ء تىرى جەتىمدەر سانىن ازايتۋ, ءومىردىڭ قىسىلتاياڭ كەزەڭىنە تاپ بولعان جاس جانە جالعىزباستى انالارعا كومەكتەسۋ ماقساتىندا ۇسىنىلعان جوبا ناتيجەسىن بەردى. ەلىمىزدىڭ وسىنداي باسپانالارعا زارۋلىگى بولار, العاشقى «انالار ءۇيى» ءبىر ايدا تولدى. بۇل جوبا 2015 جىلى ەلىمىز بويىنشا تاستاندى بالالار سانىن 51 پايىزعا قىسقارتسا, 2016 جىلى 70 پايىزعا تومەندەتكەن ەكەن. بۇگىندە ەلىمىزدە 26 «انالار ءۇيى» بار. شىعىس وڭىرىندە اشىلعان قوس «انالار ءۇيى» سەمەي مەن وسكەمەن قالالارىندا ورنالاسقان. وبلىس ورتالىعىنداعى «انالار ءۇيى» كۇلەنوۆ ىقشام اۋدانىندا 2014 جىلدىڭ ءساۋىر ايىندا اشىلدى.
بۇل ءۇي جايلى العاش ەستىگەنىمىزدە كوز الدىمىزعا ەمحانا ىسپەتتى مەكەمە ەلەستەگەن ەدى. الايدا, ۇيگە كىرىپ كەلگەندە تاڭدانىپ قالدىق. قاتارداعى وتباسىلىق باسپانالاردان ارتىق بولماسا كەمدىگى جوق. قايىرىمدى كاسىپكەرلەرىمىزدىڭ قولداۋىمەن جۇمىس ىستەپ تۇرعان كەڭ ساراي قوعامدىق-الەۋمەتتىك مەكەمەلەردىڭ بىرىنە دە ۇقسامايدى. قۇددى, ءۇبىرلى-ءشۇبىرلى ۇلكەن وتباسىعا كەلگەندەي اسەردە قالدىق. ەسىكتەن كىرە بەرگەندە الدىمىزدان جۇگىرىپ شىقان ءبۇلدىرشىن «انالار ءۇيىنىڭ» ۇيلەستىرۋشىسى نايليا وڭعارباەۆانى قۇشاقتاي الدى. ۇيدەگى انالار ءوز شارۋاسىمەن اينالىسىپ جاتىر ەكەن. ءبىرى بولمەسىن رەتتەپ جاتسا, ەكىنشىسى اس ءۇي قامىمەن ءجۇر. قوناقتاردىڭ كەلگەنىنە قۋانعان سابيلەر ەركەلەپ, قاسىمىزدان شىعار ەمەس. بارلىعى بۇل شاڭىراقتاعى جىلىلىقتىڭ لەبىن سەزدىرىپ-اق تۇر.
– «انالار ءۇيى» جايلى كوبىرەك ادام بىلگەندىگىن قالايمىن. ويتكەنى پسيحولوگيالىق جانە ماتەريالدىق قولداۋ كورسەتىلەتىن ءۇيدىڭ بار ەكەندىگىن تۇرعىندار بىلسە, تاستاندى بالالار مەن تۇسىك جاساتۋعا باراتىن قىزداردىڭ سانى ازايار ەدى, دەگەن نايليا وڭعارباەۆا ارنايى ءۇي-جايدى تانىستىرىپ ءوتتى.
ونىڭ ايتۋىنشا, قىزدار مۇندا ءبىر جارىم جىل بويى تەگىن تۇرا الادى. بۇل ۇيدە انالار مەن بالالارعا قاجەتتىنىڭ ءبارى بار. بالانىڭ ويىنشىعىنان باستاپ, كىر جۋعىش ماشينە, توڭازىتقىش, تەلەديدار سەكىلدى تۇرمىستىق جابدىقتارمەن قامتىلعان. ال جالعىزباستى انالار مەملەكەتتەن بەرىلەتىن جاردەماقىلارىن ۇستاماي, جيناپ, قور قىلىپ ساقتاپ قويا الادى. سونداي-اق, رەسپۋبليكا بويىنشا «انالار ءۇيى» جالعىزباستى انالاردى ارنايى كۋرستاردان وتكىزىپ, ولاردىڭ سەرتيفيكات الۋ مۇمكىندىكتەرىن ۇيىمداستىرىپ جاتىر. مىسالى, كاسىبي ءبىلىمى جوق جاس انالار شاشتارازشىلار كۋرسىنان ءوتىپ, سەرتيفيكاتتارىن العان سوڭ, كەز-كەلگەن سۇلۋلىق سالونىندا جۇمىس ىستەي الادى.
– وقىعان كۋرسى بويىنشا جۇمىس ىستەمەسە دە, بىلگەندەرى ارتىق ەتپەيدى عوي, دەيدى ۇيلەستىرۋشى, ال بيىلعى باستى جاڭالىعىمىز – كاسىپكەرلەردىڭ ۇيىمىزگە كاسىبي تىگىن ماشينالارىن ساتىپ الىپ بەرگەندىكتەرى. ەندى انالار تىگىن تىگۋ ونەرىن كاسىبي دەڭگەيدە مەڭگەرمەك. بۇل دا قىزدارعا كەرەك ونەر.
