بۇل كۇنى كەڭەس اۋىلىندا تاراز يننوۆاتسيالىق-گۋمانيتارلىق ۋنيۆەرسيتەتىنىڭ, وبلىستىق مادەنيەت, ارحيۆتەر جانە قۇجاتتاما باسقارماسى حالىق شىعارماشىلىعى ورتالىعىنىڭ جانە مويىنقۇم اۋدانى اكىمدىگىنىڭ ۇيىمداستىرۋىمەن سەگىز كيىز ءۇي تىگىلىپ, التىباقان قۇرىلدى.
بۇل ساپار حالقىمىزدىڭ ەجەلگى تۇرمىس-تىرشىلىگىن, سالت-ءداستۇرىن ەسكە تۇسىرەتىن ەرەكشە كۇن بولدى. عاسىرلار بويى قالىپتاسقان باي مادەنيەتىمىز بەن تاريحىمىز دا ەتنوگرافيالىق كەرۋەننىڭ ءون بويىنان كورىنىس تاۋىپ تۇردى. سونىمەن قاتار, جينالعان كوپشىلىك اۋىلدىڭ تۇرمىسى دا تامىرىمىزدىڭ ءبىر بولشەگى ەكەنىن سەزىنە ءتۇستى. اۋىل ىرگەسىندە بيە ساۋ, ۇرشىق ءيىرۋ, ديىرمەن تارتۋ جانە ءجۇن ساباۋ سياقتى تۇرمىس قۇندىلىقتارى دا ناسيحاتتالدى. ال وڭىرگە بەلگىلى قۇسبەگىلەر باپتاعان بۇركىتىن اينالا ۇشىرىپ, ەجەلگى دالا مادەنيەتىنىڭ مازمۇنىن كورسەتتى. قۇستىڭ اسپاندى اينالا ۇشىپ ءجۇرىپ, كەنەت بۇركىتشىگە كەرۋەننىڭ كەلە جاتقانىنان بەلگى بەرۋى دە تالايدى تاڭداندىرماي قويمادى.
شۋداسى جەلمەن جەلكىلدەگەن تۇيەلەردىڭ تارپاڭ بەينەلەرى مەن ۇلتتىق كيىمدەرى ءسان-سالتاناتىن كەلتىرىپ تۇرعان ادامدار اراسىنداعى ءوزارا بايلانىس تا ۇلى دالانىڭ دەگدار بولمىسىن, كوركەم كەلبەتىن تانىتىپ تۇرعانداي اسەر ەتتى. ال كۇيمەلەرى كۇمبىرلەگەن كوشتى اۋىل تۇرعىندارى ۇلتتىق داستۇرگە ساي قارسى الدى. قازاقى داستۇرگە ساي قىناما بەل قامزول كيگەن قىز-كەلىنشەكتەر كەرۋەنشىلەرگە قىمىز بەن شۇبات ۇسىنىپ, ءىلتيپات كورسەتتى.
شارا بارىسىندا قازاقتىڭ بالانى بەسىككە سالۋ, تۇساۋىن كەسۋ, توقىمقاعار سياقتى ۇلتتىق سالت-داستۇرلەرى دارىپتەلدى. ۇلكەندەر جاعى جاستارعا بىلمەگەنىن ۇيرەتىپ, ۇلگى كورسەتتى. اسىرەسە, بۇل كورىنىس بولاشاق انالار ءۇشىن دە پايدالى كەڭەس بولدى. سونداي-اق, جەرگىلىكتى ونەرپازدار مەن سالتانات قوناقتارى ءان شىرقاپ, مويىنقۇم دالاسىن اسەرلى كۇيگە بولەدى.
حالقىمىزدىڭ ىقىلىمنان كەلە جاتقان ىرىستى سالتىنىڭ ءبىرى – ساپارعا وڭ بولسىن ايتۋ بولعان. بابالار وسيەتىمەن جالعاسىپ كەلە جاتقان وسىناۋ يگى ءداستۇر بۇگىندە قولداۋ تاۋىپ, جينالعان كوپشىلىك استانا تورىنە بەت العان كەرۋەنشىلەرگە ءسات-ساپار تىلەدى. وبلىس اكىمىنىڭ ورىنباسارى ەرقانات مانجۋوۆ باستاعان جامبىلدىقتار مويىنقۇم اۋدانىنان ەتنوگرافيالىق كەرۋەندى شىعارىپ سالدى. ايتا كەتەيىك, مويىنقۇم اۋدانى, كەڭەس اۋىلى اتالعان كەرۋەننىڭ جامبىل وبلىسىنداعى سوڭعى بەكەتى. ال كەش تۇسە « ۇلى جىبەك جولى. كونە تارازدان اسقاق استاناعا تارتۋ» كەرۋەنى قاراعاندى وبلىسى, سارىشاعان اۋىلىنا قاراي بەت الدى. ەندى ساناۋلى كۇندەردەن كەيىن كۇيمەلەر كۇمبىرى كورمە الاڭىنا دا ەستىلىپ قالاتىن بولادى. ايتۋلى كورمەنى تاماشالاۋشىلاردىڭ دا ۇلتتىڭ ۇلى ەرەكشەلىگىمەن تانىساتىن كۇنى الىس ەمەس.
حاميت ەسامان,
«ەگەمەن قازاقستان»
جامبىل وبلىسى
