شاقىرۋ بيلەتتەرىنە يە بولعاندار قاتارىندا ءبىلىم, ونەر جانە سپورت سالاسىندا ۇزدىك ناتيجەلەرگە قول جەتكىزىپ, ينستيتۋتتىڭ قوعامدىق ومىرىنە بەلسەنە اتسالىسىپ جۇرگەن جاستار بار.
ستۋدەنتتەرمەن كەزدەسۋ بارىسىندا وقۋ ورنىنىڭ باسشىسى بىلىمگەرلەردى وقۋ جىلىنىڭ اياقتالۋىمەن قۇتتىقتاپ, الەمدىك تەحنولوگيالىق ۇدەرىسكە زور ۇلەس قوساتىن «ەكسپو-2017» كورمەسىنىڭ ءمانى مەن ماڭىزىنا توقتالدى.
– ەلوردا تورىندەگى جاھانداعى وزىق ويلى ادامداردىڭ قاتىسۋىمەن ءوتىپ جاتقان كورمە ادامزات دامۋىنىڭ جاڭا باعىتتارىن ايقىنداماق. مىڭداعان وتانداستارىمىز بەن الەمنىڭ تۇكپىر-تۇكپىرىنەن كەلىپ جاتقان قوناقتار سوڭعى عىلىمي جەتىستىكتەرمەن تانىسۋدا. بۇل ءىس-شارالار مەملەكەتتەر اراسىنداعى ءوزارا تۇسىنىستىكتى دامىتۋعا, عىلىم, بيزنەس جانە ءبىلىم اراسىنداعى تابىستى ءىس-قيمىلعا, سونىمەن قاتار ۇلى دالا مادەنيەتىمەن ەتەنە تانىسۋعا زور سەپتىگىن تيگىزبەك. سىزدەر «بولاشاقتىڭ ەنەرگياسى» تاقىرىبىمەن ءوتىپ جاتقان كورمە كەشەنىنىڭ نىساندارى مەن پاۆيلوندارىن ارالاپ, عىلىمي پروگرەستىڭ قالاي دامىپ جاتقانىن تاماشالايسىزدار. كورىپ قانا قويماي, تەحنولوگيالىق ورلەۋدى جەتە زەردەلەڭىزدەر, – دەدى د.قوجامجاروۆا.
ءوز كەزەگىندە ستۋدەنتتەر حالىقارالىق كورمەگە بارۋعا مۇمكىندىك جاساپ وتىرعان ينستيتۋت باسشىلىعىنا ىزگى نيەتىن ءبىلدىرىپ, ءىس-شارانىڭ قازاقستاننىڭ عىلىمىن دامىتۋعا جانە ەكونوميكامىزدى جاڭا بەلەسكە كوتەرۋگە سەپتىگىن تيگىزەتىنىنە سەنىم ءبىلدىردى.
