فينليانديانىڭ ۇلتتىق كۇنىنە ارنالعان سالتاناتتى مەرەكە ەكى ەلدىڭ ءانۇراندارىن ورىنداۋمەن اشىلدى. سودان كەيىن ساحناعا ەلىمىزدىڭ ەنەرگەتيكا ءمينيسترى قانات بوزىمباەۆ شىعىپ, قۇتتىقتاۋ ءسوز سويلەدى. «فينليانديا – جاسىل تەحنولوگيا جونىندە الەمدە كوش باستاپ كەلە جاتقان ەلدەردىڭ ءبىرى. تازا ەنەرگيا سالاسىنداعى سىزدەردىڭ قول جەتكىزگەن جاڭا تەحنولوگيالارىڭىز ۇلگى تۇتۋعا تۇرادى. فينليانديا ساياسي-الەۋمەتتىك تۇرعىدان بەرىك تۇراقتىلىعىمەن ۇلگى كورسەتىپ, ەۋروپالىق وداق ەلدەرى ىشىندە حالىقتىڭ تۇرمىس دەڭگەيىنىڭ جوعارىلىعىمەن تانىلىپ وتىر. ءبىزدىڭ ەلىمىزدە ءوتىپ جاتقان ەكسپو-2017 كورمەسىنە قاتىسۋعا العاشقىلاردىڭ ءبىرى بولىپ نيەت بىلدىرگەن فينليانديا رەسپۋبليكاسىنا ءبىز ءاردايىم قۇرمەتپەن قارايمىز. كورمە اياسىنداعى سىزدەردىڭ ۇلتتىق كۇندەرىڭىز رەسپۋبليكانىڭ تاۋەلسىزدىك العانىنا 100 جىل تولۋىمەن تۇسپا-تۇس كەلۋىندە دە سيمۆوليكالىق ءمان بار. فينليانديا قازاقستاننىڭ تاۋەلسىزدىگىن تانىعان العاشقى مەملەكەتتەردىڭ ءبىرى رەتىندە جەدەل ىنتىماقتاستىق بايلانىستار ورناتتى. سالىستىرمالى تۇردە قىسقا ۋاقىت ىشىندە ەكى ەل اراسىنداعى ديپلوماتيالىق, ەكونوميكالىق, الەۋمەتتىك, ىنتىماقتاستىق بايلانىستار ەڭ جوعارى ساپالىق دەڭگەيگە شىقتى. جاڭعىرمالى ەنەرگەتيكا سالاسىندا قازاقستاننىڭ بىرقاتار كاسىپورىندارى فينليانديا تەحنولوگياسى بويىنشا جۇمىس ىستەيدى. الداعى ۋاقىتتا بۇل باعىتتاعى ىنتىماقتاستىق بايلانىسىمىز كەڭي تۇسپەك», دەدى ءوز سوزىندە قانات بوزىمباەۆ.
فينليانديا رەسپۋبليكاسىنىڭ پرەزيدەنتى ساۋلي نينيستيو قازاقستاندىقتاردى ورتالىق ازيادا تۇڭعىش رەت ەكسپو كورمەسىن وتكىزىپ وتىرعان بيىك بەدەلدەرىمەن قۇتتىقتادى. مۇنداي جاھاندىق جاۋاپكەرشىلىكتى كەز كەلگەن مەملەكەتتىڭ اتقارا المايتىندىعىن ايتا كەلىپ, ول ەكسپو-2017 كورمەسىن وتكىزۋدىڭ جوعارى دارەجەدە ۇيىمداستىرىلعاندىعىن اتاپ كورسەتتى. ودان ءارى ساۋلي نينيستيو ەكى ەل اراسىنداعى شىنايى دوستىق ىنتىماقتاستىقتى تىلگە تيەك ەتىپ, قازاقستان ورتالىق ازيا ەلدەرى ىشىندە فينليانديانىڭ ەڭ باستى ساۋدا سەرىكتەسى ەكەندىگىن ايتتى.
