ساپارىنىڭ بارىسىندا باقىتجان ساعىنتاەۆ «نۇرلى جول» باعدارلاماسى بويىنشا سالىنىپ جاتقان ينفراقۇرىلىم نىساندارى مەن «نۇرلى جەر» باعدارلاماسى بويىنشا تۇرعىزىلىپ جاتقان قولجەتىمدى باسپانا قۇرىلىسىنىڭ بارىسىمەن تانىسادى. بۇدان وزگە, قر پرەمەر-ءمينيسترىن يندۋستريالدى-يننوۆاتسيالىق دامۋ مەملەكەتتىك باعدارلاماسى اياسىندا ءوڭىردىڭ ونەركاسىپتىك كاسىپورىندارىنىڭ رەكونسترۋكتسيالاۋ جۇمىستارىمەن جانە اوك مەملەكەتتىك باعدارلاماسى اياسىندا وبلىستىڭ اۋىل شارۋاشىلىعى تاۋارىن وندىرۋشىلەردىڭ ونىمدەرىنىڭ باسەكەگە قابىلەتتىلىگىن ارتتىرۋ شارالارى تۋرالى اقپاراتتاندىرادى. باقىتجان ساعىنتاەۆ قىزىلوردا وبلىسىنىڭ اكتيۆى مەن جۇرتشىلىعىنىڭ قاتىسۋىمەن مەملەكەت باسشىسىنىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» جولداۋىندا العا قويىلعان مىندەتتەردى جۇزەگە اسىرۋ تۇرعىسىنان ءوڭىردى الەۋمەتتىك-ەكونوميكالىق دامىتۋ تاقىرىبىندا كەڭەس وتكىزەدى دەپ كۇتىلۋدە. بۇدان كەيىن, باقىتجان ساعىنتاەۆتىڭ توراعالىعىمەن «اتامەكەن» ۇكپ وڭىرلىك كەڭەسىنىڭ كاسىپكەرلەر قاۋىمداستىعىمەن شاعىن جانە ورتا بيزنەسكە قولداۋ كورسەتۋ, قايتا رەتتەۋ, ءونىمدى جۇمىسپەن قامتۋ جانە جاپپاي كاسىپكەرلىكتى دامىتۋ باعدارلاماسىن ىسكە اسىرۋ ماسەلەلەرى بويىنشا كەڭەس وتەدى دەپ جوسپارلانعان. سونداي-اق, جۇمىس ساپارىنىڭ كەستەسىندە باقىتجان ساعىنتاەۆتىڭ عىلىمي جانە شىعارماشىلىق زيالىلار قاۋىمىمەن مەملەكەت باسشىسىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىنىڭ ىسكە اسىرىلۋ بارىسىن تالقىلاۋ بويىنشا كەزدەسۋى وتەدى دەپ جوسپارلانعان. ايتا كەتەرلىگى, قىزىلوردا وبلىسى - ەلەۋلى ەكونوميكالىق الەۋەتى مەن تابيعي رەسۋرستارى بار اگرارلىق-يندۋستريالدى ءوڭىر. وبلىستا مۇناي-گاز سالاسى, ۋران ونەركاسىبى جانە قۇرىلىس يندۋسترياسى دامىپ جاتىر. وبلىستىڭ ءجىو قۇرىلىمىندا ونەركاسىپ ۇلەسى 37,3%, اۋىل شارۋاشىلىعى - 3,6%, قۇرىلىس - 5,2%, ساۋدا - 8,6%, كولىك - 11,4%, باسقالارى - 33,5% قۇرايدى. وبلىس رەسپۋبليكا بويىنشا كۇرىشتىڭ 90%-ىن شىعارادى.
