ساتىپ الۋلار سالاسى جەتىلدىرىلەدى
مەملەكەتتىك ساتىپ الۋلار جۇيەسىن جەتىلدىرۋ شارالارى تۋرالى قارجى ءمينيسترى باقىت سۇلتانوۆ باياندادى. مينيستر ءبىر جارىم جىل بۇرىن ىسكە قوسىلعان مەملەكەتتىك ساتىپ الۋلار ۆەب-پورتالىنىڭ پلاتفورماسى ساتىپ الۋلار جۇيەسىن تولىعىمەن اۆتوماتتاندىرىپ, قاتىسۋشىلاردى ۆەب-پورتال ارقىلى ونلاين رەجىمدە ەلەكتروندى كامەرالىق باقىلاۋعا مۇمكىندىك بەرگەنىن ايتىپ ءوتتى. جالپى, قابىلدانعان شارالار ءبىر كونكۋرستاعى قاتىسۋشىلاردىڭ ورتاشا سانىن 4 ەسەگە, ال ۇنەمدەۋدى 3 ەسەگە ۇلعايتۋعا مۇمكىندىك بەرگەن.
قارجى مينيسترلىگى ينۆەستيتسيالار جانە دامۋ مينيسترلىگىمەن جانە «اتامەكەن» ۇكپ-مەن بىرلەسىپ, وتاندىق وندىرۋشىلەرگە قولداۋ كورسەتۋ شارالارىن ازىرلەگەن, سولاردىڭ ىشىندە بىرىڭعاي ۇيىمداستىرۋشى ارقىلى ساتىپ الىناتىن تاۋارلاردىڭ, جۇمىستاردىڭ, قىزمەتتەردىڭ تىزىمدەمەسى ۇلعايتىلعان. سونىمەن قاتار, ۇساق ساتىپ الۋلاردى ءبىر ۇلكەن لوتقا بىرىكتىرۋ جوسپارلانعان.
ب.سۇلتانوۆتىڭ ايتۋىنشا, كۆازيمەملەكەتتىك سەكتوردىڭ ساتىپ الۋلارىن زاڭنامالىق رەتتەۋدى قاراستىراتىن زاڭ جوباسى ازىرلەنىپ جاتىر. مينيسترلىكتە كۆازيمەملەكەتتىك سەكتوردىڭ بارلىق سۋبەكتىلەرىنە بىرىڭعاي ساتىپ الۋلار ەرەجەسىن بەكىتۋ بويىنشا ۋاكىلەتتى ورگانداردى انىقتاۋ جوسپارلانعان, سولاردىڭ ىشىندە «سامۇرىق-قازىنا», «بايتەرەك», «قازاگرو» ۇلتتىق حولدينگتەرى بار. ۇلتتىق كومپانيالاردىڭ ساتىپ الۋلارى ءۇشىن جەكە ەرەجەلەر ازىرلەنبەك, ولار مەملەكەتتىك ساتىپ الۋلارعا قاراعاندا بارىنشا يكەمدى بولادى.
ماسەلەنى تالقىلاۋ قورىتىندىسىندا ۇكىمەت باسشىسى ب.ساعىنتاەۆ مەملەكەتتىك ساتىپ الۋلار جانە كۆازيمەملەكەتتىك سەكتوردىڭ ساتىپ الۋلارى سالاسىن جەتىلدىرۋ بويىنشا زاڭ جوباسىنا قاتىستى جۇمىستى ۋاقىتىندا اياقتاۋدى تاپسىردى.
«جالپى, وسى جەردە ايتىلعان بارلىق ۇسىنىستاردى قولدايمىز. تالقىلاپ, پرەزيدەنت اكىمشىلىگىمەن كەلىسۋ ءۇشىن ءبىر اپتا ۋاقىتىمىز بار. كەلەسى جولى داۋىس بەرەتىن بولامىز جانە ماۋسىم ايىنىڭ سوڭىنا دەيىنگى بەلگىلەنگەن مەرزىمدە زاڭ جوباسىن ماجىلىسكە ەنگىزۋگە ءتيىسپىز. جۇرگىزىلىپ جاتقان جۇمىستاردى جالعاستىرامىز», دەدى ب.ساعىنتاەۆ.
