قازاقستان پوليتسياسىنىڭ 25 جىلدىعى قارساڭىندا وبلىستىق ىشكى ىستەر دەپارتامەنتى تاراپىنان اتقارىلىپ جاتقان اۋقىمدى شارالار اراسىنان ەسىل ەرلەردى ۇلىقتاۋ, ەسىمدەرىن جاڭعىرتۋ باعىتىنداعى يگىلىكتى ىستەر كوڭىل توعايتادى. ء«ولى ريزا بولماي, ءتىرى بايىمايدى» دەپ اتالارىمىز تەككە ايتپاسا كەرەك. ادامداردىڭ تىنىشتىعىن كۇزەتىپ, قوعام قاۋىپسىزدىگىن قامتاماسىز ەتۋ جولىندا قىرشىنىنان قيىلعان كەشەگى بوزداقتار قالاي اسپەتتەلسە دە ەش ارتىقتىق ەتپەيتىنى انىق.
اققايىڭ اۋدانىنىڭ ورتالىعى سميرنوۆو كەنتىندە الەكسەي ششەرباكوۆ وقىعان مەكتەپتىڭ قابىرعاسىنا مەموريالدىق تاقتانىڭ قويىلۋى پوليتسيا قىزمەتكەرىنە دەگەن ۇلكەن قۇرمەتتىڭ ءبىرى, جاس بۋىندى ەرلىككە, ادالدىققا باۋلۋدىڭ ونەگەسى مەن تاعىلىمى بولسا كەرەك.
الەكسەي كەڭەس داۋىرىندە ىشكى ىستەر سالاسىندا قىزمەت ەتكەن. ول وسى اۋداندا تۋىپ-وسكەنىمەن, سانالى عۇمىرىن پەتروپاۆل قالاسىندا وتكەرگەن. ءومىرىنىڭ سوڭىنا دەيىن قىلمىس كوپ جاسالاتىن جۇمىسشى كەنتىندەگى دوبروليۋبوۆ پوليتسيا بەكەتىندە اعا ۋچاسكەلىك ينسپەكتورى قىزمەتىن اتقارعان. كوبىنە تاجىريبەلى, بىلىكتى ءتارتىپ ساقشىلارى وسى اۋماققا جىبەرىلەتىن. الەكسەيگە دە وسىنداي ۇلكەن سەنىم ارتىلعان. ميليتسيا مايورىنىڭ جۇمىسقا ىجداعاتتىلىعىن, تەمىردەي ءتارتىپتى سۇيەتىنىن باسشىلىق تا, ارىپتەستەرى دە جوعارى باعالايتىن.
سول ءبىر قاندى وقيعانى قىزى ناتاليا بىلاي ەسكە الادى: «اكەم وتباسىلىق جانجال جايلى سۋىت حابار الىسىمەن وقيعا ورنىنا تەز جەتكەنشە اسىققان. ويتكەنى, ەكى رەت سوتتالىپ, تۇرمەدە وتىرىپ كەلگەن ا.شكوديننىڭ مىنەز-قۇلقىن جاقسى بىلەتىن. جاس بالالاردى جازىم ەتە مە دەگەن قاۋىپ ويىنان شىقپاعان. اكەم جەتكەنشە ايەلى مەن كورشىلەرىن جاراقاتتاپ ۇلگەرگەن. ۇيگە كىرە بەرگەندە قىلمىسكەر جاسىرىنعان جەرىنەن اتىپ شىعىپ, وتكىر ۇستارامەن اكەمنىڭ تاماق تۇسىنان بىرنەشە رەت ورىپ جىبەرگەن. رەتسيديۆيستىڭ جەكە تارتىبىنە بايلانىستى وتباسىندا بىرنەشە رەت بولعاندىقتان, ءدال وسىنداي تەگەۋرىندى قارسىلىق كۇتپەسە كەرەك. اۋىر جاراقات العانىنا قاراماستان, ارىپتەستەرى كەلگەنشە قىلمىسكەردى جىبەرمەگەن. ولارعا ۇيدە بالالاردىڭ بارىن ەسكەرتىپ, تاپانشا قولدانۋعا رۇقسات بەرمەگەن. كوپ قان جوعالتقانىنا قاراماستان اۋرۋحانادا ءوزىن بايسالدى ۇستادى. باقيلىق بولار الدىندا ايتقان «بۇل – مەنىڭ مىندەتىم ەدى» دەگەن اقتىق ءسوزى قۇلاعىمدا ءالى كۇنگە دەيىن جاڭعىرىپ تۇر».
ەسىل ەردىڭ ەرلىگى ەسكەرۋسىز قالعان جوق. كەڭەس وداعىنىڭ «جەكە ەرلىگى ءۇشىن» وردەنىمەن ماراپاتتالدى. مەموريالدىق تاقتانىڭ اشىلۋ سالتاناتىندا ءوىىد-نىڭ باستىعى, گەنەرال-مايور بەرىك ءبىلالوۆ, قىزى ناتاليا, رەسەيدىڭ ستاۆروپول ولكەسىنەن ارنايى كەلگەن نەمەرەسى ءسوز سويلەپ, مارقۇمنىڭ ءومىر جولىنان ەستەلىكتەر ايتتى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى,
اققايىڭ اۋدانى
