اقتوبە وبلىسى كۇندەرىنىڭ سالتاناتتى اشىلۋى ەكسپو-2017 كورمەسىنىڭ اۋماعىندا ورنالاسقان امفيتەاتردا ءوتتى. جينالعان قاۋىمعا «اقتوبە – قۇتتى مەكەن» اتتى گالا-كونتسەرت بولدى. مەرەكەلىك شاراعا «I am a Singer» حالىقارالىق كونكۋرسىنىڭ ءفيناليسى ديماش قۇدايبەرگەن, سونداي-اق, قازاق ەستراداسىنىڭ جۇلدىزدارى, اقتوبە وبلىسىنىڭ شىعارماشىلىق ۇجىمدارى, جالپى سانى 600-دەن اسا ونەرپاز قاتىستى.
مادەني كۇندەردىڭ جالعاسى كەشە استانا قالاسىنىڭ ماڭىنداعى «قازانات» يپپودرومىنداعى «ەتنواۋىلدا» جالعاستى. بۇل جەردە ءوڭىردىڭ شىعارماشىلىق ۇجىمدارىنىڭ قاتىسۋىمەن «ەل جۇرەگى استاناعا – ارايلى اقتوبەدەن» اتتى تەاترلاندىرىلعان ەتنو كونتسەرتتىك باعدارلاماسى ءوتتى.
بۇل كۇنى ا.جۇبانوۆ اتىنداعى قازاق حالىقتىق اسپاپتارى وركەسترى جينالعان قاۋىمدى ءان-كۇيگە بولەسە, ت.احتانوۆ اتىنداعى وبلىستىق دراما تەاترىنىڭ ارتىستەرى «ايمان-شولپان» مۋزىكالىق سپەكتاكلىن قويدى. ال «الاقاي» قۋىرشاق تەاترىنىڭ ورىنداۋىنداعى «جاينا, جادىرا, دوستار» اتتى باعدارلاما قوناقتاردى قۋانىشقا بولەدى.
– باس قالامىزعا ءوڭىرىمىزدىڭ بالقايماقتارىن ەرتىپ كەلدىك. «اقتوبە – قۇتتى مەكەن» اتتى گالا-كونتسەرتتە ونەرپازدارىمىز ءوز ونەرىن پاش ەتتى. ال الەمدىك ساحنادا جارقىراپ شىققان جاس جۇلدىزىمىز ديماش قۇدايبەرگەن شارامىزدىڭ كوركىنە كورىك بەرە ءتۇستى. «ەتنواۋىلدا» قويعان اقتوبەنىڭ تاريحى كورەرمەندەر كوڭىلىنەن جىلى ورىن تابا ءبىلدى دەپ ۇمىتتەنەمىن, – دەدى ت.احتانوۆ اتىنداعى وبلىستىق دراما تەاترىنىڭ رەجيسسەرى ەلتاي كەمال.
ۇيىمداستىرۋشىلار ءوڭىر تاريحىن جوعارى دەڭگەيدە ساحنالاي بىلگەنى انىق. سەبەبى, ابىلقايىر حان, ەدىگە باتىر, موڭكە بي سەكىلدى نار تۇلعالار تاريح قويناۋىنان سىر شەرتكەندەي اسەردە قالدىردى. اسىرەسە, موڭكە ءبيدىڭ ء«تۇرلى-ءتۇرلى حالىق بولادى, ىنتىماعى بەرىك بولادى. اللا حالقىمىزدىڭ تۇتاستىعىن, اماندىعىن بەرگەي!» دەگەندە سول بابالارىمىزدىڭ ارمان-تىلەگى بۇگىندە ءبىزدى وسىنداي بەيبىت كۇنگە جەتكىزىپ وتىر دەگەن وي قالدىرىپ جاتتى.
– «ايمان-شولپان» سپەكتاكلى بۇرىن رەپەرتۋارىمىزدا بولعان. 20 جىل بۇرىن العاش رەت ساحنالاعانبىز. كورەرمەن جىلى قابىلدادى. بىراق, سوڭعى ءۇش جىلدا بەلگىلى سەبەپتەرگە بايلانىستى توقتاپ قالدى. ەكسپو اياسىندا وتەتىن مادەني كۇندەرگە وراي قويىلىمدى قايتا جاڭعىرتتىق, – دەدى «ايمان-شولپان» سپەكتاكلىنىڭ رەجيسسەرى دامەتكەن قۇسايىنوۆا.
بەس كۇنگە جالعاساتىن شارادا «اقتوبە وبلىسىنىڭ قازىناسى» ۇلتتىق گەوگرافيالىق دۇنيەلەر كورمەسى, «اقتوبە مانۋفاكتۋرالارى» اتتى كارتينالار كورمەسى جۇرتشىلىق نازارىنا ۇسىنىلادى.
ايان ءابدۋالي,
«ەگەمەن قازاقستان»
