كەڭەس وتىرىسىن پارتيا وبلىستىق فيليالى توراعاسىنىڭ ءبىرىنشى ورىنباسارى, «ميراس» ايماقتىق كەڭەسىنىڭ توراعاسى مۇراتحان شۇكەەۆ ءسوز سويلەپ اشىپ, جۇرگىزىپ وتىردى.
وبلىستىق ىشكى ساياسات باسقارماسىنىڭ باسشىسى راحيا تۇرماحانبەتوۆا ەلباسى ماقالاسىندا ايتىلعان رۋحاني جاڭعىرۋدىڭ نەگىزىنە توقتالدى. سونىمەن قاتار, باسقارما باسشىسى باعدارلامالىق ماقالانىڭ قازاقستاندىق ءپاتريوتيزمدى قالىپتاستىرۋدا دا ايقىن ماڭىزعا يە ەكەنىن اتاپ ءوتتى. سونداي-اق, ەلباسى ماقالاسىندا ايتىلعان «قازاقستاننىڭ 100 جاڭا تۇلعاسى» يدەياسىنا دا جامبىل وڭىرىنەن شىققان ازاماتتار ۇلەس قوسۋ كەرەكتىگىن جەتكىزدى.
ال «قازاقستان» تەلەراديوكورپوراتسياسى» اكتسيونەرلىك قوعامى» وبلىستىق فيليالىنىڭ ديرەكتورى مەيرامبەك تولەپبەرگەن ەلباسى ماقالاسىندا ايتىلعان «تۋعان جەر» باعدارلاماسى جانە «كيەلى جەر» جوباسى بويىنشا ءوز ويىن ورتاعا سالدى. نەگىزى رۋحاني جاڭعىرۋ دەپ ماقالانىڭ اتى ايتىپ تۇرعانداي, بۇگىنگى تاڭدا رۋحاني جاڭعىرۋ باستى مىندەت بولىپ وتىر. سوندىقتان دا ۇلتتىق رۋح, ۇلتتىق سانانى كىتاپ وقۋ ارقىلى قالىپتاستىرۋعا بولادى. وسى تۇرعىدا ويىن ساباقتاعان ول بۇدان وزگە دە ماسەلەلەردى العا تارتتى. سونىمەن قاتار, مەيرامبەك مىلتىقباي ۇلى وبلىستا تۇراتىن اقىن-جازۋشىلاردىڭ كىتاپتارىن شىعارۋ جانە ولاردى ناسيحاتتاۋ كەرەكتىگىنە دە توقتالدى. سونداي-اق, كىتاپ جارمەڭكەسىن ۇيىمداستىرىپ, جاستارعا كوبىرەك قولداۋ كورسەتۋ كەرەك دەگەن ويىن دا ايتتى.
ۇلتتىڭ ارعى-بەرگى تاريحىنداعى ەرەكشەلىكتەرى جونىندە اڭگىمەلەگەن جازۋشى-دراماتۋرگ ەلەن ءالىمجان دۇنيەجۇزىنىڭ رۋحاني تاجىريبەسىنەن مىسال كەلتىرە وتىرىپ, ويىن جەتكىزدى. بۇگىنگى تاڭدا ەلباسى ماقالاسىندا ايتىلعان دۇنيەلەردى يگەرىپ الۋدىڭ ءوزى ۇلتتى, مەملەكەتتى ەداۋىر دامىتاتىنىن ايتتى. جالپى, ەلباسى ماقالاسى سان-سالالى. الايدا, باعدارلامالىق ماقالادا ايتىلعان نەگىزگى وي, يدەيا – قازاق حالقىنىڭ رۋحاني جاڭعىرۋى. بۇل تۇرعىدا لاتىن الىپبيىنە كوشۋدىڭ دە ماڭىزدىلىعى وراسان. فيلولوگيا عىلىمدارىنىڭ دوكتورى, پروفەسسور سامەن قۇلباراق لاتىن الىپبيىنە كوشۋ تۋرالى پىكىرىن ەلباسى ماقالاسىندا ايتىلعان نەگىزگى ويلارمەن دالەلدەدى.
بۇدان كەيىن ايماقتىق كەڭەس مۇشەلەرىنىڭ پىكىرلەرى تىڭدالىپ, ۇسىنىستارى قابىلداندى. جيىن سوڭىندا مۇراتحان ءجۇنىسالى ۇلى ايتىلعان ۇسىنىستاردىڭ قابىلداناتىنىن, كەڭەس مۇشەلەرىنىڭ تاعى دا قانداي يدەيالارى بولسا دا تىڭداۋعا ءازىر ەكەنىن جەتكىزدى.
حاميت ەسامان,
«ەگەمەن قازاقستان»
