«قازانات» اتشابارىندا ۇيىمداستىرىلعان وسىناۋ ماڭىزدى شارانى اقپارات جانە كوممۋنيكاتسيالار ءمينيسترى داۋرەن اباەۆ, مادەنيەت جانە سپورت ءمينيسترى ارىستانبەك مۇحامەدي ۇلى, ماجارستاننىڭ قازاقستانداعى توتەنشە جانە وكىلەتتى ەلشىسى اندراش باراني سياقتى ساياسي تۇلعالار دا كوپپەن بىرگە تاماشالادى.
قازاق-ماديار مادەني بايلانىسىنىڭ نەگىزىن قالاعان قايراتكەر-عالىم يشتۆان قوڭىردىڭ ءمالىم ەتۋى بويىنشا, ماديارلاردىڭ اتاجۇرتى – قازاقستان. شامامەن V-VI عاسىرلاردا اتاقتى ەدىل پاتشا قۇرعان باتىس عۇن مەملەكەتى قوجىراعان تۇستا ارپاد باستاعان دالالىقتاردىڭ جەتى تايپاسى قازىرگى ماجار جەرىنە كەلىپ قونىستانعان.
سوندىقتان دا ماديارلار بايىرعى اتاجۇرتىن اڭسايدى, مىڭداعان جىلدار بۇرىن بابالارىنىڭ ءىزى قالعان ۇلى دالانى كەلىپ كورمەسە كوڭىلدەرى كونشىمەيدى.
ءسويتىپ, بايىرعى بابالار رۋحىن كوتەرۋ ءۇشىن سىرنايلاتىپ-كەرنەيلەتىپ اتقا قونعان ماديار باۋىرلار عۇندار زامانىنداعى قىلىشتاسۋ ونەرىن كورەرمەنگە ۇسىنا وتىرىپ, ساداق اتۋدىڭ ءارتۇرلى ۇلگىسىن كورسەتتى. الدىمەن تىزەرلەپ وتىرىپ ساداق تارتتى. ودان كەيىن اتتىڭ ۇستىندە اينالا شاۋىپ ءجۇرىپ نىسانا كوزدەۋدەن شەبەرلىكتەرىن بايقاتتى. سۇرەڭ سالىپ دۇركىرەي شاپقان مەرگەندەردىڭ ادىرنادان اتىلىپ شىققان وقتارى ءمۇلت كەتكەن جوق.
استاناعا ماديارلاردى باسقارىپ كەلگەن «ماديار – تۇران قورىنىڭ» پرەزيدەنتى, كەشە عانا باس سۇيەگى تابىلعان كەيكى باتىردىڭ بەينەسىن قالپىنا كەلتىرگەن انتروپولوگ بيرو اندروش مىرزانىڭ ايتۋىنا قاراعاندا, بۇل ساپاردىڭ باسقا دا العا قويعان ماقساتتارى بارشىلىق. اۋەلى, وسىدان 10 جىل بۇرىن تورعاي ولكەسىندە وتكەن قازاق-ماديار اعايىنداردىڭ العاشقى قۇرىلتايىنىڭ داتالى مەرەكەسىن اتاپ ءوتۋ ءۇشىن الداعى كۇندەرى قوستاناي وبلىسى, جانگەلدين اۋدانى جەرىندە ناقتىراق ايتقاندا, ساعا, قىزبەل, بيدايىق اۋىلدارىندا قوسىمشا مادەني شارالار ۇيىمداستىرىلىپ, ى.التىنسارين اتىنداعى ارقالىق مەملەكەتتىك پەداگوگيكالىق ينستيتۋتىندا ۇلكەن عىلىمي كونفەرەنتسيا وتكىزبەكشى.
بەكەن قايرات ۇلى,
«ەگەمەن قازاقستان»
