قازاقستاننىڭ ءۇش جوباسى – ەلەكتروندىق ۇكىمەت, اشىق ۇكىمەت جانە 1414 بىرىڭعاي بايلانىس ورتالىعى وسى بايقاۋدىڭ چەمپيوندارى اتاندى.
WSIS Prizes-2017 بەدەلدى كونكۋرسىنا الەمنىڭ ءارتۇرلى ەلدەرىنەن 345 جوبا قاتىسىپ, داۋىس بەرۋ مەن ادىلقازىلار القاسىنىڭ ساراپشىلىق باعاسىنىڭ قورىتىندىسى بويىنشا 90 جوبا ءوز ساناتتارىنىنىڭ ۇزدىك بەستىكتەر قاتارىنا ىلىكتى.
حالىقارالىق بايقاۋ 18 سانات بويىنشا وتكىزىلدى. «ەلەكتروندىق ۇكىمەت» ساناتىندا قازاقستاننىڭ ەلەكتروندىق ۇكىمەتى (eGov.kz) جانە قازاقستاننىڭ اشىق ۇكىمەتى (Open.egov.kz), ال «مەملەكەتتىك باسقارۋ ورگاندارى مەن مۇددەلى تاراپتاردىڭ دامىتۋ ماقساتىمەن ينفوكوممۋنيكاتسيالىق تەحنولوگيالاردى قولدانۋداعى ءرولى» اتتى ساناتىندا «1414 بىرىڭعاي بايلانىس ورتالىعى» جوبالارى قاتىستى.
WSIS Prizes-2017 كونكۋرسى 4 دەڭگەي بويىنشا وتكىزىلدى: وتىنىمدەردى قابىلداۋ, ساراپشىلار توبىمەن بايقاۋدىڭ نومينانتتارىن انىقتاۋ, ونلاين داۋىس بەرۋ جۇرگىزىپ ءار سانات بويىنشا ەڭ ۇزدىك دەگەن بەستىكتى ىرىكتەۋ, جەڭىسكە جەتكەن جوبالاردى انىقتاۋ.
WSIS دۇنيەجۇزىلىك كەزدەسۋ فورۋمى – ينفوكوممۋنيكاتسيالىق تەحنولوگيالار سالاسىنداعى ءىرى شارالاردىڭ ءبىرى, كۇللى الەم بويىنشا ىقپالدى IT-ساراپشىلارى ديالوگ جۇرگىزەتىن الاڭى. جان-جاقتى وتكىزىلەتىن كەزدەسۋگە مەملەكەتتىك باسقارۋ ورگاندارىنىڭ, ۇكىمەتارالىق جانە ۇكىمەتتىك ەمەس ۇيىمداردىڭ وكىلدەرى, جەكەشە سەكتور مەن ازاماتتىق قوعامنىڭ وكىلدەرى قاتىسادى. فورۋمنىڭ باستى ماقساتى – ءاربىر ازامات اقپارات جاساپ, دەرەكتەرمەن ەركىن الماسا الاتىن ءارى بارلىعىنا قولجەتىمدى اشىق اقپاراتتىق قوعام قۇرۋداعى باستى ماقساتتاردى انىقتاۋ.
