قالا اكىمى باۋىرجان بايبەك قۋانىش يەلەرىن قۇتتىقتاپ, پاتەر كىلتىن ءوز قولىمەن تابىس ەتتى. باسپانالى بولعانداردىڭ قاتارىندا مۇگەدەكتەر, كوپبالالى جانە تولىق ەمەس وتباسىلار, مەملەكەت جانە بيۋدجەت قىزمەتكەرلەرى, اسكەري سالانىڭ ماماندارى بار. جاڭا ءۇيدىڭ يەلەرى اتانعان تۇرعىنداردىڭ قۋانىشىندا شەك جوق. اتالعان قالاشىقتا تۇرعىندار ءۇشىن بارلىق جاعداي جاسالعان.
14 تۇرعىن ءۇي ورنالاسقان اتلەتتەر اۋىلىنىڭ كەشەنى 23 گەكتار اۋماقتى الىپ جاتىر. ونىڭ اينالاسى زاماناۋي بەينەباقىلاۋ جۇيەسىمەن, ءورت قاۋىپسىزدىگىمەن تولىق قامتىلعان. حالىققا قىزمەت كورسەتۋ ورتالىعى, ەمحانا, سۋپەرماركەت, سۇلۋلىق سالونى, بانك جانە پوچتا بولىمشەسى, پوليتسيانىڭ تىرەك پۋنكتى جۇمىس ىستەپ تۇر. جاڭا قونىستانۋشىلار ءۇشىن «الماتى ارەنا» سپورت كەشەنىنىڭ سەكتسيالارىندا جاتتىعۋ جاساۋ ءۇشىن تولىق مۇمكىندىك بار.
سوڭعى 5 جىل ىشىندە الماتىدا 10 مىڭنان استام پاتەر ۇلەستىرىلگەن. اعىمداعى جىلدىڭ اياعىنا دەيىن تاعى دا 4,5 مىڭ پاتەر ءوز يەسىن تاۋىپ, كەزەكتە تۇرعان ءاربىر ءتورتىنشى وتباسى باسپانالى بولماق.
– اتلەتتەر اۋىلىندا قازىرگى كەزدە 1748 پاتەر بار. تۇرعىن ءۇي باسقارماسى تۇرعىن ءۇي كوميسسياسىنىڭ سۇزگىسىنەن وتكەن 1655 پاتەر يەلەرىنىڭ ءتىزىمىن جىبەردى. جالعا بەرىلىپ, كەيىن ساتىپ الاتىن 900 پاتەر يەلەرىمەن كەلىسىم جاسالدى. قازىرگى كەزدە قالادا تۇرعىندارعا پاتەر ءبولۋ شەشىمدەرىنىڭ بارىنشا اشىق ءجۇرۋى ءۇشىن قاجەتتى شارالاردىڭ بارلىعى جاسالۋدا. پاتەر كەزەگىندە تۇرۋ, ونىڭ جىلجۋى تەك ەلەكتروندى رەجىمدە جۇرگىزىلىپ, ەلەكتروندى ۇكىمەت پورتالىندا جۇزەگە اسادى. سونىمەن قاتار, العاش رەت كەزەكتىڭ ەلەكتروندى ينۆەنتاريزاتسياسى ەنگىزىلگەن, ياعني كەزەكتە تۇرعاندار جىل سايىن تۇرعىن ءۇي باسقارماسىنا كەلمەي-اق ديستانتسيالىق جۇيە ارقىلى وزىنە قاتىستى مالىمەتتى بىلە الادى. بۇلاردان وزگە, ادامي فاكتورسىز, كەزەكتە تۇرعاندار اراسىندا اۆتونومدى كەستە ارقىلى پاتەر ءبولۋ تەتىگى دە جىل اياعىنا دەيىن ەنگىزىلەدى. ونىڭ ۇستىنە, اتلەتتەر اۋىلىنداعى پاتەرلەردەن ۇمىتكەرلەر ءتىزىمى الماتى قالاسىنىڭ پروكۋراتۋراسىمەن كەلىسىلگەن, – دەيدى جاۋاپتى ماماندار.
ءبىر ايتا كەتەرلىك جايت, اتالمىش تۇرعىن ۇيلەر ورنالاسقان الاتاۋ اۋدانى قالا تۇرعىندارى مەن قوناقتارى قىزىعاتىن ەرەكشە زاماناۋي ەلدى مەكەنگە اينالىپ كەلەدى. اۋدان قۇرىلعالى بەرى تۇرعىندار سانى 1,5 ەسەگە ارتىپ, 200 مىڭ ادامعا جەتتى. سەگىز جىل ىشىندە جاڭا اۋداندى دامىتۋعا قالا بيۋدجەتىنەن 200 ملرد تەڭگەدەن استام قارجى بولىنگەن.
ارمان وكتيابر,
«ەگەمەن قازاقستان»
الماتى
