استاناداعى WSEC ەكسپو-2017 مامانداندىرىلعان حالىقارالىق كورمەسىنىڭ ىسكەرلىك باعدارلاماسى اياسىندا وتۋدە.
- بۇگىندە بۇكىل الەم ورتاق ماڭىزدى ماسەلەگە الاڭداۋلى: الەمدىك ەنەرگەتيكا قالاي داميدى, قانداي تەتىكتەردىڭ بولاشاعى زور؟ ەكسپو-2017 الاڭى, ونىڭ ىشىندەگى ءبىزدىڭ كونگرەسس عالامدىق ماسەلەنى تالقىلاۋعا زور مۇمكىندىك بەرەدى دەپ ويلايمىن. اسىرەسە, بۇل تاقىرىپ ءداستۇرلى شيكىزات ەكونوميكاسىنا ىقپالدى ەلدەر ءۇشىن اسا ماڭىزدى: ولاردىڭ ارقايسىسى ەنەرگەتيكالىق سالانىڭ باعىت-باعدارىن وزگەرتىپ جاتىر, ونىڭ ىشىندە قازاقستاندا دا بار, - دەدى قازاقستان رەسپۋبليكاسىنىڭ ءبىلىم جانە عىلىم ۆيتسە-ءمينيسترى اسلانبەك امرين.
دۇنيەجۇزىلىك كونگرەستىڭ نەگىزگى ماقساتى – جاھاندىق ەنەرگەتيكا ماسەلەلەرىنىڭ جاڭا شەشىمدەرىن ىزدەۋ, كادر دايىنداۋ, تەحنولوگيا, قۇراستىرۋ جانە يننوۆاتسيا تەتىكتەرى. فورۋمعا 1000-نان استام عالىمدار مەن ينجەنەرلەر, ءبىلىم بەرۋ, بيزنەس سالالارىنىڭ وكىلدەرى جانە الەمنىڭ 51 ەلىنەن كەلگەن مەمەلەكەتتىك ورگاندار مەن حالىقارالىق ۇيىمداردىڭ بەلدى تۇلعالارى قاتىسۋدا.
– ءبىزدى 20-دان استام بەدەلدى حالىقارالىق ەنەرگەتيكالىق ۇيىمدار قولدادى. دەمەك, كونگرەستىڭ تاقىرىبى قازاقستان ءۇشىن عانا ەمەس, دۇنيەجۇزى ەلدەرى ءۇشىن دە وزەكتى. ءححى عاسىردىڭ عالامدىق ماسەلەسى: تابيعي رەسۋرستاردىڭ تاۋسىلۋى, جاھاندىق ەنەرگەتيكالىق قاۋىپسىزدىك, ءۇشىنشى يندۋستريالدىق رەۆوليۋتسيا. جاڭا كەزەڭ كەلەدى, باعىت-باعدارلار وزگەرەدى, عىلىمي جەتىستىكتەرگە, يننوۆاتسيا جانە ينجەنەرلىك ىستەرگە سۇرانىس ارتادى. ال ءبىزدىڭ ماقسات اتالعان ماڭىزدى تاپسىرمالاردى ورىنداۋ جانە تىعىرىقتان شىعۋدىڭ جولىن ىزدەۋ, - دەدى WSEC حالىقارالىق باعدارلامالىق كوميتەتتىڭ قوسارلاس توراعاسى, قر ۇلتتىق ينجەنەرلىك اكادەمياسىنىڭ پرەزيدەنتى باقىتجان جۇماعۇلوۆ.
ەكى كۇن ىشىندە كونگرەسس-ورتالىقتىڭ الاڭىندا 300 بايانداما جاسالىپ, 80 عىلىمي تانىستىرىلىم وتەدى. ۇيىمداستىرۋشىلاردىڭ ايتۋىنشا, فورۋمعا ەنەرگەتيكا ماسەلەلەرىن تەرەڭنەن زەرتتەپ جۇرگەن 100-گە جۋىق جاس عالىمدار دا قاتىسادى.
– 2015 جىلدان بەرى يندۋستريالدى-يننوۆاتسيالىق دامۋ مەملەكەتتىك باعدارلاماسىنىڭ اياسىندا 11 قازاقستاندىق ينستيتۋت يننوۆاتسيالىق باعدارلامار ازىرلەدى. جالپى قازاقستاننىڭ جوعارى مەكتەپتەرىنىڭ الدىندا جاڭا مىندەتتەر قويىلدى. ءبىزدىڭ ەلدى ءبىلىم مەن يننوۆاتسيانىڭ ورتالىعىنا اينالدىرۋ, حالىقارالىق دەڭگەيدە قاجەتتى ينجەنەرلىك كادر ماماندارىن دايىنداۋ سىندى ناقتى تاپسىرمالار بار. ول ءۇشىن ءبىلىم بەرۋ مازمۇنىنا جاڭاشا كوزقاراس قاجەت, زاماناۋي تەحنولوگيالار مەن ولاردى دامىتۋ قارقىنى جوعارى بولۋى ءتيىس. ينجەنەرلەر ەنەرگەتيكالىق سالانىڭ جاڭا سىن-تەگەۋرىندەرىنە, قاۋىپسىزدىك, ەكولوگيالىق باعدارلارىنا دايىن بولۋى قاجەت, - دەدى قازاقستان رەسپۋبليكاسىنىڭ ءبىلىم جانە عىلىم ۆيتسە-ءمينيسترى اسلانبەك امرين.
كونگرەستى سىرتقى ىستەر مينيسترلىگى, ەنەرگەتيكا, ءبىلىم جانە عىلىم مينيسترلىكتەرى, سونداي-اق, استانا قالاسىنىڭ اكىمدىگى مەن ەكسپو-2017 قولداۋىمەن قر ۇلتتىق ينجەنەرلىك اكادەمياسى جانە قازاقستان ۇلتتىق جاراتىلىستانۋ عىلىمدارى اكادەمياسى ۇيىمداستىردى. ينجەنەرلەر مەن عالىمداردىڭ دۇنيەجۇزىلىك كونگرەسى ەلوردادا ەكى كۇنگە جالعاسادى: 19-20 ماۋسىم. 21 ماۋسىمدا كونگرەستىڭ قاتىسۋشىلارى مەن قوناقتارى ءۇشىن ەكسپو-2017 كورمەسىنە ەكسكۋرسيا ۇيىمداستىرىلادى.
