بويى سۋعا شومىلۋ دا ادامداردىڭ دەنساۋلىعىنا قاۋىپتى. سۋعا شومىلۋ ۇزاقتىعى نەگىزىنەن اۋا تەمپەراتۋراسىنا, سۋعا جانە جەلدىڭ كۇشىنە بايلانىستى ەكەنىن اتاپ وتكەن ءجون.
رۋسلان يمانقۇلوۆ,
ءىىم توتەنشە جاعدايلار كوميتەتىنىڭ رەسمي وكىلى
