وسىمەن التىنشى رەت ۇيىمداستىرىلىپ جاتقان بۇل بايقاۋعا ەلىمىزدىڭ ماڭداي الدى اسكەري وركەسترلەرىمەن بىرگە كورشى قىتاي مەن رەسەيدىڭ ۇزدىك اسكەري ونەر ۇجىمدارى قاتىستى. ال ىرىكتەۋ سىندارىنان سۇرىنبەي وتكەن ۇزدىك اسكەري وركەسترلەردىڭ قاتارىندا ۇلتتىق ۇلاننىڭ ۇلگىلىك كورسەتىمدى وركەسترى, اسكەري ينستيتۋتتىڭ وركەسترى, ۇلتتىق ۇلاننىڭ «وڭتۇستىك», «ورتالىق», «باتىس» جانە «شىعىس» وڭىرلىك قولباسشىلىقتارىنىڭ اسكەري وركەسترلەرى ءوز ونەرلەرىن كورەرمەن نازارىنا پاش ەتتى.
سونىمەن بىرگە فەستيۆالدىڭ اقتىق ونەر كەشىندە مەملەكەتتىك كۇزەت قىزمەتىنىڭ (پرەزيدەنتتىك وركەستر) اسكەري وركەسترى مەن قۇرمەت قاراۋىل روتاسى, ۇلتتىق قاۋىپسىزدىك كوميتەتى شەكارا قىزمەتىنىڭ بىرلەسكەن وركەسترى مەن قورعانىس مينيسترلىگىنىڭ ورتالىق وركەسترى قاتىستى. ونەر دوداسىنىڭ كوركىن شەت ەلدەردەن كەلگەن رەسەي فەدەراتسياسى ۇلتتىق ۇلانى اسكەرى ورال وكرۋگى شتابىنىڭ اسكەري وركەسترى مەن قىتاي حالىق رەسپۋبليكاسى حالىقتىق قارۋلى پوليتسياسىنىڭ وركەسترى قىزدىرا ءتۇستى.
وتانسۇيگىشتىك پەن ۇرپاقتار ساباقتاستىعى رۋحىندا ورىلگەن پلاتس-كونتسەرت «ەكسپو-2017» حالىقارالىق كورمەسى ءىس-شارالارى اياسىندا ۇيىمداستىرىلىپ, ونداعى كلاسسيكالىق, حالىقتىق جانە ەسترادالىق مۋزىكالىق تۋىندىلارمەن قاتار, جاۋىنگەرلىك پاراد-دەفيلە, اسكەري-قىزمەتشىلەردىڭ قارۋ-جاراقپەن كورسەتىلگەن تانىمدىق كورسەتىلىمدەرى استانا جانە ونىڭ قوناقتارى ءۇشىن ەستە قالارلىقتاي اسەر قالدىردى.
اسىرەسە, جۇرتشىلىقتى پرەزيدەنتتىك وركەستر مەن ۇلتتىق ۇلان ۇلگىلىك كورسەتىمدى وركەسترى ورىنداعان تۋىندىلار ەرەكشە ءتانتى ەتتى. ەلىمىزدىڭ ەڭبەك سىڭىرگەن قايراتكەرى تىلەك ەرعاليەۆ جەتەكشىلىك ەتەتىن پرەزيدەنتتىك-ۇرمەلى وركەستر ماسكەۋدە وتەتىن ايگىلى حالىقارالىق «سپاسسكايا باشنيا» فەستيۆالىنىڭ تۇراقتى قاتىسۋشىسى. سونداي-اق, ونەر ۇجىمى ەلىمىزدىڭ داڭقىن ءتۇرلى الەمدىك بايقاۋلاردا ابىرويمەن تانىتىپ جۇرگەنىن دە ايتا كەتەيىك. بۇل كەشتە ونەرپازدار تاماشا شوۋ ۇيىمداستىرىپ, كورەرمەن قاۋىمنىڭ كوز قۋانىشىنا اينالدى.