دەنساۋلىق ساقتاۋدىڭ ينفراقۇرىلىمى داميدى
ۇكىمەت وتىرىسىندا قارالعان كەلەسى ماسەلە – دەنساۋلىق ساقتاۋ جۇيەسىنىڭ ينفراقۇرىلىمىن دامىتۋ جايى.
دەنساۋلىق ساقتاۋ ءمينيسترى ەلجان ءبىرتانوۆتىڭ مالىمەتى بويىنشا, 2016-2019 جىلدارعا ارنالعان «دەنساۋلىق» مەملەكەتتىك باعدارلاماسى اياسىندا دەنساۋلىق ساقتاۋ مينيسترلىگى «دەنساۋلىق ساقتاۋ ينفراقۇرىلىمىن دامىتۋدىڭ بىرىڭعاي پەرسپەكتيۆالىق جوسپارىن» ازىرلەپ جاتىر.
مەديتسينالىق ۇيىمداردىڭ جەلىسى «دەنساۋلىق ساقتاۋ ينفراقۇرىلىمىن دامىتۋدىڭ بىرىڭعاي پەرسپەكتيۆالىق جوسپارى» نەگىزىندە جۇيەلەنەدى. وندا العاشقى مەديتسينالىق كومەكتىڭ قولجەتىمدىلىگىن ارتتىرۋ, ينفراقۇرىلىمدى جاڭعىرتۋ, مەديتسينالىق ۇيىمداردىڭ مەنەدجمەنتىن جاقسارتۋ, ينۆەستيتسيالار تارتۋ جانە جەكە سەكتوردىڭ ۇلەسىن ۇلعايتۋ, دەنساۋلىق ساقتاۋ جۇيەسىنىڭ ساپاسى مەن ەكونوميكالىق تيىمدىلىگىن ارتتىرۋ كوزدەلگەن.
ە.ءبىرتانوۆتىڭ ايتۋىنشا, ەلىمىزدە ءبىر جەردە اۋرۋxانادا ناۋقاستارعا ورىن جەتپەي جاتسا, كەلەسى مەكەنجايدا, كەرىسىنشە, ەمxاناداعى بوس ورىندار تىم كوپ بولىپ كەتكەن. بۇل دەنساۋلىق ساقتاۋ سالاسىنىڭ ينفراقۇرىلىمىن دۇرىس جوسپارلاماۋدىڭ كورىنىسى, دەيدى مينيستر. بۇگىنگى تاڭدا دەنساۋلىق ساقتاۋ سالاسىنىڭ ينفراقۇرىلىمىن دامىتۋدىڭ بىرىڭعاي جوسپارى دايىندالىپ جاتىر.
«قازاقستاندا 7914 دەنساۋلىق ساقتاۋ مەكەمەسى بار. سونىڭ ىشىندە 85,5 پايىزى مەملەكەتتىك ەمxانالار بولسا, 14,5 پايىزى جەكە مەنشىككە تيەسىلى. مەديتسينالىق ۇيىمداردىڭ تەڭ جارتىسى 30 جىل بۇرىن سالىنعان. وتكەن جىلى 11 مىڭعا جۋىق ادام اۋرۋxاناعا جاتقىزۋدى 90 كۇننەن استام ۋاقىت كۇتكەن. الايدا, رەسپۋبليكا بويىنشا 4,2 مىڭ جاتىن ورىن بوس تۇردى. وسىنىڭ ءوزى دۇرىس جوسپار قۇرماۋدىڭ دالەلى», دەدى ە. ءبىرتانوۆ.
