«جاڭا ءفيلمنىڭ قۇرىلىمى مەن ستيليستيكاسى تۋرالى ايتاتىن بولساق, بۇرىنعى «كاۆكازسكايا پلەننيتسا» جانە «بريلليانتوۆايا رۋكا» سىندى ايگىلى كەڭەستىك فيلمدەردى ەسكە تۇسىرەدى.
«16 قىز» فيلمىندە نەگىزگى وقيعا باۋىرجان (بەرىك ايتجانوۆ) مەن ايجاننىڭ (اشا ماتاي) اراسىنداعى رومانتيكالىق شىتىرمان ماحابباتقا قۇرىلعان بولسا, بۇل جولى «ۇيلەنبەيدى» دەپ 5 مىڭ تەڭگەگە ءباس تىگىپ جۇرەتىن ساماتتىڭ (قۋانىش دولداەۆ) ءوزىن ۇيلەندىرۋ جولىنداعى ماشاقاتقا تولى سيۋجەتتەر جەلىسى جىلجيدى. ونىڭ عاشىعى ءلايلانىڭ, قۇمىرا ۇرلىعىن زەرتتەپ جۇرگەن پوليتسەيدىڭ جانە انتيكۆارياتتى قولعا ءتۇسىرۋدى كوزدەپ جۇرگەن بۇزاقىلاردىڭ شىم-شىتىرىققا تولى حيكاياسى كورسەتىلەدى.
قاناعات مۇستافين وسى جولعى ءفيلمنىڭ دە ستسەناريىن ءوزى جازعان. قاتال دا ءادىل رەجيسسەر «ەڭ سۇلۋ قىز» كينوكارتيناسىنىڭ ەلەۋلى جاڭالىقتارىمەن ءبولىستى.
«كينو تۇسىرگەندە كورەرمەنگە بۇرىننان تانىس اكتەرلەردى شاقىراسىڭ دەپ سىنايتىن. بۇل جولى باستى رولدەردى اسەل اسقار مەن قۋانىش دولداەۆ سىندى جاس اكتەرلەر ويناپ شىقتى», دەيدى رەجيسسەر.
رەجيسسەردىڭ ايتۋىنشا, بۇل جولى ءفيلمنىڭ مۋزىكاسىنا باسا ءمان بەرىلمەك. مىسالى,
فيلم ساۋندترەگى رەتىندە «16 قىز» حالىق ءانىن قازىبەك قاسىم اعىلشىن تىلىندە ورىندايدى. «بۇل حالىق اراسىنا كەڭ تارالعان ءاندى وزگەشە قىرىنان تانىتۋ» دەپ تۇسىندىرگەن رەجيسسەر ءفيلمنىڭ پروكاتقا شىعارۋ ىسىنە دە توقتالىپ ءوتتى.
– «شەشەنفيلم» بىزگە بىرلەسىپ فيلم ءتۇسىرۋ جونىندە ارنايى ۇسىنىسپەن شىقتى. جاڭا تاجىريبە وزىمىزگە دە قىزىق كورىنىپ, باستاپقىدا ءفيلمدى گروزنىيدا تۇسىرمەك بولعانبىز. الايدا, شىعىن كوپ بولاتىنىن ويلاپ, «كوك-توبە» ساياباعى, «سۇنقار» شاڭعى ترامپليندەر كەشەنى, «مەدەۋ» سيياقتى الماتىنىڭ ەڭ كورىكتى جەرلەرىندە تۇسىردىك. بۇيىرسا سولتۇستىك كاۆكازدا, رەسەيدىڭ شاعىن قالالارىندا دا پروكاتقا شىقپاق. شەشەن تىلىنە دۋبلياج جاساۋدى سەرىكتەسىمىز ءوز جاۋاپكەرشىلىگىنە الىپ وتىر, – دەيدى رەجيسسەر قاناعات مۇستافين.
پروديۋسسەر ايدارحان ادىلباەۆتىڭ ايتۋىنشا, فيلم بيۋدجەتى «16 قىز» فيلمىنە جۇمسالعان قاراجاتپەن شامالاس (400 مىڭ اقش دوللارى). ونىڭ سوزىنشە, «16 قىز» فيلمىنە كەتكەن شىعىن ءبىر جىل ىشىندە تولىق وتەلگەن.
ايا ءومىرتاي,
«ەگەمەن قازاقستان»
