كەشە وسىنداعى اگرارلى تەحنيكالىق كوللەدجدى ءبىتىرىپ شىققان 22 تۇلەككە ديپلوم تاپسىرۋ سالتاناتتى ءوتتى. سالتاناتتى شارا باستالماس بۇرىن استانادان ءبىلىم جانە عىلىم مينيسترلىگىنەن, «حالىقارالىق باعدارلامالار ورتالىعى» اق «سەرپىن» ۇلتتىق جوبالار باسقارماسىنان, اقپارات جانە كوممۋنيكاتسيالار مينيسترلىگىنەن ارنايى كەلگەن قوناقتار رەسپۋبليكالىق جانە جەرگىلىكتى باق وكىلدەرىمەن بىرگە پرەس-تۋر اياسىندا «قازتسينك» جشس ريددەر مەتاللۋرگيالىق كەشەنى مەن ريددەر اگرارلىق كوللەدجىن ارالاپ, تىنىس-تىرشىلىگىمەن تانىستى. بۇل ەكى نىساننىڭ دا سەرپىندىكتەرگە تىكەلەي قاتىسى بار. جيىرما ەكى ستۋدەنت كوللەدجدە ءۇش جىل بويى ءبىلىم نارىمەن سۋسىنداسا, سونىڭ 7-ءۋى 8 اي ريددەر مەتاللۋرگيالىق كەشەنىندە وندىرىستىك تاجىريبەدەن ءوتىپ, قازىرگى ۋاقىتتا وسىندا جۇمىسقا قابىلدانىپ وتىر.
بۇگىندە تەحنيك-مەتاللۋرگ ماماندىعى بويىنشا اتالعان كەشەندە ەڭبەك ەتىپ جاتقان الماتى وبلىسىنىڭ تۋماسى ميراس قايداروۆ ريددەردەگى ءۇش جىلدىڭ قىزىقتى وتكەنىن, وزدەرىنە بارلىق جاعدايدىڭ جاسالعانىن ايتادى. «قالا حالقى ءبىزدى قۇشاق جايا قارسى الدى. كوللەدجدەگى ۇستازدارىمىزعا, شاھار باسشىلىعىنا ۇلكەن العىس ايتامىز. قازىر مەتاللۋرگيالىق كەشەندە ءوز قاتارلاستارىممەن بىرگە جۇمىس ىستەپ جاتىرمىن», - دەيدى ول. ميراستىڭ قاتارلاستارىنىڭ ءبىرى وڭتۇستىك قازاقستان وبلىسىنىڭ شىمكەنت قالاسىنان كەلگەن عالىمجان بەگالى: ء«بىز مۇندا ەڭ الدىمەن تاجىريبەدەن وتتىك, تاجىريبە كەزىندە ارقايسىمىزعا قولداۋ رەتىندە 90 مىڭنان باستاپ 110 مىڭ تەڭگەگە دەيىن اقشا تولەندى. ارينە, اۋەلدە ءتىل جاعىنان ازداعان قيىندىقتار بولدى. بىراق وسىنداعى قىزمەتكەرلەر تۇسىنىستىكپەن قاراپ, بىلگەندەرىن ۇيرەتتى. ۇجىمىمىز جاقسى. «قازتسينك» سەكىلدى الپاۋىت كاسىپورىندا ەڭبەك ەتىپ جاتقانىمىزعا قۋانىشتىمىز» دەپ اعىنان جارىلدى. تەگىن جاتاقحانامەن, ءۇش مەزگىل تاماقپەن قامتاماسىز ەتىلگەن جاستار اۋەلدە اۋا-رايىنىڭ سۋىقتىعىنان سەسكەنگەنىمەن, باعدارلاما اياسىندا ولارعا قىس مەزگىلىندە جىلى كيىمدەر بەرىلىپتى.
