وتكەن دۇيسەنبى كۇنى رەسەي فەدەراتسياسىنىڭ ۇلتتىق پاۆيلونىندا ەرەكشە ەستە قالاتىن وقيعا بولدى. بۇل كۇنى پاۆيلونعا ارنايى قويىلعان كامەرا 100 مىڭىنشى كورەرمەننىڭ كەلگەنىن تىركەدى. 100 مىڭىنشى قوناقتى پاۆيلوننىڭ قىزمەتكەرلەرى, ۆولونتەرلەر مەن گيدتەر ۇلكەن قۇرمەتپەن, دۋ قول شاپالاقتاپ قارسى الدى. ەرەكشە اتاپ وتەتىن ءبىر ماسەلە, 100 مىڭىنشى كورەرمەن قۇرمەتىنە يە بولعان – ماڭعىستاۋلىق جاس جۇبايلار كۇمىساي مەن ليريدو ەكەن. استاناداعى جاھاندىق كورمەگە اقتاۋدان ارنايى كەلگەن جاس جۇبايلار جاقىندا عانا وتاۋ قۇرعان. كۇمىساي استانادا وقۋدا ءجۇرىپ, وسىندا قىزمەت اتقاراتىن البانيا ازاماتى ليريدومەن تۇرمىس قۇرعان كورىنەدى.
رەسەي پاۆيلونىنىڭ ديرەكتورى يۋليا لوپارەۆا 100 مىڭىنشى قوناقتارعا قۇرمەت كورسەتىپ, ەسكەرتكىش سىيلىقتار تاپسىردى. سونىمەن بىرگە, كۇمىساي مەن ليريدو ەكسپو-2017 كورمەسى اياسىندا وتكىزىلەتىن مادەني شارالار باعدارلاماسى نەگىزىندە 5 شىلدە كۇنى وتەتىن پولينا گاگارينا مەن ەگور كريدانىڭ كونتسەرتىنە ەكى تەگىن بيلەتكە يە بولدى.
ء«بىز ەلدەن كەلگەننەن كەيىن ءبىرىنشى كەزەكتە ەكسپو-2017 كورمەسىن ارالاۋدى جوسپارلاعان ەدىك. بۇگىن سول جوسپارىمىز ورىندالدى. كورمەگە كەلگەن ساپارىمىز وسىنداي, ەستە قالاتىنداي اسەرلى بولادى دەپ ويلاعان دا جوق ەدىك. ەكسپو-دان العان اسەرىمىزبەن قوسا, ۇلكەن قۇرمەتكە بولەندىك. ءبىز ارالاعان پاۆيلوندارداعى جاڭعىرمالى ەنەرگيا تاقىرىبىنداعى جادىگەرلەر شىنىمەن كوڭىلدەن شىقتى. ەندى وسى وزىق يدەيالار مەن جاڭا تەحنولوگيالاردى ەلىمىزدىڭ ەنەرگەتيكاسىن دامىتۋعا كەڭىنەن پايدالانا بىلسەك, نۇر ۇستىنە نۇر بولار ەدى», دەيدى كۇمىساي قۋانىشىن جاسىرا الماي ك ۇلىمدەپ.
جىلقىباي جاعىپار ۇلى,
«ەگەمەن قازاقستان»
