«وزبەكستاندا تۇڭعىش رەت ءوتىپ وتىرعان بۇل شاراعا استانا, الماتى, اقتاۋ, اقتوبە, قاراعاندى, قىزىلوردا, پاۆلودار, سەمەي, تاراز, تۇركىستان, شىمكەنت قالالارىنان 37 جوعارى وقۋ ورنى قاتىستى. كورمە جۇمىسىنىڭ ناتيجەسىندە وزبەكستان قازاقتارىنىڭ 1300-گە تارتا وكىلى جاڭا وقۋ جىلىندا قازاقستاندىق جوعارى وقۋ ورىندارىنىڭ ستۋدەنتى اتانۋعا قىزىعۋشىلىق ءبىلدىردى. ولاردىڭ اراسىندا قازاقستان مەن ورتالىق ازيا عانا ەمەس, كۇللى تمد اۋماعىندا تەڭدەسى جوق قازاق مەملەكەتتىك قىزدار پەداگوگيكالىق ۋنيۆەرسيتەتى دە بار. بۇل جوعارى وقۋ ورنىن 27 كوللەدج ءبىتىرۋشىسى تاڭدادى», دەيدى وزبەكستانداعى رەسپۋبليكالىق قازاق ۇلتتىق مادەني ورتالىعىنىڭ ءبىلىم جانە عىلىم ءبولىمى توراعاسىنىڭ ورىنباسارى كلارا سادىرباەۆا.
ك.سادىرباەۆانىڭ ايتۋىنشا, قازاقستاندىق جوعارى وقۋ ورىندارىن تاڭداعان وزبەكستان قازاقتارىنىڭ سانى مۇنىمەن شەكتەلمەيدى. الداعى ۋاقىتتا ولاردىڭ قاتارى قازاقستانداعى دايىندىق بولىمىندە وقىپ جاتقاندار جاستاردان بولەك, ءوز بەتىمەن كەلىپ قۇجات تاپسىرۋشىلار ەسەبىنەن دە تولىعا ءتۇسۋى مۇمكىن.
وزبەكستاننىڭ ناۋاي وبلىسى قازاقتارىنىڭ ۇلتتىق-مادەني ورتالىعىنا كوپ جىلدان بەرى جەتەكشىلىك ەتىپ كەلە جاتقان ك.سادىرباەۆانىڭ سوزىنە قاراعاندا, مۇنداي ءبىلىم كورمەسىن تاياۋدا تاراز مەملەكەتتىك پەداگوگيكالىق ۋنيۆەرسيتەتى ناۋاي وبلىسىندا وتكىزۋدى جوسپارلاپ وتىر. رەسمي ستاتيستيكا بويىنشا بۇل ايماقتا 57 مىڭ قازاق تۇرادى. اتالعان ايماقتا 71 قازاق مەكتەبى جۇمىس ىستەيدى.
«وقۋشىلار ءوز ءبىلىمىن جالعاستىرۋ كەزىندە ءتۇرلى كەدەرگىلەرگە تاپ بولۋدا. ماسەلەن, ولار ءالى كۇنگە دەيىن قازاقستاندا جالپى ءبىلىم بەرەتىن مەكەمەلەرگە دە, جوعارى وقۋ ورنىنا دا بىردەن تۇسە المايدى. بۇل ءۇشىن الدىمەن كوللەدج ءبىتىرۋى كەرەك. ال كورشى ەلدە كوپ جاعدايدا انا تىلىندە ءبىلىم الۋ مۇمكىندىگى شەكتەۋلى. ناۋاي وبلىسى سياقتى كەيبىر ايماقتاردا بىردە-ءبىر قازاق كوللەدجى جوق. بۇل ماسەلەدەن قازاقستاننىڭ ءبىلىم جانە عىلىم مينيسترلىگى دە, وزبەكستانداعى قازاقستان ەلشىلىگى دە حاباردار», دەيدى كلارا سادىرباەۆا.
ەرلىك ەرجان ۇلى,
جۋرناليست
الماتى
