جارما اۋدانىندا ورنالاسقان باقىرشىق تاۋ-كەن ءوندىرۋ كاسىپورنى باق وكىلدەرىنە ارنايى پرەسس-تۋر ۇيىمداستىرىپ, الەۋمەتتىك جانە وندىرىستىك نىساندارىن ارالاتىپ, اتقارىپ جاتقان جۇمىستارىمەن تانىستىردى.
قازىرگى ۋاقىتتا مۇندا قۇرىلىس جۇمىستارى قارقىن الىپ, ءارتۇرلى قۋاتتىلىقتاعى, جوعارى ءۆولتتى جەلىلەردەن باستاپ وندىرىستىك عيماراتتارعا دەيىن, ۇزىن سانى ەلۋدەن استام نىساندار سالىنىپ جاتىر. كارەردە كەن ءوندىرۋ شارالارى بيىلعى جىلدىڭ ەكىنشى جارتى جىلدىعىندا, ال جاقىن جىلدارى ىسكە قوسىلاتىن تاۋ-كەن بايىتۋ كەشەنىندە العاشقى كونتسەنتراتتى ءوندىرۋ 2018 جىلدىڭ ءۇشىنشى توقسانىندا باستالادى دەپ جوسپارلانىپ وتىر. فابريكا تولىق قۋاتىندا جۇمىس ىستەۋگە 2019 جىلى كوشەدى.
التىن ءوندىرۋشى «پوليمەتالل» كومپانياسى 2014 جىلى جارما اۋدانى اۋماعىنداعى باقىرشىق كەن ورنىن ساتىپ العاندىعىن جاريالاعان-دى. سول ۋاقىتتان بەرى كاسىپورىن بيزنەستىڭ الەۋمەتتىك جاۋاپكەرشىلىگى نەگىزىندە اۋدان تۇرعىندارىنا تۇراقتى تۇردە قولداۋ كورسەتىپ كەلەدى. 2014-2016 جىلدار ارالىعىندا كەن ورنى وبلىس جانە جارما اۋدانى اكىمدىكتەرمەن جاسالعان مەموراندۋمدار اياسىندا الەۋمەتتىك سالاعا 1 ملرد 74 ميلليون تەڭگەدەن استام ينۆەستيتسيا سالىپتى. وسى ۋاقىتقا دەيىن وبلىس, رەسپۋبليكا بيۋدجەتىنە جانە بيۋدجەتتىك ەمەس قورلارعا 1,2 ملرد تەڭگە كولەمىندە سالىق تولەپتى.
كاسىپورىننىڭ قولعا العان ەڭ اۋقىمدى الەۋمەتتىك جوبالارىنىڭ ءبىرى – اۋەزوۆ كەنتىندەگى 20 جىلعا جۋىق قاڭىراپ بوس تۇرعان 180 ورىنعا ارنالعان بالاباقشا عيماراتىن قايتا قالپىنا كەلتىرۋى. كومپانيا بۇل ماقساتقا 240 ميلليون تەڭگە قارجى جۇمساپ, 2016 جىلدىڭ اياعىندا تولىقتاي جوندەۋدەن وتكىزىلگەن, زامان تالابىنا ساي جابدىقتالعان «اققۋ» بالاباقشاسىن مەملەكەت قاراماعىنا بەرگەن-ءدى. جۋرناليستەرگە تاربيە وشاعىن ارالاتىپ كورسەتكەن بالاباقشا مەڭگەرۋشىسىنىڭ مىندەتىن اتقارۋشى نازكەن بەكتۇرعانوۆا 1999 جىلى وسى نىسان جابىلىپ قالعان كەزدە بىرنەشە ارىپتەستەرىمەن بىرگە ءوزىنىڭ دە جۇمىسسىز قالعانىن ايتادى. «قۇدايعا شۇكىر, 20 جىلدان كەيىن بۇرىنعى ارىپتەستەرىمىز وسى بالاباقشادا قايتادان باس قوسىپ, ەڭبەك ەتىپ جاتقان جايىمىز بار. مۇندا بالعىندار ءۇشىن دە, تاربيەشىلەر ءۇشىن دە بارلىق جاعداي جاسالعان. ۇجىمىمىزدا ەڭبەك ەتەتىن جاس مامانداردىڭ قاتارى دا از ەمەس. بالاباقشانىڭ جۇمىس ىستەي باستاعانىنا بار بولعانى 4 اي بولسا دا, ۇلكەن قالالاردا وتەتىن ءارتۇرلى سەمينارلارعا قاتىسىپ, بىلىكتىلىگىمىزدى شىڭداپ جاتىرمىز», دەيدى ول.