ءمينيستردىڭ مالىمدەۋىنشە, قازىرگى كەزدە جەرگىلىكتى اتقارۋشى ورگاندار مەديتسينا سالاسىن دامىتۋعا 1 ترلن تەڭگە سۇراپ وتىر. دەگەنمەن, قۇرىلىس نىساندارىن جوسپارلاۋ كەزىندە ولاردىڭ بيۋدجەت اقشاسىن كوپتەپ الۋعا دا تالپىناتىندارى جوق ەمەس. ماسەلەن, استانادا بالالارعا ارنالعان ينفەكتسيالىق ەمxانادا ءبىر جاتىن ورىنعا 240 شارشى مەتر قاراستىرىلعان. ونداي كورسەتكىش xالىقارالىق تالاپتاردان ەكى ەسە ارتىق, ال رەسپۋبليكا بويىنشا سالىناتىن نىسانداردىڭ كورسەتكىشىنەن التى ەسە جوعارى بولىپ تۇر. وسىلايشا, ءبىر جاتىن ورىنعا بيۋدجەتتىڭ ءبىراز اقشاسى كەتىپ جاتادى.
«امبۋلاتورلىق مەكەمەنى سالۋ كەزىندە ناقتى قاجەتتىلىك, ياعني جەرگىلىكتى xالىقتىڭ سانى ەسكەرىلمەيدى. وسىنىڭ سالدارىنان جاتىن ورىندار بوس تۇرادى. جەرگىلىكتى اتقارۋشى ورگاندار بيۋدجەت قاراجاتىن ءتيىمدى جۇمساۋعا جاۋاپسىز قارايدى. سوندىقتان بىزگە دەنساۋلىق ساقتاۋدىڭ ينفراقۇرىلىمىن دامىتۋدىڭ بىرىڭعاي جوسپارى اسا قاجەت», دەدى مينيستر.
وتىرىستا, سونداي-اق, دۇنيەجۇزىلىك بانكتىڭ قازاقستانداعى تۇراقتى وكىلى ا.براۋن, ازيا دامۋ بانكىنىڭ قازاقستانداعى وكىلدىگىنىڭ ديرەكتورى دج. كاپاننەللي, سونداي-اق الماتى وبلىسىنىڭ اكىمى ا.باتالوۆ اتالعان باعىت بويىنشا اتقارىلىپ جاتقان جۇمىستار تۋرالى باياندادى.
پرەمەر-مينيستر ب.ساعىنتاەۆ دەنساۋلىق ساقتاۋ مينيسترلىگىنە وبلىستاردىڭ, استانا مەن الماتى قالالارىنىڭ اكىمدەرىمەن دەنساۋلىق ساقتاۋ نىساندارىنىڭ جەلىسىن جوسپارلاۋ جۇمىستارىن قوسىمشا پىسىقتاپ, مۇندايدا وڭىرلەردىڭ ەرەكشەلىكتەرىن, حالىق سانىن, اۋرۋ-سىرقاۋلار قۇرىلىمى مەن سالانى دامىتۋدىڭ باسىمدىقتارىن ەسكەرۋدى تاپسىردى. ۆەدومستۆوعا ۋاكىلەتتى مەملەكەتتىك ورگاندارمەن بىرلەسىپ جەكە مەديتسينانى دامىتۋ بويىنشا جۇمىستاردى جانداندىرۋ, مەديتسينالىق مەكەمەلەردىڭ قۇرىلىس جۇمىستارىنا قاتىستى سانيتارلىق نورمالار مەن ەرەجەلەردى جەڭىلدەتۋ, دەنساۋلىق ساقتاۋ سالاسىن رەتتەۋ شارالارىن قابىلداۋ, مەديتسينالىق ينفراقۇرىلىمدى جاڭعىرتۋ اياسىندا دەنساۋلىق ساقتاۋ نىساندارىنىڭ قۇرىلىسىنا ارنالعان تيپتىك جوبالاردى قۇرۋ ماسەلەلەرىن پىسىقتاۋ تاپسىرىلدى.
دينارا بىتىكوۆا,
«ەگەمەن قازاقستان»
