ايتقانداي-اق, ەكىباستۇزدىڭ تۋعان كۇنى مەرەكەسىندە ءماشھۇر ءجۇسىپ ەسكەرتكىشى اشىلدى. بيىكتىگى 6 مەتر بولاتىن قولادان قۇيىلعان ەسكەرتكىشتىڭ كورىنىسى ەرەكشە. عۇلامانىڭ بەينەسى قالاعا كەلگەن ءاربىر قوناقتى ويلى جۇزىمەن قارسى الىپ, اينالاعا كوز سالا قاراپ تۇرعانداي. عۇلاما ءماشھۇر بابامىزدىڭ ەسكەرتكىشى ءوزىنىڭ ەسىمىمەن اتالاتىن ەكىباستۇزدىڭ ورتالىق كوشەسىندەگى باق ىشىنە قويىلدى. الىپ كەشەن اۆتورلارى ەسكەرتكىشتى مۇسىندەگەن اعايىندى جاۋباسار مەن جارىلعاسىن يعلانبەك ۇلى. مۇسىنشىلەردىڭ ايتۋلارىنشا ءماشھۇر ءجۇسىپتىڭ ءومىرى جايلى وقىپ, ءبىلىپ, زەردەلەپ, زەرتتەپ بارىپ, ءمۇسىندى جاساۋدى قولعا الىپتى. بۇل كۇنى ەكىباستۇزدىڭ 60 جىلدىعىمەن قالا تۇرعىندارىن قۇتتىقتاۋعا كەلگەن وبلىس اكىمى بولات باقاۋوۆ تا ەسكەرتكىشتىڭ اشىلۋ راسىمىنە قاتىستى. ەكىباستۇزدىڭ قاراسۋ اۋىلى ارقىلى قارا جولمەن شاڭداتىپ توتەسىنەن تۇسىپ جاڭاجولداعى ءماشھۇر بابامىزدىڭ كەسەنەسىنە دە جەتۋگە بولادى. وتكەنسىز-بۇگىن جوق. قازاقتىڭ ۇلى شەجىرەلى ءومىرى-ۇرپاعىنا امانات دەگەن وسى. وسى كۇنى ەسكەرتكىشتىڭ اشىلۋىنا وراي عۇلامانىڭ تۋعان تۋىستارى, ءماشھۇر تانۋشى عالىمدار, قالا جۇرتشىلىعى كوپتەپ جينالدى.
فاريدا بىقاي
«ەگەمەن قازاقستان»
پاۆلودار وبلىسى
