كەزدەسۋ بارىسىندا مەملەكەت باسشىسىنا ەلىمىزدىڭ وڭىرلەرىن كوگالداندىرۋ شارالارى, سونداي-اق استانا توڭىرەگىندەگى «جاسىل بەلدەۋ» اياسىندا اعاش وتىرعىزۋ بارىسى جانە ونى دامىتۋ جونىندە باياندالدى.
ەلباسى رەسپۋبليكالىق ماڭىزى بار جولداردىڭ, اتاپ ايتقاندا, استانا − شورتاندى جانە استانا − قاراعاندى تاس جولدارىنىڭ بويىندا اعاش ەگۋدىڭ قاجەتتىگىنە نازار اۋداردى.
سونىمەن قاتار, قازاقستان پرەزيدەنتىنە ودان ءارى كوگالداندىرۋ ءۇشىن جۇرگىزىلگەن زەرتتەۋلەردىڭ جانە اعاش ەگۋگە جارامدى جەرلەردى دايىنداۋدىڭ ناتيجەلەرى, «جاسىل بەلدەۋدىڭ» اۋماعىندا وسىمدىك ءوسىرۋ مەن وندا جىبەرىلگەن جانۋارلاردى بەيىمدەۋ ۇدەرىسى جونىندە ايتىلدى.
بۇدان بولەك, نۇرسۇلتان نازارباەۆ ەلوردانى كوگالداندىرۋ, سونىڭ ىشىندە قالا ساياباقتارىن جاقسارتۋ جانە استانانىڭ سول جاعالاۋىندا بوتانيكالىق باق سالۋ بويىنشا اتقارىلىپ جاتقان جۇمىستاردىڭ ماڭىزدىلىعىن اتاپ ءوتتى.
– بوتانيكالىق باقتا وسىمدىكتەر مەن اعاشتاردىڭ بارلىق ءتۇرى ءوسۋى ءتيىس. الەمدەگى ەكزوتيكالىق وسىمدىكتەردىڭ دە وسۋىنە جاعداي جاساۋ قاجەت, – دەدى مەملەكەت باسشىسى.
سوڭىندا ەلباسى كوگالداندىرۋ جانە اعاش ەگۋ جونىندەگى جۇمىستاردى جالعاستىرۋدى تاپسىردى.
