ەندى 18 جاستان اسقان كەز كەلگەن قالا تۇرعىنى تەگىن وقىتۋ كۋرستارىنا تىركەلە الادى. جوبا ۇيىمداستىرۋشىسى مارتا حايداروۆانىڭ ايتۋىنشا, بۇگىنگە دەيىن 300-دەن استام ادام كۋرسقا قاتىسقان. ولاردىڭ 80 پايىزى – جۇمىسسىزدار.
«العاشىندا قالالىق جۇمىسپەن قامتۋ بولىمىندە تىركەلگەن جۇمىسسىزداردى وقىتا باستادىق. بىراق كەيىن تىركەلمەگەن, ۋاقىتشا جۇمىسسىز تۇرعىندار دا حابارلاسقاسىن, جالپىعا ورتاق كۋرستار اشقاندى ءجون كوردىك. بيىل جىل بويىنا ءبىر مىڭعا جۋىق ادامعا اعىلشىن ءتىلىن ۇيرەتكىمىز كەلەدى», - دەيدى مارتا حايداروۆا.
كۋرس ءتورت ايعا جوسپارلانعان. وسى ۋاقىت ىشىندە قاتىسۋشىلار ارىپتەن باستاپ اۋىزەكى تىلدە ەركىن سويلەۋدى مەڭگەرەدى. ال ولارعا وبلىس ورتالىعىنداعى جوعارى وقۋ ورىندارى مەن كوللەدجدەردىڭ تاجىريبەلى وقىتۋشىلارى ءدارىس بەرەدى.
باقىتگۇل باباش,
«ەگەمەن قازاقستان»
