«ريتتس-كارلتون» وتەلىندە وتكەن «ۇركەر» ۇلتتىق سىيلىعىن سالتاناتتى تاپسىرۋ راسىمىندە اقپارات جانە كوممۋنيكاتسيالار ءمينيسترى داۋرەن اباەۆ بارلىق باق وكىلدەرىن ءتول مەرەكەسىمەن قۇتتىقتاي كەلە, مۇنداي ءىرى سىيلىقتىڭ تاعايىندالۋى جۋرناليستەر مارتەبەسىن نىعايتۋعا دەگەن العاشقى قادامداردىڭ ءبىرى ەكەنىن اتاپ ءوتتى. «وزدەرىڭىز بىلەسىزدەر, «بۇقارالىق اقپارات قۇرالدارى تۋرالى» زاڭعا وزگەرىستەر مەن تولىقتىرۋلار ەنگىزىلمەك. وسىعان وراي جۋرناليستەردىڭ مارتەبەسىن كوتەرۋگە قاتىستى كوپتەگەن ساۋالدار كەلىپ ءتۇسىپ جاتىر. بۇگىنگى «ۇركەر» ۇلتتىق سىيلىعى وسى باعىتتا جاسالىپ جاتقان ۇلكەن قادام دەپ بىلگەيسىزدەر. «ۇركەردىڭ» بەدەلى بيىكتەپ, تانىمالدىلىعى ارتا بەرسىن», دەدى مينيستر.
بۇدان كەيىن ول «قازپوشتا», «قازاقستان تەمىر جولى», «استاناتەلەكوم» مەن «قازاقتەلەكوم» كومپانيالارىنىڭ بىرقاتار قىزمەتكەرىن ماراپاتتادى. ال «حابار» ارناسى, «ۆەچەرنيايا الماتى» گازەتى, «ادەبيەت پورتالى», «جەتىسۋ» ارناسى مەن ىشكى ىستەر مينيسترلىگىنىڭ قىزمەتكەرلەرىنە «اقپارات سالاسىنىڭ ۇزدىگى» توسبەلگىسى تابىستالدى.
اقپارات جانە كوممۋنيكاتسيالار مينيسترلىگىنىڭ باستاماسىمەن ۇيىمداستىرىلعان «ۇركەر» ۇلتتىق سىيلىعى 15 اتالىم بويىنشا ۇمىتكەرلەردى ىرىكتەدى. جۇلدە قورى دا قوماقتى – 15 ميلليون تەڭگەنى قۇرايدى.
«ۇركەرگە» قاتىسۋعا ءوتىنىم بەرگەن 800-دەن استام ۇمىتكەردىڭ ىشىنەن 75-ءى نومينانت رەتىندە تاڭدالىپ الىنعان. ولارعا كورسەتىلگەن قۇرمەت تە ەرەكشە بولدى. فينالعا جولداما العاندار قىزىل كىلەمنىڭ ۇستىنەن ءجۇرىپ ءوتىپ, جانكۇيەرلەردىڭ ىستىق ىقىلاسىنا بولەندى. ءار اتالىمعا بەس ۇمىتكەردەن كەلىپ, ولاردىڭ ىشىندە ۇزدىكتەردىڭ ۇزدىگى اتاۋلى سىيلىقتارعا يە بولدى.
سونىمەن, «ۇركەر» ۇلتتىق سىيلىعىنىڭ «ۇزدىك ءفوتوتىلشى» اتالىمىندا «ەگەمەن قازاقستاننىڭ» ءفوتوتىلشىسى ەرلان وماروۆ جەڭىمپاز اتاندى. گازەت ءۇشىن ءفوتوتىلشىنىڭ ورنى بولەك. باسىلىم بەتتەرىنىڭ ءسانىن كەلتىرىپ, ءمان-ماڭىزىن اشاتىن دا – ءفوتوتىلشىنىڭ سۋرەتتەرى. وسى تۇرعىدان كەلگەندە ءبىزدىڭ ەرلان – گازەتىمىزدىڭ ناعىز «سۇر مەرگەنى». ونىڭ قىراعى كوزى كەز كەلگەن ۇتىمدى ساتتەردى قالت جىبەرمەيدى. سۋرەتتەرىنىڭ شىنايى ءارى ۇتىمدى شىعاتىنى دا سوندىقتان.
