ۇزىن-سونار كەپتەلەكتەن, كولىكتىڭ شۋىنان شارشاعان قالا حالقىنىڭ كەيدە ءبىر اۋىق تىنىش جەرمەن جاياۋ جۇرگەندى جانى قالاپ-اق تۇراتىنى بار. قازىر الماتىدا تۇرعىندارعا جايلى بولۋ ءۇشىن بۇرىنعى ساياباقتار مەن گۇلزارلار قايتا ارلەنىپ, جانىنا جاياۋ جۇرگىنشى جولدارى سالىنىپ, جاپپاي قايتا ساندەلىپ جاسالىپ جاتىر.
وعان ۆەلوجولدار جارىسا قاتارلاسىپ, بۇعان دەيىن شىنايى كورىنىستەردى قالقالاپ تۇرعان ءتۇرلى قورشاۋلار, قاقپالار, رەتسىز سالىنعان قابىرعا-دۋالدار الىپ تەحنيكانىڭ كۇشىمەن ءسۇرىلىپ تاستالدى. قالانىڭ قاي بۇرىشىنا بارساڭىز دا ءدال وسىنداي ءىس-قيمىل ارەكەتتەردى بايقايسىز. ءبىر سوزبەن ايتقاندا, الماتى بۇگىن قايتا تۇلەۋدە.
قالا اكىمى باۋىرجان بايبەكتىڭ سوڭعى وتكىزگەن كوشپەلى جيىندى شاھارداعى جاياۋ جۇرگىنشى جولدارىنا ارناۋى دا تەكتەن تەك ەمەس. باسقوسۋدان كەيىن بەلگىلى بولعانىنداي, وسى جازدا الماتىدا 16 جاياۋ جۇرگىنشى جولى جاڭادان پايدالانۋعا بەرىلەدى. اتاپ ايتقاندا, قازىردىڭ وزىندە پانفيلوۆ, جىبەك جولى, گوگول, قابانباي باتىر كوشەلەرى مەن استانا الاڭىنىڭ اينالاسىنداعى جۇرگىنشىلەر جولى جاڭاشا سيپاتتا باستان-اياق وزگەردى. قالانىڭ المالى اۋدانىنداعى دۇيسەنوۆ كوشەسىنەن قايدار كوشەسىنە دەيىن, قاراساي باتىر مەن ابىلاي حان داڭعىلىنان ماسانچي كوشەسىنە, ەسەنتاي وزەنىنەن بايتۇرسىنوۆ كوشەسىنە دەيىن ۇزىندىعى 2,5 شاقىرىم جەر تۇگەلدەي قايتا جاڭعىرىپ كوگالداندىرىلادى. بۇرىنعى توزىعى جەتكەن كوشەلەر قالا تۇرعىندارىنىڭ كوز الدىندا جاڭالانىپ, سۇلۋ شاھاردىڭ ءسانىن ودان سايىن كەلتىرىپ, شىرايىن اشا ءتۇستى.
قازىر جاز ايى. كانيكۋل كەلدى. اۋلاداعى بيىل جاڭاشا جاساۋ-سانىمەن تۇرلەنگەن بالالار الاڭدارى ەرتەلى-كەش جاس وسكىننىڭ كۇمىس كۇلكىسىنە شومىلىپ, ابىر-سابىر, دۋ-دۋمان. اينالاعا ءسان بەرگەن قوڭىر سالقىن سۋبۇرقاقتار شاھاردىڭ تىنىسىن اشقاندا, ەرىكسىز «پا, شىركىن!..» دەيسىڭ. الاتاۋدان ۇرعان تاۋ سامالىن ايتساڭشى! جاياۋ جۇرگىڭ-اق كەلىپ تۇرادى...
تالعات ءسۇيىنباي,
«ەگەمەن قازاقستان»
الماتى