«بيىل ءبىز ءوز ەلىمىزدىڭ تاۋەلسىزدىك العانىنا 100 جىل تولعان تورقالى تويىن تويلايمىز. بۇگىندە فينليانديا ءوزىنىڭ ەكونوميكالىق, الەۋمەتتىك الەۋەتى جاعىنان, ساياسي تۇراقتىلىعى جاعىنان ەۋروپادا كوش باستاپ وتىرعان ەلدەردىڭ ءبىرى. ءبىزدىڭ حالقىمىزدىڭ ساپالى دا جوعارى تۇرمىس جاعدايى الەمگە ايگىلى. فينليانديا مەن قازاقستان رەسپۋبليكاسىنىڭ اراسىندا ديپلوماتيالىق بايلانىستار ورناعانىنا شيرەك عاسىردان استى. وسى ۋاقىت ىشىندە ءبىز تاۋەلسىز قازاقستاننىڭ زور جەتىستىكتەرىنە ءتانتى بولىپ كەلەمىز. بۇگىندە قازاقستان بۇۇ قاۋىپسىزدىك كەڭەسىنىڭ تۇراقتى ەمەس مۇشەسى رەتىندە ادامزات بولاشاعىنىڭ شەشۋشى ماسەلەلەرىنە قاتىستى ءبىرشاما يگى باستامالارعا ۇيىتقى بولىپ وتىر. سيرياداعى الاڭداتارلىق جاعدايلارعا بايلانىستى ارااعايىندىق تانىتىپ, قارسىلاس جاقتاردىڭ كەلىسسوز جۇرگىزۋىنە استانا الاڭىن بەرۋدىڭ ءوزى قازاقستاننىڭ بەيبىتسۇيگىش ساياساتىنىڭ قانشالىقتى جوعارى ەكەندىگىن كورسەتەدى. وسىنداي يگى باستامالاردىڭ ۇيىتقىسى بولىپ وتىرعان پرەزيدەنت نۇرسۇلتان نازارباەۆتىڭ حالىقارالىق دارەجەدەگى بەدەلىنىڭ ەرەكشە زور ەكەندىگىنە ءتانتى بولامىز. استاناداعى ەكسپو-2017 كورمەسىنە فينليانديانىڭ ءىرى دە تانىمال 72 كومپانياسى قاتىسۋدا. ولار جاڭعىرمالى ەنەرگەتيكا سالاسىن دامىتۋ ماقساتىنداعى قول جەتكەن جەتىستىكتەرىن وسى كورمەدە پاش ەتەدى. فينليانديا ءبىلىم بەرۋدىڭ الەمدەگى ەڭ وزىق ۇلگىسىن جاسادى. وسى كورمە اياسىندا ءبىز بۇل سالاداعى جەتىستىكتەرىمىزبەن دە بولىسەمىز», دەدى فينليانديا رەسپۋبليكاسىنىڭ پرەزيدەنتى ۇلتتىق كۇننىڭ اشىلۋ سالتاناتىندا.
فينليانديا رەسپۋبليكاسىنىڭ ۇلتتىق كۇنىنىڭ اشىلۋىنا ورايلاس وتكەن سالتاناتتى جيىن فينليانديادان ارنايى كەلگەن ونەر شەبەرلەرىنىڭ كونتسەرتىنە ۇلاستى. سودان كەيىن ساحناعا فينليانديا ەلىندەگى ەڭ بەلگىلى ادام لاپلانديادان كەلگەن سانتا-كلاۋس شىقتى. فينليانديا حالقى يوۋلۋپۋككي دەپ اتايتىن سانتا-كلاۋس ەكسپو-2017 كورمەسىنە ارنايى ات باسىن تىرەپ, ءۇش كۇن بويى فيندەردىڭ پاۆيلونىنا كەلگەن قوناقتاردى قۇرمەتپەن قارسى الاتىن بولادى. سانتا-كلاۋستىڭ بۇگىنگى قۇرمەتتى قوناقتارى ەكسپو-2017 حالىقارالىق مامانداندىرىلعان كورمەسىنە ارنايى كەلگەن قازاقستان جانە فينليانديا رەسپۋبليكالارىنىڭ پرەزيدەنتتەرى بولدى.
اسحات رايقۇل,
"ەگەمەن قازاقستان"