انالار ءۇيى اۋرۋحانا, ەمحانالارمەن تىعىز قارىم-قاتىناس ورناتقان. ن.وڭعارباەۆا تۇسىك جاساتۋعا نەمەسە بالالارىن جەتىمدەر ۇيىنە وتكىزۋگە بەل بۋعان انالار بار ەكەنىن بىلسە, بىردەن سول ەمحاناعا جول تارتىپ, ولاردى رايىنان قايتارۋعا تىرىسادى ەكەن. اتا-انالارىنا جاعدايىن قالاي ءتۇسىندىرۋدى بىلمەي وتىرعان قىزداردىڭ جاقىندارىنان قولداۋ تابۋىنا دا جاردەمدەسىپتى. «كوپ جاعدايدا قىزدارعا جاي عانا ءتۇسىندىرىپ ايتۋ نەمەسە قولداپ, جىگەرلەندىرەتىن اڭگىمەلەسۋ عانا جەتىسپەيدى» دەيدى ول.
«انا ءۇيى» جايلى ەلدەن ەستىپ كەلگەندەر دە بار ەكەن. ماسەلەن, تاتيانا (تەگىن جازباۋدى ءوتىندى) «مەن بۇل ورتالىق جايلى دوستارىمنان ەستىدىم. اۋەلى قاتتى قورىقتىم. بۇل زاماندا ء«بارى تەگىن» دەگەنگە سەنۋ قيىن عوي. بالامدى الىپ قويماسىن دەگەن ۇرەي جانىما تىنىشتىق بەرمەدى. دوستارىمنىڭ «بارىپ كور, بولماسا كەرى الىپ كەتەمىز» دەگەن سوزدەرىنەن سوڭ بەل بۋدىم. كەلدىم, كوردىم, ۇنادى. بارلىعى ك ۇلىمسىرەپ, جىلى قارسى الدى. بالاما ەشتەڭە بولمايتىندىعىن, اقنيەتتى ادامداردىڭ شىن كوڭىلمەن كومەكتەسىپ جۇرگەنىنە كوزىم جەتكەن سوڭ وسى ۇيدە قالۋعا بەكىندىم», دەيدى. بيىل تاتيانا 18 جاسقا تولدى. بوسانعانىنا جارتى جىل دا بولماعان. قالاداعى №15 وسكەمەن كاسىبي ۋچيليششەسىندە وقىپ ءجۇرىپ, سۇيگەن جىگىتىمەن ازاماتتىق نەكەدە تۇرىپتى. اياعى اۋىر بولىپ جۇرگەندە جىگىتىن كەشىرە الماعان ول «انالار ۇيىنە» كەلگەن. «ماعان ۇنايدى. نە ىشەم, نە جەيمىن, قاي اقشاما نەنى ساتىپ الامىن دەپ ويلامايمىن. اۋىلداعى اتا-انالارىم شاقىرادى, بىراق وسىندا قالا تۇرۋدى ءجون كورىپ ءجۇرمىن» دەدى ول.
ءبىر قىزىعى, قىزدار بۇل جەردە ءبىر جارىم جىلعا دەيىن قالمايدى. ءبىر جىلعا جەتەر-جەتپەس ۋاقىتتا جىگىتتەرىمەن, يا بولماسا, كۇيەۋلەرىمەن قايتا تابىسىپ جاتادى ەكەن. ياعني, اۋەل باستا بالالارىنان باس تارتقان اكەلەر تۋعان پەرزەنتتەرىن كورگەندە جۇرەكتەرى ءجىبىپ, اكەلىك سەزىمدەرى وياناتىن كورىنەدى. اشىلعانىنا ەكى جىل تولعان بۇل ءۇي سودان بەرى تۋرا سانى قىرىق اناعا پانا بولىپتى. ۇيلەستىرۋشىدەن باسقا ەكى شارۋاشىلىق مەڭگەرۋشىسى, مەدبيكە, پسيحولوگ, كولىك جۇرگىزۋشىسى شتاتتىق جۇمىس اتقارادى.
ال «انالار ءۇيىنىڭ» تۇرعىنى اليونا بىلاي دەيدى: كاسىپكەرلەرگە, كومەك كورسەتكەن جاندارعا ريزامىن. ءوزىم جەتىمدەر ءۇيىنىڭ تۇلەگىمىن. كەزدەسىپ جۇرگەن جىگىتىم وتباسىلىق ومىرگە دايىن بولماي شىقتى. جاپادان جالعىز قالدىم. ال بالامدى جەتىمدەر ۇيىنە بەرگىم كەلگەن جوق. مەندە بولماعان ءومىردى كورگەنىن, مەندە بولماعان وتباسىنىڭ بولعانىن قالايمىن. انالىق ماحابباتقا زارۋلىكتىڭ نە ەكەندىگىن بىلەمىن عوي. سوندىقتان, مەن سياقتى جاعدايعا دۋشار بولعان قىزدارعا ايتارىم: ەشقاشان بالارىڭدى تاستاماڭدارشى. ويتكەنى تىعىرىققا تىرەلدىم-اۋ دەگەن جەردىڭ وزىنەن ەسىكتىڭ اشىلاتىندىعىنا كوزىم جەتتى.
ايتا كەتەيىك, جانى قينالىپ جۇرگەن جالعىزباستى انالار 8 800 080 77 71 تەلەفونىنا تەگىن قوڭىراۋ شالىپ, قولداۋ مەن كومەككە قول جەتكىزە الادى.
اسەل اسقارقىزى
وسكەمەن
