سالتاناتتى شاراعا ۋنيۆەرسيتەت رەكتورى, پروفەسسور مارات يباتوۆ جانە Mitsubishi Electric كونتسەرنىنىڭ باس ديرەكتورى حيروشي فۋرۋتا مەن «كازپروماۆتوماتيكا» كومپانياسىنىڭ وكىلدەرى قاتىستى.
قاراعاندى تەحنيكالىق ۋنيۆەرسيتەتى بۇعان دەيىن دە Total, Ersai, Siemens, Festo, Leica Geosystems Kazakhstan, Schneider Electric سياقتى الەمدىك كومپانيالاردىڭ وكىلدىكتەرىمەن بىرلەسە وتىرىپ, وقۋ ورتالىقتارى مەن تاجىريبەلىك زەرتحانالار اشقان بولاتىن. مۇنداي ورتالىقتاردىڭ ارتىقشىلىعى – ستۋدەنتتەر مەن ماگيسترانتتار ۋنيۆەرسيتەت قابىرعاسىندا ءجۇرىپ-اق وندىرىستىك تاجىريبەمەن كەڭىنەن تانىسۋ مۇمكىندىگىنە يە بولادى.
– بۇل زەرتحانالار ۋنيۆەرسيتەتپەن تىعىز جۇمىس ىستەيتىن مەتاللۋرگيا, تاۋ-كەن, ەنەرگەتيكا سالالارىنداعى ءوندىرىس ورىندارىنىڭ جۇمىسكەرلەرى ءۇشىن ترەنينگتەر وتكىزۋگە دە وتە قولايلى. سوندىقتان, مۇنداي ءبىلىم بەرۋ ورتالىقتارىن جوعارى وقۋ ورنى بازاسىندا وندىرىستىك كومپانيالارمەن بىرىگىپ اشۋ باسەكەگە قابىلەتتى شىنايى مامان-ينجەنەرلەردى دايىنداپ, ولكەمىزدىڭ كادرلار ماسەلەسىن شەشۋگە تىكەلەي ىقپال ەتەدى, – دەدى ۋنيۆەرسيتەت رەكتورى م.يباتوۆ.
وقۋ ورتالىعى Mitsubishi Electric ۇسىنعان الەمدىك ستاندارتتارعا ساي قۇرىلعىلارمەن جابدىقتالعان. وندا وندىرىستىك ماشينالاردى ۇزاقتان, ءتىپتى, موبيلدىك تەلەفون ارقىلى باسقارۋ باعدارلامالارىن جاسايتىن قۇرىلعىلار, باقىلاۋشى قۇرىلعىلار, وپەراتور پانەلى, قوندىرعىلاردىڭ جۇمىس ىستەۋ جيىلىگىن باقىلاۋ قۇرالدارى, سونداي-اق جيىلىگى جوعارى توقپەن جۇمىس ىستەيتىن وندىرىستىك قۇرىلعىلار مەن روبوتتاردىڭ جۇمىسىن باقىلاۋ جانە وزگەرتۋ پروتسەستەرىن قاداعالايتىن سەرۆوپريۆود بار.
ورتالىقتىڭ اشىلۋ راسىمىنە ارنايى شاقىرىلعان جاپون كونتسەرنىنىڭ باس ديرەكتورى حيروشي فۋرۋتا كەزدەسۋ بارىسىندا ۋنيۆەرسيتەتتەگى مامان دايارلاۋ شارتتارىمەن تانىسىپ, كونتسەرننىڭ رەسمي وكىلى «كازپروماۆتوماتيكا» كومپانياسى ارقىلى ۋنيۆەرسيتەتپەن ۇشجاقتى سەرىكتەستىكتە جۇمىس جاساۋىن جالعاستىرا بەرەتىندىگىن مالىمدەدى.
ميراس اسان,
«ەگەمەن قازاقستان»
قاراعاندى وبلىسى