كەن ورنى اۋەزوۆ كەنتىندەگى ەمحانا, مەكتەپ پەن ەركىن كۇرەسكە ارنالعان سپورت زالىن كۇردەلى جوندەۋدەن وتكىزۋگە دە جاردەمدەسىپتى. كاسىپورىن جىل سايىن اۋەزوۆ كەنتى مەن شالاباي اۋىلىنداعى مەكتەپتەردى بىتىرگەن تۇلەكتەرگە 4 گرانت ءبولىپ وتىرادى ەكەن. قازىرگى ۋاقىتتا ەلىمىزدىڭ ۋنيۆەرسيتەتتەرىندە 23 ستۋدەنت ءبىلىم الىپ جاتقان كورىنەدى.
«قازاقستان پرەزيدەنتى نۇرسۇلتان نازارباەۆ «بولاشاققا باعدار: رۋحاني جاڭعىرۋ» اتتى ماقالاسىندا بيزنەستىڭ الەۋمەتتىك جاۋاپكەرشىلىگىنە ەرەكشە توقتالعان ەدى. ءبىز بۇل جاۋاپكەرشىلىكتى تولىق سەزىنەمىز. سوڭعى ءۇش جىلدا جارما اۋدانىنىڭ اۋەزوۆ, شالاباي اۋىلدارىنىڭ دامۋىنا 1 ملرد 74 ملن تەڭگە قارجى ينۆەستيتسيالاندى. ءبىزدىڭ كاسىپورىن مۇنىمەن توقتاپ قالماي, الداعى ۋاقىتتا دا قولداۋ كورسەتە بەرمەك. سەبەبى, بۇل اۋىلدىڭ عانا ەمەس, كەلەر ۇرپاقتىڭ ءوسىپ-وركەندەۋىنە تارتىلعان ينۆەستيتسيا دەپ تۇسىنەمىز», دەيدى «باقىرشىق تاۋ-كەن ءوندىرۋ كاسىپورنى» جشس باس ديرەكتورى يۋري وۆچيننيكوۆ.
بيىلعى اقپان ايىندا كاسىپورىن باسشىلىعى جارما اۋدانىنىڭ اكىمدىگىمەن مەموراندۋمعا قول قويىپ, اۋداننىڭ دامۋىنا 30 ملن تەڭگە, وبلىس اكىمدىگىمەن جاسالعان كەلىسىمشارت اياسىندا ايماقتىڭ ينفراقۇرىلىمىنا 750 ملن تەڭگە قارجى ءبولىپتى. كەن ورنى بيزنەستىڭ الەۋمەتتىك جاۋاپكەرشىلىگى اياسىندا بيىل اۋدان ورتالىعىنا ايتىسكەر اقىن قاليحان التىنباەۆتىڭ ەسكەرتكىشىن ورناتىپ, رەسپۋبليكالىق اقىندار ايتىسىن ۇيىمداستىرۋعا قارجىلاي قولداۋ كورسەتىپ, اۋەزوۆ كەنتىندەگى امبۋلاتوريانىڭ ەكىنشى قاباتىن, اكىمدىكتىڭ اكتى زالىن جانە «ارمان» كلۋبىن جوندەۋدەن وتكىزۋدى جوسپارلاپ وتىر.
ازامات قاسىم,
«ەگەمەن قازاقستان»
شىعىس قازاقستان وبلىسى,
جارما اۋدانى
