وسى ماقساتتى العا قويعان وبلىس باسقارماسىنىڭ مامانى نۇرگۇل بەرتىلەۋوۆا ەڭ العاشقى ەڭبەك جولىن اقتوبە قالاسىنداعى №32 مەكتەپ-گيمنازياسىندا مۇعالىم بولىپ باستاعان. ۇستازدىق ەتكەن 9 جىلدا تولاعاي تابىستارعا قول جەتكىزىپ, «ەڭبەك ەرلىككە جەتەلەيدى» دەگەندەي, جەتىستىكتى جىلدارىن ۇستاز بولۋدان باستاعان.
كەزىندە قالالىق, وبلىستىق جىل مۇعالىمى بايقاۋلارىندا باس جۇلدەنى يەمدەنىپ, «قازاقستاننىڭ جىل مۇعالىمى» بايقاۋىندا «ۇلتتىق ءداستۇردى ناسيحاتتاۋشى» اتالىمىنىڭ جەڭىمپازى اتانعان. اقتوبە قالاسى اكىمىنىڭ «جىل ادامى», «ۇزدىك ۇستاز» اتالىمىن يەلەنگەن. ونىڭ اۆتورلىق باعدارلاماسىنىڭ نەگىزىندە اشىلعان «شەبەرلىك-سىنىبى» وبلىس مۇعالىمدەرىنىڭ تاجىريبە الاڭىنا اينالدى.
جاڭاشىلدىققا, وزگە سالادا ءوزىن سىناپ كورۋدەگى ۇمتىلىسى نۇرگۇلدى مەملەكەتتىك قىزمەتكە الىپ كەلدى. بولاشاعىن وسى سالامەن بايلانىستىرۋداعى ماقساتى بيىك. قازىرگى تاڭدا اقتوبە وبلىستىق تىلدەردى دامىتۋ باسقارماسىندا باس مامان بولىپ قىزمەت اتقاراتىن ونىڭ 10 جىلدىق ەڭبەك ءوتىلى بار. ماقساتى – مەملەكەتتىك ءتىلدىڭ وزەكتى ماسەلەلەرىنىڭ ايقىندالۋىنا, تىلدەردى دامىتۋدىڭ تىڭ جوبالارىنىڭ جۇزەگە اسۋىنا ىقپال ەتۋ. قازاقستان رەسپۋبليكاسى ءتىل تۋرالى زاڭى جانە «2011-2020 جىلدارعا ارنالعان تىلدەردى قولدانۋ مەن دامىتۋدىڭ مەملەكەتتىك باعدارلاماسىنىڭ» مۇلتىكسىز ورىندالۋىن قامتاماسىز ەتە وتىرىپ, وبلىستاعى جەتەكشى باسىلىمدار مەن ەلەكتروندى بۇقارالىق اقپارات قۇرالدارىندا مەملەكەتتىك ءتىل ساياساتىن ناسيحاتتاۋ باعىتىنداعى جوبالاردىڭ جۇزەگە اسۋىنا ۇلەسىن قوسۋ.
قازىرگى تاڭدا مەملەكەتتىك ءتىلدى وقىتىپ, مەملەكەتتىك ءتىلدى ءبىلۋ ارقىلى جەتىستىككە جەتكەن تۇلعالاردى, ۇلتتىق قۇندىلىقتاردى ناسيحاتتاپ, PR سيپاتىنداعى ءارتۇرلى فورماتتاعى جەتپىسكە جۋىق جوبانىڭ تۇساۋىن كەسكەن.
ۇشتۇعىرلى ءتىل ساياساتىن ناسيحاتتاۋ, ىلگەرىلەتۋ باعىتىنداعى شارالاردى جۇزەگە اسىرۋدا. حالىققا جاقىن بولۋ, اشىقتىق – مەملەكەتتىك قىزمەتتىڭ ەڭ باستى قاعيداتى. وسى باعىتتا باسقارمانىڭ رەسمي سايتىن, الەۋمەتتىك پاراقشالارىن كونتەنتپەن تولتىرۋدا. بۇلدىرشىندەرگە تىلدەردى ۇيرەتۋدى ماقسات ەتەتىن ءۇش تىلدەگى «كۇنشۋاق» جۋرنالىنىڭ دايىندالىپ شىعۋىنا جەتەكشىلىك ەتىپ, «شەتەلدەگى قازاق دياسپورالارىمەن بايلانىس» جوباسىن, لاتىن گرافيكاسىنا كوشۋدى ناسيحاتتاۋ جونىندەگى شارالاردى جۇزەگە اسىرۋدا. اتالعان جوبالار اقتوبەدە باستاۋ الىپ, رەسپۋبليكانىڭ وزگە دە وڭىرلەرىنە تارالدى.
جالپى, مەملەكەتتىك ءتىل ساياساتى مەملەكەتتىلىكتىڭ نىعايۋىنا, ەلدىڭ قاۋىپسىزدىگىنە تىكەلەي بايلانىستى. ۇلتتىق قۇندىلىقپەن بايلانىستى سالادا ەلدىڭ مۇددەسى مەن ۇلت يگىلىگى جولىندا ەڭبەك ەتەتىنىن ماقتان تۇتادى. بار بويىنداعى قابىلەت-كارىمىن, كۇش-جىگەرىن وسى سالانى دامىتۋعا باعدارلاپ وتىرعان كاسىبي مامانداردىڭ قاتارىندا.
«ويتكەنى, مەنىڭ ىسكەرلىگىمنەن ەلىمنىڭ ەرتەڭى كورىنەدى», دەيدى ن.بەرتىلەۋوۆا.
ءاربىر مەملەكەتتىڭ باسەكەلەستىككە دايىن بولۋى جانە وعان توتەپ بەرۋى مەملەكەتتىك قىزمەتشىلەردىڭ ءبىلىمى مەن بىلىكتىلىگىنە, وتانسۇيگىشتىگىنە بايلانىستى. سول سەبەپتى دە, ءوز قىزمەتىنە ادالدىق پەن بەلسەندى ومىرلىك كوزقاراس, جوعارى جاۋاپكەرشىلىك شىنايىلىقتى ومىرلىك ۇستانىمىنا اينالدىرىپ وتىر. مەملەكەتتىك قىزمەت سالاسىندا ازدى-كوپتى جەتىستىگى بولسا, ول – وبلىس اۋماعىندا تىلدىك دامۋدى سيپاتتايتىن كورسەتكىشتەردىڭ تۇراقتى ءوسۋى. ونىڭ ىشىندە نۇرگۇلدىڭ دە ۇلەسى بار. قازاقستان رەسپۋبليكاسى تاۋەلسىزدىگىنىڭ
25 جىلدىعى قارساڭىندا مەرەكەلىك مەدالمەن ماراپاتتالعانى سونىڭ ءبىر ايعاعى.
ومىردە ادال جار, ءۇش بالانىڭ اناسى. ومىرلىك ۇستانىمىندا, كاسىبىندە العا ۇستايتىن قۇندىلىقتاردان الىس كەتپەيدى. مەملەكەتتىك قىزمەتشى بولۋ – زور سەنىم, قۇرمەت. مەملەكەتتىك قىزمەتشىنىڭ الەۋەتى مىقتى بولسا, ەلدىڭ دە تۇعىرى بيىك. سوندىقتان ەل مۇددەسى جولىنداعى بەلەستە حالىق سەنىمىنەن شىعۋ باستى مىندەتىم دەپ بىلەدى.
تەمىر قۇسايىن,
«ەگەمەن قازاقستان»
اقتوبە وبلىسى