ال «ۇركەردىڭ» «ۇزدىك جۋرناليستىك زەرتتەۋ» اتالىمىندا جەڭىمپاز بولعان «ەگەمەن قازاقستان» گازەتىنىڭ ارداگەر ءجۋرناليسى, بەلگىلى قالامگەر جانبولات اۋپباەۆتىڭ ەسىمى كوپشىلىككە جاقسى تانىس. سىيلىقتى يەسىنە تاپسىرار ساتتە پارلامەنت ءماجىلىسىنىڭ دەپۋتاتى ساۋىتبەك ابدراحمانوۆ: «مەن تاپسىرعالى وتىرعان سىيلىق يەسىنىڭ اتىن وقىعاندا جۇرەگىم ەرەكشە تولقىدى. ويتكەنى, ول – قازاق جۋرناليستيكاسىنىڭ جارىق جۇلدىزى. جۋرناليستيكانى كاسىپ ەتكەن جاستارعا دا, جاسامىستارعا دا ۇيرەنەتىن ۇزدىك ۇلگىنى 40 جىلدان استام ۋاقىتتان بەرى كورسەتىپ كەلە جاتقان اسىل ازاماتىمىز – جانبولات اۋپباەۆ», دەپ ەرەكشە قۇرمەتىن ءبىلدىردى. ءيا, جانبولات اۋپباەۆ تالاي تاڭعاجايىپ تاعدىرلى ازاماتتاردى, سيرەك كەزدەسەتىن تالانتتاردى وقىرمانعا جەتكىزىپ كەلە جاتقان ەرەكشە قالامگەر. ونىڭ ءاربىر جازباسىنان اۆتوردىڭ ازاماتتىق جۋرناليستيكانى ۇستاناتىنىن انىق اڭعارۋعا بولادى. ءوزى دە: «ەگەر ادام مەيىرىمدىلىكتى مۇرات تۇتسا, ىزگىلىكتى جانىنا سەرىك ەتسە, جاقسىلىققا جانى قۇمار بولسا, قۇرمەت تە, اتاق-داڭق, ابىروي دا – سونىڭ جاعىندا. قالام ۇستاعان قاۋىم وسىنداي ۇلكەن مۇمكىندىككە يە. قازىرگى قوعامدا قاتىگەزدىك, قارادۇرسىندىلىك, قارابايىرلىق, ەپتەگەن مادەنيەتسىزدىك ۇعىمدار بەلەڭ الىپ بارادى. ال جۋرناليستەر يماندىلىق پەن يگىلىك جولىندا قىزمەت ەتسە, قوعام دا مەيىرلەنىپ, ىزگىلەنە تۇسەر ەدى», دەيدى. وسىنداي قارىمدى قالامگەردىڭ ۇزدىكتەردىڭ ۇزدىگى اتانۋى زاڭدى دا.
تاعى ءبىر قىزمەتكەرىمىز دۋمان اناش «قازاقستان تۋرالى ۇزدىك تانىمدىق ماتەريال» اتالىمىندا جەڭىس تۇعىرىنان كورىندى. ول دا ورالىمدى ويلارىمەن, قوعامنىڭ تۇيتكىلدەرىن ءدوپ باساتىن زەرەكتىگىمەن رەسپۋبليكاعا تانىلىپ قالعان جاس دارىن.
بۇلاردان وزگە, تاعى بىرقاتار اتالىمدار بويىنشا جەڭىمپازداردىڭ ەسىمى بەلگىلى بولدى. اتاپ ايتقاندا, «ۇزدىك ساراپتامالىق ماتەريال» اتالىمىندا «كازاحستانسكايا پراۆدا» رەسپۋبليكالىق گازەتىنىڭ ءجۋرناليسى ۆالەنتينا فيرونوۆا, «ۇزدىك راديوباعدارلاما» اتالىمىندا شالقار راديوسىنىڭ ء«ان دومبىرا» باعدارلاماسى, «ۇزدىك رەپورتاج» اتالىمىندا National Digital History پورتالىنىڭ ءتىلشىسى – ولجاس بەركىنباەۆ جەڭىسكە جەتسە, «ۇزدىك ايماقتىق راديوستانتسيا» – «استانا» راديوسى, «ۇزدىك سالالىق باسىلىم» – «درۋجنىە رەبياتا» گازەتى, «ۇزدىك جىل جۋرنالى» «National Geografic قازاقستان» جۋرنالى تانىلدى. ال «جۋرناليستيكاداعى دەبيۋت» اتالىمىندا «7kun.kz» سايتىنىڭ ءجۋرناليسى ءمولدىر ءيمانمادي, «ۇزدىك سۇحبات» اتالىمىندا «كاپيتال» رەسپۋبليكالىق گازەتىنىڭ ءتىلشىسى ۆيكتوريا گوۆوركوۆا, «ۇزدىك ايماقتىق باسىلىم» رەتىندە وڭتۇستىك قازاقستان وبلىسىنىڭ جەرگىلىكتى «رەيتينگ» گازەتى, «ۇزدىك حالىقارالىق ساراپتامالىق ماتەريال» اتالىمىندا «vlast.kz» سايتىنىڭ ءجۋرناليسى زارينا احماتوۆا ۇزدىك شىعىپ, جەڭىمپاز اتاندى. «قازنەتتەگى مەديا سەرپىلىس» اتالىمىندا «Massaget.kz» جاستار سايتى ۇزدىك شىقسا, «ۇزدىك رەسپۋبليكالىق باسىلىم» اتالىمىندا «ايقىن» رەسپۋبليكالىق گازەتى جەڭىسكە جەتتى.
جەڭىمپازداردىڭ ارقايسىسى 1 ملن تەڭگە كولەمىندە اقشالاي سىيلىققا يە بولدى.
«ۇركەر» سىيلىعىن ۇيىمداستىرۋداعى باستى ماقسات – تالانتتى جۋرناليستەردىڭ ەڭبەگىن وزگەلەرگە ۇلگى ەتە وتىرىپ, ولاردىڭ ءوز كاسىبىنە دەگەن قۇلشىنىسىن وياتۋ جانە دارىندى ماماندارعا قولداۋ كورسەتۋ. ال كونكۋرسقا كەلىپ تۇسكەن جۇمىستاردى ەلىمىزگە تانىمال تۇلعالاردان قۇرالعان قازىلار القاسى ساراپقا سالدى.
قىمبات توقتامۇرات,
«ەگەمەن قازاقستان»
سۋرەتتەردى تۇسىرگەن
ورىنباي بالمۇرات,
«ەگەمەن قازاقستان»