ەلوردادان كەلگەن قوناقتار مەن جۋرناليستەر جىلى جاقتىڭ ۇلدارى مەن قىزدارى ءبىلىم العان كوللەدجدى اسىقپاي ارالاعاننان كەيىن «شىعىس قازاقستان وبلىسىنىڭ ريددەر قالاسىندا «ماڭگىلىك ەل جاستارى – يندۋسترياعا!» الەۋمەتتىك جوباسىنىڭ «سەرپىن» دامىتۋ باعدارلاماسىن ەنگىزۋ بولاشاعى» تاقىرىبىندا وتكەن دوڭگەلەك ۇستەلگە قاتىستى. دوڭگەلەك ۇستەلدى اشقان ريددەر قالاسى اكىمىنىڭ ورىنباسارى دانيار دۇيسەمباەۆ كوللەدجدى بىتىرگەن 22 تۇلەكتىڭ ءبىرى جوعارى وقۋ ورنىنا تۇسەتىنىن, ءبىرى اسكەر قاتارىنا الىناتىنىن ايتىپ, «قازتسينك» كومپانياسىنا قاراستى ريددەر مەتاللۋرگيالىق كەشەنى تاعى دا 7 ستۋدەنتتى (7 ستۋدەنتتىڭ جۇمىسقا قابىلدانعانىن جوعارىدا ايتتىق) جۇمىسپەن قامتۋعا نيەتتى ەكەنىن جەتكىزدى. سونىمەن قاتار قازىرگى ۋاقىتتا قالعان 6 قىز بالاعا جۇمىس ىزدەستىرىلىپ جاتقانىن, بۇل ماسەلە جۋىق ارادا شەشىمىن تاباتىنىن تىلگە تيەك ەتتى.
ريددەردە ءبىلىم العان 22 ستۋدەنتتىڭ الدى وتباسىن قۇرىپ تا ۇلگەرىپتى. سونىڭ ءبىرى – الماتى وبلىسىنان كەلگەن ستۋدەنت ەلدان بولات ۇلى. ونىڭ جۇبايى كريستينا دا وسى كوللەدجدە ورمانشى ماماندىعى بويىنشا ءبىلىم الىپتى. «2014 جىلى وسىندا وقۋعا ءتۇستىم. بولاشاق جۇبايىممەن سول جىلى تانىسىپ, ءبىر جارىم جىلدان كەيىن وتباسىن قۇردىق. كىشكەنتايلى بولدىق. اللا ءساتىن سالسا, وسى قالادا ەڭبەك ەتسەم دەگەن ويىم بار», - دەيدى جەتىسۋلىق ستۋدەنت.
سەرپىندىكتەردىڭ اراسىندا كوڭىل جاراستىرىپ, وتباسىن قۇرعان جاستاردىڭ قاتارى از ەمەس. بۇعان دەيىن 16 بوزبالا مەن بويجەتكەن شاڭىراق كوتەرىپتى. «بۇل - ءبىزدىڭ 17-ءىنشى نەمەرە», - دەيدى «حالىقارالىق باعدارلامالار ورتالىعى» اق «سەرپىن» ۇلتتىق جوبالار باسقارماسىنىڭ باسشىسى كۇلزيا توباتاەۆا.
ريددەر اگرارلى تەحنيكالىق كوللەدجىندە وتكەن شارا بارىسىندا «سەرپىن» ۇلتتىق جوبالار باسقارماسىنىڭ باسشىسى 8 ستۋدەنتكە قىزىل ديپلوم جانە بىرقاتار ستۋدەنتتەرگە ءبىلىم جانە عىلىم ءمينيسترى ەرلان ساعاديەۆتىڭ العىس حاتىن تاپسىردى. مۇنداي العىس حات وسى ءىستىڭ باسى-قاسىندا جۇرگەن ريددەر قالاسىنىڭ اكىمى جومارت مۇراتوۆقا, ونىڭ ورىنباسارى دانيار دۇيسەمباەۆقا, ريددەر اگرارلى تەحنيكالىق كوللەدجىنىڭ ديرەكتورى الەكساندر سامويلەنكو مەن وبلىستىق ىشكى ساياسات باسقارماسىنىڭ «جاستار رەسۋرستىق ورتالىعىنىڭ» ديرەكتورى ارايلىم ەسىمبەكوۆاعا دا تابىس ەتىلدى.
ازامات قاسىم,
«ەگەمەن قازاقستان»
شىعىس قازاقستان وبلىسى,
ريددەر قالاسى
