پارلامەنتتىك سايلاۋدىڭ ەكىنشى تۋرىنىڭ قورىتىندىسى بويىنشا, «العا, رەسپۋبليكا!» پارتياسى ءوزىنىڭ وداقتاسى «دەموكراتيالىق قوزعالىس» پارتياسىمەن بىرگە ەلدىڭ تومەنگى پالاتاسىنداعى 577 ورىننىڭ 300-ىنە وتىرۋ قۇقىعىنا يە بولدى.
ساياساتكەرلەر, دەگەنمەن, ماكروننىڭ پارتياسى بۇدان دا جاقسى كورسەتكىشكە جەتەدى دەپ بولجاعان ەدى. قالاي بولعاندا دا, پرەزيدەنت پارتياسى پارلامەنتتە ايتارلىقتاي رولگە يە بولىپ, ماكروننىڭ بيزنەس رەفورمالارىن جۇرگىزۋىنە جاعداي جاساماق.
حالىقتىڭ سايلاۋعا قاتىسۋ دەڭگەيى 2012 جىلعى كورسەتكىشتەن اناعۇرلىم از بولدى. ماكرون پارتياسىنىڭ سايلاۋدىڭ ءبىرىنشى تۋرىندا ايقىن باسىمدىقپەن جەڭگەننەن كەيىن ونى جاقتاۋشىلار دا, وعان قارسى حالىق تا سايلاۋعا كەلمەي قويعانعا ۇقسايدى. لە پەننىڭ پىكىرىنشە, سايلاۋعا حالىقتىڭ از جينالۋى ەلدىڭ سايلاۋ جۇيەسىنە رەفورما جاساۋدىڭ قاجەتتىلىگىن كورسەتەدى.
ەل پرەمەر-ءمينيسترى ەدۋار فيليپپ سايلاۋشىلار سانىنىڭ ماردىمسىزدىعىن ايتا وتىرىپ, ونىڭ پارتياسى بارشا فرانتسۋز جۇرتى ءۇشىن تاڭداۋ جاسايتىنىن مالىمدەدى.
كونسەرۆاتيۆتى «رەسپۋبليكاشىلار» پارتياسى مەن ونىڭ وداقتاستارى سايلاۋ قورىتىندىسى بويىنشا ەڭ ءىرى وپپوزيتسيالىق بلوك قۇرا الادى. ولار پارلامەنتتىڭ تومەنگى پالاتاسىنىڭ 125-تەن 131-گە دەيىنگى ورنىنا يەلىك ەتپەك. دەگەنمەن, بۇل وسىعان دەيىنگى پارلامەنتتەگى وپپوزيتسيالىق بلوكتىڭ سانىنان اناعۇرلىم از. ول كەزدە وپپوزيتسيا وكىلدەرى زاڭ شىعارۋشى ورعاننىڭ 200 مانداتىنا يەلىك ەتكەن ەدى.
سوڭعى بەس جىلدا ەل بيلىگىندە بولعان سوتسياليستەر بار بولعانى 41-دەن 49 مانداتقا دەيىن الا الماق. بۇل پارتيا تاريحىنداعى ەڭ از كورسەتكىش.
ال پرەزيدەنتتىك سايلاۋدا ماكروننىڭ باستى باسەكەلەسى بولعان مارين لە پەن ەل بيلىگىنە تالاستا جەڭىسكە جەتپەگەنىمەن, پارلامەنتتىك سايلاۋدا ايتارلىقتاي جەتىستىككە جەتىپ وتىر. ونىڭ «ۇلتتىق فرونت» پارتياسى العاش رەت تومەنگى پالاتاعا سايلانىپ, تورتتەن سەگىز مانداتقا دەيىن يەلىك ەتە الاتىن بولدى.
ەستەرىڭىزدە بولسا, 2016 جىلدىڭ ءساۋىر ايىندا ماكرون «العا, رەسپۋبليكا!» پارتياسىن قۇرعان ەدى. پارتيا قۇرامىنىڭ جارتىسىنا جۋىعى ساياسي ارەنادا تاجىريبەسىز. پرەزيدەنتتىك سايلاۋدا دا ماكروننىڭ جەڭىسىنە كۇمانمەن قاراعاندار ونىڭ ۇلكەن ساياساتتاعى تاجىريبەسىزدىگى مەن ونىڭ پارلامەنت قابىرعاسىندا قولداۋشىسىنىڭ جوقتىعىن العا تارتقان ەدى.
بۇل سايلاۋدا فرانتسيا ساياساتىندا بۇرىننان كەلە جاتقان «كارى» پارتيالار حالىقتى ماكروننىڭ پارتياسىن قولداۋعا ۇگىتتەدى. ساراپشىلاردىڭ پىكىرىنشە, ونداعى ماقسات بيلىكتىڭ مونوپوليالانىپ كەتۋىنىڭ الدىن الۋ.
«العا, رەسپۋبليكا!» پارتياسى پارلامەنتكە ءومىردىڭ ءار ءتۇرلى سالاسىنداعى ازاماتتاردى ۇسىنىپ وتىر. ولاردىڭ اراسىندا ءتىپتى زەينەتكەرلەر مەن ستۋدەنتتەر بار. ارينە, كوپشىلىگى ۇلكەن ساياساتپەن تانىس ەمەس. ۇمىتكەرلەردى ىرىكتەۋ جۇمىستارى ەلەكتروندى پوشتا ارقىلى كەلىپ تۇسكەن تۇيىندەمەلەر نەگىزىندە جۇرگىزىلگەن.
باۋىرجان مۇقانوۆ,
«ەگەمەن قازاقستان»
