سونداي-اق سالىق ءوندىرۋ ىسىندە دە كەمشىلىكتەرگە جول بەرىلگەنى انىقتالعان. بۇل پروكۋرورلىق كەشەندى تەكسەرۋ شاراسى ەلىمىزدە پيلوتتىق جوبا رەتىندە باس پروكۋروردىڭ ۇكىمەمەن جۇرگىزىلىپ وتىر. الداعى ۋاقىتتا وزگە اۋدان قالالاردا دا جالعاسادى.
وڭتۇستىك قازاقستان وبلىسى اكىمدىگىندە وتكەن وبلىس پروكۋراتۋراسىنىڭ كەڭەيتىلگەن القا ماجىلىسىندە قازىعۇرت اۋدانىنداعى «اگروونەركاسىپتىك كەشەنىن دامىتۋ» مەملەكەتتىك باعدارلاماسىنىڭ ىسكە اسىرىلۋ مەن الەۋمەتتىك-ەكونوميكالىق كورسەتكىشتەرىنىڭ شىنايىلىعىنا جۇرگىزىلگەن تەكسەرۋلەردىڭ قورىتىندىسى تالقىلاندى.
القا ماجىلىسىنە وبلىس اكىمى ج. تۇيمەباەۆ پەن ورىنباسارلارى, وبلىستىق باسقارما باسشىلارى, قالا, اۋدان اكىمدەرى, وبلىستىق ءماسليحات دەپۋتاتتارى, مەملەكەتتىك كىرىستەر ورگاندارى مەن باسقا دا ۋاكىلەتتى جانە قۇقىق قورعاۋ ورگاندارىنىڭ باسشىلارى قاتىستى.
القا ماجىلىسىندە بايانداما جاساعان وبلىستىق پروكۋراتۋراسىنىڭ ءبىرىنشى باسقارما باسشىسى رۇستەم دۇيسەنباەۆ وتىرعانداردىڭ نازارىن اۋىل شارۋاشىلىق كەشەنىن دامىتۋ باعدارلاماسىنىڭ تيىمدىلىگىنە كەرى اسەر ەتكەن سۋبسيديا ءبولۋ پروتسەدۋرالارىنىڭ بۇزۋشىلىقتارىنا اۋداردى. سونداي-اق ول شارۋالارعا جاسالعان اكىمشىلىك كەدەرگىلەر مەن اۋرە-سارساڭدىققا, قاجەتتىلىكتى دۇرىس قالىپتاستىرماۋ جانە بيۋدجەت قارجىسىن ءتيىمسىز جاراتۋ ماسەلەلەرىنە توقتالدى.
«اۋىل شارۋاشىلىعىن سۋبسيديالاۋ ماسەلەسى بويىنشا پروكۋرورلارمەن سومماسى 1,7 ملرد تەڭگەنى قۇرايتىن مىڭنان استام زاڭبۇزۋشىلىقتار انىقتالىپ, 26 دەرەك بويىنشا سوتقا دەيىنگى تەرگەۋ باستالدى. بۇدان بولەك, مەملەكەتتەن كورسەتىلىپ جاتقان ۇلكەن جاردەمگە قاراماستان جۇمىسسىزدىقپەن كۇرەس تاسىلدەرى رەتىندە اگروونەركاسىپتى قولداۋدىڭ قۇرالدارى ءتيىستى دارەجەدە پايدالانباۋدا. قازىعۇرت اۋدانىندا قىلمىس سانىنىڭ 7 پايىزعا وسكەندىگى جانە قىلمىس جاساعان تۇلعالاردىڭ 63 پايىزى جۇمىسسىز ەكەنى انىقتالىپ وتىر», - دەدى رۇستەم تىلەش ۇلى.
«ەلباسىمىز وڭتۇستىككە جاساعان جۇمىس ساپارى بارىسىندا وبلىسىمىزدى 80 پايىز دوتاتسيادا وتىر دەپ اتاپ كەتتى. جاسىراتىنى جوق, وڭىردە جۇمىسسىزدىقپەن كۇرەس, كاسىپكەرلەرگە قولداۋ ءبىلدىرۋ, سالىق تۇسىمدەرىن مولايتۋ, ءتۋريزمدى دامىتۋ, وڭىرگە ينۆەستيتسيا سالۋ, شارۋالارعا سۋبسيديا ءبولۋ, اۋىل شارۋاشىلىعى كەشەنىن دامىتۋ ماقساتىندا قىرۋار تىرلىكتەر اتقارىلىپ جاتىر. الايدا كەيبىر اۋدانداردا بۇل جۇمىستار قوجىراپ, اۋدان اكىمدەرىنىڭ جۇمىستارىندا جۇيەسىزدىك بار ەكەنىن بايقاپ وتىرمىز. الداعى ۋاقىتتا بارلىق اۋدان –قالا اكىمدەرىنىڭ جۇمىسى ءجىتى قاداعالاۋدا بولادى», - دەدى جانسەيىت قانسەيىت ۇلى.
القا وتىرىسىنىڭ قورىتىندىسىمەن جەرگىلىكتى اتقارۋشى جانە ۋاكىلەتتى ورگاندارعا مەملەكەتتىك باعدارلامالاردى, سونىڭ ىشىندە اگروونەركاسىپ كەشىن دامىتۋ باعدارلاماسىن ءتيىستى دارەجەدە ىسكە اسىرماۋدىڭ سەبەپ-سالدارىن جويۋعا باعىتتالعان ۇسىنىمدار بەرىلدى.
