«مينيسترلىكتىڭ قۇرىلعانىنان باستاپ ءبىزدىڭ بارلىق كۇشىمىز ادامداردىڭ ءومىرىن جايلى جانە قاۋىپسىز, ولاردىڭ قۇقىقتارى مەن ەركىندىكتەرىن قامتاماسىز ەتۋگە باعىتتالادى. ءبىز جاۋاپ بەرەتىن سالالاردا مەملەكەتتىك ساياساتتىڭ ءاربىر قازاقستاندىق ءۇشىن تۇسىنىكتى جانە ايقىن بولۋىنا تىرىسۋدامىز. وسى جۇمىستاعى باستى ماقسات – ازاماتتاردىڭ قۇقىقتارىن قامتاماسىز ەتۋ, مەملەكەت پەن ازاماتتىق قوعام كۇشتەرىن بىرىكتىرۋ, زايىرلى جانە دەموكراتيالىق پرينتسيپتەردى نىعايتۋ» دەپ اتاپ ءوتتى مينيستر.
ن.ەرمەكباەتىڭ مالىمەتىنشە, قازىرگى تاڭدا ەلىمىزدە 18 كونفەسسيا جۇمىس ىستەيدى. ولار 3 658 ءدىني بىرلەستىككە بىرىككەن. قازاقستاندىقتاردىڭ 15 پايىزى ءدىني راسىمدەردى تۇراقتى ورىندايتىندار. ازاماتتاردىڭ 75 پايىزى قۇدايعا سەنەدى, بىراق تۇراقتى تۇردە ءدىني جورالاردى ورىندامايدى جانە ءدىني بىرلەستىكتەر قىزمەتىنە تارتىلماعان. ازاماتتاردىڭ شامامەن 10 پايىزى وزدەرىن اتەيست نەمەسە اگنوستيك دەپ سانايدى.
مينيستر ۆەدومستۆوارالىق ءوزارا ءىس-قيمىلدىڭ بىرقاتار ماڭىزدى ناتيجەسى رەتىندە عيبادات ورىندارىنىڭ ماڭايىندا قاۋىپسىزدىكتىڭ كۇشەيتىلگەنىن اتاپ ءوتتى. «بۇل جۇمىستىڭ ناتيجەسىندە مەشىتتەردە ءتارتىپ بۇزۋ ۇلەسى بىردەن تومەندەدى. سونىمەن قاتار, ءدىني ماتەريالداردى تاراتۋ ارنالارىنا تۇراقتى مونيتورينگ جاساۋ جولعا قويىلدى. 2016 جىلى تەك ءبىزدىڭ مينيسترلىك 10750 سايتتى زەردەلەدى. ونىڭ ىشىندە 1500-گە جۋىق سايتتاردان زاڭسىز كونتەنت تابىلىپ, ولار زاڭ تارتىبىمەن جابىلدى. 2017 جىلى مونيتورينگ وبەكتيۆىنە 6 مىڭنان استام سايت ءتۇستى. ونىڭ ىشىندە 900-ءى زاڭسىز كونتەنت تاراتقان» دەدى ول.
بۇعان قوسا ول الەۋمەتتىك جەلىلەرگە, كىتاپ, باسپا ونىمدەرىنە ساراپتاما جۇرگىزىلگەندىگىن تىلگە تيەك ەتتى. «2017 جىلى 1,5 مىڭنان استام وبەكتى ساراپتامادان ءوتتى. ونىڭ ىشىندە 54 ماتەريال قۇقىققا قايشى كونتەنتى بار دەپ تانىلدى. سونىمەن قاتار قىلمىستىق-اتقارۋ جۇيەسى كوميتەتىنىڭ بارلىق كىتاپحانا قورىنا ساراپتاما جۇرگىزىلدى. ونىڭ بارىسىندا 2017 جىلى 13 كىتاپ دەسترۋكتيۆتى مازمۇندا دەپ تابىلدى. مينيسترلىك جۇمىسىنىڭ تاعى دا ءبىر ماڭىزدى ناتيجەسى – ەكسترەميزمنىڭ الدىن الۋ سالاسىندا قايتا دايارلاۋ ينستيتۋتىن قۇرۋى. ول مينيسترلىكتىڭ ادىستەمەلىك قولداۋىمەن «نۇر مۇباراك» ۋنيۆەرسيتەتى بازاسىندا جۇمىس ىستەيدى. 2016 جىلدىڭ قازان ايىنان باستاپ وسى ينستيتۋتتان 40 يمام مەن تەولوگ ماماندار دايىندىقتان ءوتتى», دەدى ن.ەرمەكباەۆ.
مينيسترلىك ۇكىمەتتىك ەمەس ۇيىمدارمەن گرانتتار جانە مەملەكەتتىك الەۋمەتتىك تاپسىرىس نەگىزىندە جوبالىق ىنتىماقتاستىقتى دامىتۋدا. 2017 جىلى گرانتتىق قارجىلاندىرۋ 3 ەسە ارتىپ, 650 ملن تەڭگەنى قۇراعان. جىلدىڭ باسىندا ەكسپەرتتىك كوميسسيا 42 گرانتتى بەرگەن. بارلىعى 183 ۇيىمنان 320 ءوتىنىش قاراستىرىلعان.
ء«بىز 2016 جىلى جوبالاردىڭ تەك قانا رەسپۋبليكالىق دەڭگەيدە بولۋى جايلى ۇكىمەتتىك ەمەس ۇيىمداردىڭ سىنىن ەسكەردىك. بيىل گرانتتاردىڭ ۇشتەن ءبىر بولىگى وڭىرلەردەگى جۇمىستى جانە جەرگىلىكتى قاۋىمداستىقتىڭ دامۋىن ەسكەرەدى. كەيىن بۇل تەندەنتسيا ارى قاراي دامي بەرەتىن بولادى», دەدى مينيستر.
ءسوز سوڭىندا ءدىن ىستەرى جانە ازاماتتىق قوعام ءمينيسترى جۇرگىزىلگەن جۇمىستار مينيسترلىكتىڭ 2016 جىلعا ارنالعان ستراتەگيالىق جوسپارىنىڭ مەجەلەنگەن كورسەتكىشتەرىنە قول جەتكىزۋگە مۇمكىندىك بەرگەنىن اتاپ ءوتتى.
«الەۋمەتتىك زەرتتەۋلەر ءدىن سالاسىنداعى مەملەكەتتىك ساياساتتى حالىقتىڭ قولداۋ دەڭگەيى 87 پايىزدى قۇراعانىن, ازاماتتىق قوعام ينستيتۋتتارى مەن مەملەكەتتىڭ ءوزارا قارىم-قاتىناسىن جاقسى باعالاۋ 60 پايىزعا جەتكەنىن, مەملەكەتتىك جاستار ساياساتىنىڭ ىسكە اسىرىلۋىنا ريزاشىلىق بىلدىرگەندەر 75 پايىزدى قۇراعانىن كورسەتتى», دەدى ن.ەرمەكباەۆ.
