جالپى وتىرىس بارىسىندا ءماجىلىس دەپۋتاتى نۇرتاي سابيليانوۆ پرەمەر-مينيستردەن: «ۇكىمەت قوسىلعان قۇن سالىعىن قايتارۋ ءادىسىن وزگەرتۋدى جوسپارلاپ وتىرعان جوق پا؟», - دەپ سۇراعان ەدى.
«قوسىلعان قۇن سالىعىن قايتارمايمىز», دەسەك قاتە بولار. ويتكەنى, بۇگىنگى كۇنى ەكونوميكا دا, ينۆەستيتسيا دا, ەكسپورت تا ءوسىپ كەلەدى. قازىرگى ۋاقىتتا 300 ءىرى كومپانياعا مونيتورينگ جۇرگىزىپ وتىرمىز. ولار ءوز ونىمدەرىن ەكسپورتقا شىعارعاننان كەيىن مىندەتتى تۇردە قوسىلعان قۇن سالىعى بويىنشا قايتارىلاتىن سومانى ۇسىنادى. سوندىقتان ءبىز بۇل ماسەلەنى تىڭعىلىقتى قاراستىرۋدامىز. بۇگىنگى كۇنى ءبىزدىڭ تاراپتان ققس-ءتىڭ دەر ۋاقىتىندا قايتارىلماۋىنا بايلانىستى ەكسپورتتاۋشىلاردان نارازىلىق وتە كوپ تۇسۋدە», - دەدى ساعىنتاەۆ.
ۇكىمەت باسشىسىنىڭ ايتۋىنشا, تەكسەرۋلەرگە بايلانىستى قوسىلعان قۇن سالىعىن قايتارۋ جۇمىستارى ۇزاققا سوزىلىپ كەتەدى.
«جىل سايىنعى ستاتيستيكاعا قارايتىن بولساق, قورىتىندى تەكسەرۋدەن كەيىن 500-600 ملرد تەڭگە قايتارىلۋعا جاتادى. دەگەنمەن, ءىرى بيزنەس تارابىنان كەيىستىك كوبەيۋىنە بايلانىستى ءبىز ءادىستى وزگەرتتىك. قازىرگى ۋاقىتتا 70 پروتسەنتىنە ققس اۆتوماتتى تۇردە قايتارىلىپ, 30 پروتسەنتىنە تەكسەرۋ جۇرگىزىلەدى. ەگەر قانداي دا ءبىر بۇزۋشىلىقتار انىقتالاتىن بولسا, وندا تولەنىپ قويعان 70 پروتسەنت ايىپپۇل سانكتسيالارىمەن كەرى قايتارىلاتىن بولادى.قازىرگى ۋاقىتتا ەلەكتروندى ەسەپشوت تۇبىرتەگىن ىلكى رەجىمدە قولدانا باستادىق. بۇل سىزبامەن جۇمىس ىستەيتىندەرگە تەكسەرۋ 30 كۇننىڭ ىشىندە جۇزەگە اسىرىلادى. كەلەسى جىلدان باستاپ بۇل سىزبا تەك ءىرى كومپانيالارعا قاتىستى جۇمىس ىستەيتىن بولادى. ال 2019 جىلدان باستاپ بۇل تەتىككە باسقا دا كومپانيالار ىلىگەدى», - دەدى پرەمەر-مينيستر.
