ەكسپو كورمەسى اياسىندا وتكەن تسزيانسۋ پروۆينتسياسى اپتالىعىنىڭ اشىلۋ كۇنىندە قازاقستان مەن تسزيانسۋ ءوڭىرى بيزنەس-قوعامداستىقتارى وكىلدەرىنىڭ قاتىسۋىمەن قازاقستان-قىتاي بيزنەس فورۋمى بولىپ ءوتتى. فورۋم جۇمىسىنا 200-دەن استام دەلەگات قاتىستى. ونىڭ ىشىندە تسزيانسۋ پروۆينتسياسىنىڭ ۆيتسە-گۋبەرناتورى چەن چجەننين, قحر-دىڭ قازاقستانداعى ەلشىسى چجان حانحۋەيا باستاعان قىتايلىق ىسكەر جانە ساياسي توپتاردىڭ وكىلدەرى بار. تسزيانسۋ پروۆينتسياسى قحر-داعى ەكونوميكالىق جانە الەۋمەتتىك دامۋ جاعىنان الدىڭعى قاتاردان كورىنىپ كەلە جاتقان وڭىرلەردىڭ ءبىرى. 2016 جىلى پروۆينتسيانىڭ ءىجو كولەمى 7 608,6 ميلليارد يۋاندى قۇرادى. ەكونوميكا كولەمى جاعىنان پروۆينتسيا ەلدەگى ەكىنشى ورىندى تۇراقتى يەلەنىپ كەلەدى. جان باسىنا شاققانداعى ءىجو كولەمى 95 259 يۋانعا جەتىپ, بۇرناعى جىلدارمەن سالىستىرعاندا 7,5 پايىزعا ارتتى. بۇل پروۆينتسيا قحر-دىڭ ء«بىر بەلدەۋ – ءبىر جول» جوباسىنا بەلسەندى تۇردە قاتىسىپ, كونە جىبەك جولىندا ورنالاسقان ەلدەرگە ينۆەستيتسيا سالۋدا الدىڭعى قاتاردان كورىنۋدە. 2016 جىلى پروۆينتسيا جىبەك جولى بويىندا ورنالاسقان 64 ەلدىڭ 54 ەلىنە ينۆەستيتسيا سالدى. ولاردىڭ قاتارىندا يندونەزيا, سينگاپۋر, كامبودجا, تايلاند جانە پاكىستان بار. پروۆينتسيا سالعان جالپى ينۆەستيتسيا كولەمى 5,7 ميلليارد اقش دوللارىن قۇراپ وتىر.
جاڭعىرمالى ەنەرگەتيكانى دامىتۋ سالاسىندا تسزيانسۋ پروۆينتسياسى ەل كولەمى بويىنشا كوش باستاپ كەلەدى. مۇندا كۇن, جەل جانە سۋ ەنەرگەتيكاسىن دامىتۋ ماقساتىندا جۇيەلى دە كولەمدى جوبالار ءىس جۇزىنە اسىرىلۋدا. ەكسپو-2017 كورمەسى اياسىندا وتكەن بيزنەس-فورۋم بارىسىندا جاڭعىرمالى ەنەرگەتيكانى ودان ءارى دامىتۋ ماسەلەلەرى جان-جاقتى ءسوز بولدى. فورۋم جۇمىسىندا ءسوز سويلەگەن تسزيانسۋ ۆيتسە-گۋبەرناتورى چەن چجەننين قىتايلىق ء«بىر بەلدەۋ – ءبىر جول» ستراتەگياسى مەن قازاقستاندىق «نۇرلى جول» مەملەكەتتىك باعدارلاماسى يدەيالارىنىڭ سەرپىندى دامۋىنا استاناداعى ەكسپو-2017 كورمەسىنىڭ با-لاماسىز الاڭ بولىپ وتىرعاندىعىن اتاپ كورسەتتى. ءوز كەزەگىندە وسى فورۋمدى ۇيىمداستىرۋشىلاردىڭ ءبىرى, قازاقستان ينۆەستيتسيالىق ىنتىماقتاستىق اگەنتتىگىنىڭ باس ديرەكتورى ايدىن بايەدىلوۆ جانە قازاقستان پارلامەنتى ءماجىلىسىنىڭ دەپۋتاتى باقتيار ماكەن ەكى ەل كاسىپكەرلەرىنىڭ اراسىنداعى وسى ىنتىماقتاستىق بايلانىستىڭ ەكونوميكاعا ۇلكەن تيىمدىلىك اكەلەتىندىگىن تىلگە تيەك ەتتى.
قىتاي پاۆيلونىنداعى تسزيانسۋ پروۆينتسياسى اپتالىعىنىڭ اشىلۋىنا بايلانىستى وتكەن سالتاناتتى جيىن سول وڭىردەن ارنايى كەلگەن ونەر شەبەرلەرىنىڭ كونتسەرتىنە ۇلاستى.
جىلقىباي جاعىپار ۇلى,
«ەگەمەن قازاقستان»
سۋرەتتەردى تۇسىرگەن
ورىنباي بالمۇرات,
«ەگەمەن قازاقستان»
