فيندەر «الەمدەگى ەڭ جاسىل ەل – ءبىزدىڭ مەملەكەت» دەپ ماقتانىشپەن ايتادى. ونى مويىنداماسقا بولمايدى. ەل اۋماعىنىڭ 70%-ىن ورمان القاپتارى الىپ جاتىر. سوندىقتان اۋقىمدى پاۆيلوننىڭ اعاشتان سالىنۋى زاڭدىلىق. بىلەتىندەردىڭ ايتۋىنشا, قۇرىلىسقا 600 توننا قاراعاي پايدالانىلعان. تاعى ءبىر ەرەكشەلىك, قابىرعالارى ارنايى بوياۋمەن سىرلانىپ, مۇكپەن كومكەرىلگەن. ونىڭ دا وزىندىك سەبەبى بار. مۇك اۋانى تازارتىپ, وتتەگىمەن قورەكتەندىرەدى ەكەن.
ال ەندى پاۆيلونعا كەلەتىن بولساق, ول ءتورت اۋماققا بولىنگەن. تازا ەنەرگيا, تازا سۋ, اقىلدى قالا جانە بىلىكتى ءبىلىم بەرۋ دەگەن اتاۋعا يە, ارقايسىسى جەكە-جەكە تاقىرىپتاردى كوتەرەدى. جالپى فينليانديا – جاڭارتىلعان ەنەرگيا كوزدەرىن قولدانۋدا ەۋروپادا كوشباسشى ەلدەردىڭ ءبىرى. سوندىقتان جۇرتتى تاڭقالدىراتىنداي, قىزىقتىراتىنداي دۇنيەلەرى از ەمەس. اسىرەسە اقىلدى قالا اتاعىنا يە وۋلۋ قالاسىنىڭ تاجىريبەسى كوپشىلىكتى قىزىقتىرارى انىق.
پاۆيلوننىڭ اشىلۋ سالتاناتىندا فيندەر جاسىل ەكونوميكاداعى جەتىستىكتەرىمەن عانا ەمەس, ۇلتتىق ءداستۇر, مادەنيەتىن دە بارىنشا كورسەتىپ باقتى. كورمە قوناقتارى لاپلانديا ەلدى مەكەنىنەن كەلگەن سانتا-كلاۋسپەن كەزدەسۋ مۇمكىندىگىنە يە بولدى. سونداي-اق فينليانديانىڭ تانىمال ونەر جۇلدىزدارىنىڭ ونەرىن تامشالادى.