رەسەيدىڭ ەڭبەك سىڭىرگەن ءارتىسى پودپولكوۆنيك ۆالەري بەليكوۆ ديريجەرلىك ەتەتىن ەكاتەرينبۋرگ قالاسىنان كەلگەن ۇلتتىق ۇلان اسكەرى ورال وكرۋگى شتابىنىڭ وركەسترى دە قالىڭ قاۋىمعا كوتەرىڭكى كوڭىل-كۇي سىيلادى. كاسىبي دەڭگەيدە ورىندالعان تۋىندىلار كورەرمەن قوشەمەتىنە بولەندى. ويتكەنى, ونەر ۇجىمى قازاق ەلىنە قۇرمەت رەتىندە ابايدىڭ «كوزىمنىڭ قاراسى» مەن «ناۋرىز» اۋەنىن دومبىرامەن سۇيەمەلدەي ورىنداپ, كەشكە جينالعان جۇرتشىلىقتىڭ ەرەكشە ىقىلاسىن تۋدىردى.
قىتايلىق لي سىچەن جەتەكشىلىك ەتەتىن حالىقتىق قارۋلى پوليتسياسىنىڭ «زاششيتنيك» وركەسترى وسىمەن ەكىنشى رەت ۇلتتىق ۇلان باس قولباسشىسىنىڭ جۇلدەلەرى ءۇشىن وتكەن حالىقارلىق فەستيۆالعا قاتىستى. قۇرامىندا دارىندى دا شەبەر ورىنداۋشىلارى بار مۋزىكانتتار بۇل جولى بار ونەرلەرىن ورتاعا سالدى. اسىرەسە, قىتايلىق كومپوزيتورلاردىڭ تۋىندىلارىن ورىنداعان وركەستر جينالعان قاۋىمدى وزدەرىنىڭ ءتول مادەنيەتىمەن ءتانتى ەتتى.
كەش بارىسىندا 150 ادامنان قۇرالعان ۇلاندىق جاۋىنگەرلەر ىشكى ىستەر ورگاندارىنىڭ 25 جىلدىعىنا تارتۋ رەتىندە ء«ىىم», «25», «ۇۇ», «KZ» ارىپتەرى مەن ساندارىن ساپ تۇزەپ سالىپ, ۇلتتىق ۇلان ءان-بي ءانسامبلىنىڭ سوليستەرى «پوليتسيا قىرانىمىز» بەن «ۇلاندار» اتتى ۇلتتىق ۇلان ءانۇرانىن ورىندادى.
فەستيۆال قاتىسۋشىلارىنىڭ بىرگە ورىنداعان «درۋجبا» اۋەنى ءۇش ەل اراسىنداعى مىزعىماس ىنتىماقتاستىقتى اسپەتتەگەندەي بولدى. سونىمەن قاتار, وركەستر مۇشەلەرىنىڭ «قازاق ەلى» ءانىن ناقىشىنا كەلتىرە ورىنداۋى, سالتاناتتى شارانىڭ شارىقتاۋ شەگىن شالقىتا تۇسكەندەي.
جالپى, فەستيۆال قورىتىندىسى بويىنشا ۇلتتىق ۇلان باس قولباسشىسى گەنەرال-لەيتەنانت رۋسلان جاقسىلىقوۆ ءوز اتىنان ارنايى سىيلىقتار مەن ديپلومداردى رەسەي, قىتاي جانە ەلىمىزدىڭ پرەزيدەنتتىك, قورعانىس مينيسترلىگىنىڭ ورتالىق وركەسترى مەن شەكارا قىزمەتىنىڭ بىرلەسكەن وركەسترلەرىنىڭ جەتەكشىلەرىنە تارتۋ ەتتى.
نۇرلىبەك دوسىباي,
«ەگەمەن قازاقستان»
