قاسيەتتى قۇران كىتاپشاسى وتكەن عاسىردىڭ ەلۋىنشى-الپىسىنشى جىلدارى بەلگىلى تاريحشى, ولكەتانۋشى اناتولي پوپوۆتىڭ دوسىنا تيەسىلى بولىپتى. ال اناتولي ءپاۆلوۆيچتىڭ ءوزى كەزىندە جامبىل وبلىستىق تاريحي-ولكەتانۋ مۋزەيىندە قىزمەت اتقارعان ازامات رەتىندە اۋليەاتا وڭىرىنە جاقسى تانىمال. قاسيەتتى قۇران كىتابىن وقۋعا, ۇستاۋعا تىيىم سالىنعان تۇستا دا پوپوۆتىڭ دوسى بۇل كىتاپشانى جاسىرىپ ساقتايدى. كەيىننەن تاعدىردىڭ جازۋىمەن بۇل كىتاپشا اناتولي پوپوۆتىڭ قولىنا تۇسكەن. ال مۋزەي قىزمەتكەرى ءمولدىر قىزداربەكوۆانىڭ ايتۋىنشا, بۇل جادىگەر قورعا 2000 جىلى وتكىزىلگەن. اراب ارىپتەرىمەن جازىلعان قۇندى جادىگەر مۋزەي مىنبەرىن يماندىلىق يىرىمىنە بولەپ تۇر دەۋگە بولادى.
كىتاپشانىڭ كوپتىڭ قىزىعۋشىلىعىن تۋدىرىپ تۇر دەيتىن سەبەبىمىز دە بار. وسى ۋاقىتقا دەيىن شاعىن عانا مەتالل قوراپتا ساقتالىپ كەلگەن كىتاپشانىڭ بيىكتىگى – 2,5, ال ەنى 1,7 سانتيمەتر عانا. بىراق تالاي ۋاقىت بويى ساقتالىپ كەلگەن قىمبات قازىنا ءوڭىر مادەنيەتى ءۇشىن دە ايتۋلى قۇندىلىق بولىپ تۇر. ال كىتاپشا ساقتالعان قوراپشانىڭ ءتۇسى اقشىل-سارى تۇستەس, ال بەتىندە وسىمدىك ءتارىزدى ويۋ-ورنەكتەر بار.
حاميت ەسامان,
«ەگەمەن قازاقستان»
جامبىل وبلىسى
