جەدەل ىزدەستىرۋ شارالارى ءبىر مەزگىلدە قازتالوۆ جانە وعان كورشىلەس بىرنەشە اۋداندا قاتار وتكىزىلگەن. قازتالوۆ اۋىلىنىڭ وزىندە 15 نىسان تىنتىلگەن. «براكونەرلەر بۇلتارتپاس ايعاقتارمەن ۇستالدى» دەيدى پوليتسيا قىزمەتكەرلەرى. اتتەگەنايى, «قىزىل كىتاپقا» ەنگەن كيەلى جانۋاردى قىرىپ جۇرگەن قىلمىستىق توپتىڭ قۇرامىندا اۋماقتىق «وحوتزووپروم» مەكەمەسىنىڭ باس ينسپەكتورى دا بولۋى مۇمكىن دەگەن كۇمان بار. «قاسقىرعا قوي باقتىرۋ» دەگەن وسىنداي-اق بولار.
ءتىنتۋ بارىسىندا 272 دانا كيىك ءمۇيىزى تابىلىپ, بەس مىلتىق, 1 گازدى تاپانشا, 134 دانا وق-ءدارى تاركىلەنگەن. براكونەرلەردىڭ ارسەنالىنان بىرنەشە ءدۇربى, اڭشى پىشاعىنىڭ نەشە ءتۇرى, جۇزىنە قان قاتقان ارالار, 18 ۇيالى تەلەفون, تىعۋلى بىرنەشە اۆتوكولىك ءنومىرى تابىلدى. ەڭگەزەردەي «تويوتا لاند كرۋزەر-100» كولىگىنىڭ ۇشەۋى, «ميتتسۋبيشي مونتەرو سپورت» جانە «رەنو داستەر» كولىگى, 1 ملن 120 مىڭ تەڭگە اقشا الىندى. جەدەل ىزدەستىرۋ شارالارى كەزىندە «اقبولات» قىستاۋىنىڭ ماڭىنان اتىلىپ, ءمۇيىزى كەسىلگەن 3 كيىك دەنەسى تابىلعان.
ازىرگە بەلگىلىسى, توپ قۇرامىنداعى 5 ادام انىقتالعان. ونىڭ ەكەۋى قازتالوۆتاعى ۋاقىتشا ۇستاۋ يزولياتورىنا قامالعان. باسقا دا كۇدىكتىلەردىڭ قىلمىسقا قاتىسى تەكسەرىلۋدە.
ايتا كەتەيىك, اقتوبە مەن تورعاي دالاسىنداعى بىلتىرعى قىرعىننان كەيىن قازاقستاندا اقبوكەن سانى كۇرت ازايىپ كەتتى. «بۇگىندە ەلىمىزدە نەبارى 100 مىڭنان ءسال اساتىن كيىك قالسا, ونىڭ 70 پايىزى باتىس قازاقستان وبلىسى اۋماعىندا» دەيدى ماماندار.
وسىدان ءبىراز بۇرىن وڭىردەگى قۇقىق قىزمەتكەرلەرى زاڭسىز كيىك اۋلاۋ فاكتىلەرىنىڭ جيىلەپ كەتكەنىن ايتىپ, دابىل كوتەرگەن ەدى. قۇقىق قورعاۋ ورگاندارىنىڭ دەرەگىنشە, سوڭعى ءۇش جىل ىشىندە كيىكتىڭ 248 ۇشاسى, 1117 ءمۇيىزى الىنىپ, 558 كيىك اتىلىپ الىنعانى انىقتالعان.
ەڭ سوراقىسى, قىلمىستى قۇرىقتاۋى ءتيىس ءتارتىپ ساقشىلارىنىڭ وزدەرى دە وڭاي ولجاعا كەتارى ەمەس بولىپ تۇر. كيىك مۇيىزىنە قاتىستى قىلمىسپەن تەرگەۋشى د.مۇقانوۆ ۇستالىپ, «پوليتسيا مايورى» شەنىنەن ايرىلىپ, 2 جىل 6 ايعا بوستاندىعى شەكتەلىپ سوتتالدى. وتكەن جىلدىڭ 14-قاراشا كۇنى تاڭعى ساعات 7-دە بوكەي ورداسى اۋدانى سارالجىن اۋىلدىق وكرۋگى اۋماعىنان «وحوتوزووپروم» ينسپەكتورلارى توقتاتقان 820DVA07 ءنومىرلى «نيۆا» اۆتوكولىگىنەن اقبوكەننىڭ 7 تەكەسى مەن 2 ەشكىسى شىقتى, وسى كولىكتە بوكەي ورداسى اۋداندىق ءىىب ۋچاسكەلىك ينسپەكتورى د.ءاشىموۆ بولعان!
زاڭسىز كيىك اۋلاۋشىلارعا قولدانىلاتىن زاڭنىڭ سولقىلداقتىعى دا كوپتەن اڭگىمە بولىپ كەلە جاتىر. قولعا تۇسكەن قىلمىسكەرلەر كوبىنە ايىپپۇلمەن, شارتتى جازامەن قۇتىلادى. ال قازتالوۆتا تۇتقىندالعان بۇگىنگى توپ مۇشەلەرىنە ەڭ قاتاڭ جازا بەرىلسە, 7 جىلعا دەيىن باس بوستاندىعىنان ايىرىلۋى مۇمكىن دەيدى ماماندار. ونى ۋاقىت كورسەتەدى.
قازبەك قۇتتىمۇرات ۇلى,
"ەگەمەن قازاقستان"
باتىس قازاقستان وبلىسى
سۋرەتتەر وپەراتسيا كەزىندە تۇسىرىلگەن بەينەجازبادان الىندى
