ءىس-شاراعا جوعارعى سوتتىڭ سۋديالارى مەن اپپارات قىزمەتكەرلەرى, ABA ROLI-ءدىڭ سوت جۇيەسى بويىنشا باعدارلاماسىنىڭ ماماندارى مەن قازاقستان رەسپۋبليكاسى پرەزيدەنتىنىڭ جانىنداعى «قوعامدىق كەلىسىم» رمم وكىلدەرى قاتىستى.
كەزدەسۋگە قاتىسۋشىلار مەدياتسيانى قولدانۋدىڭ حالىقارالىق تاجىريبەسىن, سونداي-اق, اتالعان ينستيتۋتتى قازاقستانداعى ودان ءارى دامىتۋ بويىنشا ساراپشىلىق ۇسىنىمداردى تالقىلادى.
كەزدەسۋدى اشا كەلە, ا.قىدىرباەۆا مەدياتسيا ينستيتۋتىنىڭ بۇكىل الەمدە جان-جاقتى دامىپ جاتقاندىعىن اتاپ ءوتتى. «ستاتيستيكاعا سۇيەنسەك, رەسپۋبليكاداعى سوت داۋلارىن شەشۋدە مەدياتسيانى قولدانۋ ۇلەسى ارتىپ كەلەدى, الايدا ءبىزدىڭ كورسەتكىشتەر وزگە ەلدەردىڭ تاجىريبەسىمەن سالىستىرعاندا جەتكىلىكسىز», دەدى ول.
ا.قىدىرباەۆا جوعارعى سوتتىڭ مەدياتسيا ينستيتۋتىنىڭ رەسپۋبليكا كولەمىندە بارىنشا كەڭىنەن تاراتۋعا مۇددەلىلىك تانىتىپ وتىرعاندىعىن جەتكىزدى. وسى ماقساتتا جوعارعى سوت حالىقارالىق سراپشىلارعا جۇگىندى, ولار ءوز كەزەگىندە ABA ROLI باعدارلاماسى بويىنشا قازاقستاننىڭ مەدياتسيا تۋرالى قولدانىستاعى زاڭناماسى, رەسپۋبليكاداعى اتالعان ينستيتۋتتىڭ دامۋ ديناميكاسى, ەۋروپالىق وداق ەلدەرىندەگى مەدياتسيانى قولدانۋدىڭ ءساتتى مودەلدەرىنىڭ ءتۇرلى تاسىلدەرى مەن تەتىكتەرى تۋرالى ساراپتامالىق قورىتىندى ازىرلەدى. جۇرگىزىلگەن تالداۋ شەڭبەرىندە مەدياتسيا جانە داۋلاردى شەشۋدىڭ بالامالى ادىستەرىن دامىتۋ سالاسىنداعى زاڭنامانى جەتىلدىرۋ بويىنشا ۇسىنىمدار بەرىلدى.
قازاقستان رەسپۋبليكاسىنىڭ «مەدياتسيا تۋرالى» زاڭىنا وسى باعىتتاعى نورماتيۆتىك قۇقىقتىق رەتتەۋدىڭ وزىق حالىقارالىق تۇرعىسىنان تالداۋ جۇرگىزىلدى. تالداۋ ەسەبىندە, ساراپشىلاردىڭ پىكىرىنشە, تۇيتكىلدى, تولىق ەمەس, حالىقارالىق ستاندارتتارعا سايكەسپەيتىن, جەتكىلىكتى ۇيلەسپەيتىن وتاندىق نورمالار قاراستىرىلدى. ماسەلەن, ساراپشىلار اتالعان زاڭنىڭ 1-بابىنىڭ 1-تارماعى قىلمىستىق ىستەر بويىنشا مەدياتسيانى سوت تالقىلاۋى بارىسىندا عانا جۇرگىزۋگە مۇمكىندىك بەرەتىندىگىن اتاپ ءوتتى. ساراپشىلار زاڭنىڭ 1-بابىنىڭ 2-تارماعىندا كوزدەلگەن «مەدياتور» ۇعىمىن جەتىلدىرۋ جونىندە ۇسىنىس ءبىلدىردى. سەبەبى, مەدياتسيا جۇرگىزۋ جونىندە ۇسىنىس العان كەز كەلگەن ءۇشىنشى تۇلعا مەدياتور بولا الاتىنداي قۇقىقتىق مۇمكىندىك بەرىلۋى كەرەك. ساراپشىلار 5-باپتىڭ 1-تارماعىندا كوزدەلگەن ەرىكتىلىك قاعيداتىن جۇمسارتۋ قاجەت, سوندا بۇل نورما مەدياتسيانىڭ مىندەتتى نەمەسە كۆازي-مىندەتتى (تاراپتار باس تارتۋ قۇقىعىنا يە بولۋى كوزدەلگەن جاعدايدا) قولدانۋعا مۇمكىندىك بەرەدى دەپ ەسەپتەيدى.
كەزدەسۋدە سويلەگەن سوزىندە حالىقارالىق ساراپشى, سلوۆەنيانىڭ بۇرىنعى ادىلەت ءمينيسترى, داۋلاردى رەتتەۋ جونىندەگى ەۋروپالىق ورتالىقتىڭ پرەزيدەنتى (ECDR) الەش زالار رەسپۋبليكادا مەدياتسيا زاڭ شىعارۋشىلىق ورگاندار, كاسىبي ماماندار جانە جالپى جۇرتشىلىق تاراپىنان ءتيىستى قولداۋعا يە بولا الماعاندىعىن ايتتى. قازاقستاندا مەدياتسيانى دامىتۋدىڭ الەۋەتى زور ەكەندىگىن ايتا كەلە, ا.زالار سوت مەدياتسياسىنىڭ قولدانىستاعى باعدارلامالارىن جاقسارتۋ ءۇشىن بەلگىلى ءبىر تۇزەتۋلەر ەنگىزۋ نەمەسە مەدياتسيا داۋدى شەشۋ ءۇشىن تاراپتارعا نەعۇرلىم ءتيىمدى تاڭداۋ بولا الاتىنداي جاڭا باعدارلامالار قابىلداۋ قاجەتتىگىن العا تارتتى.
كەزدەسۋ سوڭىندا ا.قىدىرباەۆا ABA ROLI ساراپشىلارىنىڭ ماڭىزدى جۇمىسىنا العىس ءبىلدىرىپ, داۋلاردى شەشۋدىڭ بالامالى ادىستەرىن دامىتۋ بويىنشا ولاردىڭ بەرگەن تالدامالىق ۇسىنىمدارى جان-جاقتى زەردەلەنەتىندىگىن اتاپ ءوتتى.
الەكساندر تاسبولاتوۆ,
«ەگەمەن قازاقستان»
