مامانداردىڭ سوزىنە سەنسەك, كەنىشتى سۋ باسۋىنا قىستا جاۋعان قالىڭ قاردىڭ ەرۋى مەن فيلليپوۆكا وزەنىنىڭ اعىندى سۋىنىڭ قوسىلۋى اسەر ەتكەن. «قازتسينك» كومپانياسى كەن بايىتۋ ءوندىرىسىنىڭ اتقارۋشى ديرەكتورى ۆالەري زاۆيالوۆ قازىرگى ۋاقىتتا كەنىشتەگى جاعدايدىڭ تۇراقتالىپ قالعانىن, سۋدى سورۋ جۇمىستارى تاۋلىك بويى جۇرگىزىلىپ جاتقانىن ايتادى. «وقيعا ورىن العان كۇننەن باستاپ جەدەل تۇردە ارنايى شتاب قۇرىلىپ, كارەر ءىشىن سۋدان تازالاۋ, كەنىش ماڭىندا تۇراتىن تۇرعىنداردىڭ قاۋىپسىزدىگىن قامتاماسىز ەتۋ شارالارى شۇعىل قولعا الىندى. كارەر تۇبىندەگى سۋلار سۋ ايداۋ قوندىرعىلارى ارقىلى سىرتقا سورىلىپ شىعارىلىپ, كومبيناتتىڭ قالدىق ساقتاۋ ورنىنا قاراي اعىزىلىپ جاتىر. شۇعىل ءىس-شارالاردىڭ ناتيجەسىندە كەنىشتى سۋ باسۋدان ساقتاپ قالدىق. بىرنەشە كۇننەن بەرى كەنىشتىڭ ىشىندەگى جاعداي تۇراقتاندى. كەنىشتى سۋدان تازارتىپ, سۋ باسۋدان ساقتاۋ ءۇشىن ەلىمىزدىڭ عانا ەمەس, رەسەيدىڭ بىلىكتى دەگەن ماماندارىنىڭ كومەگىنە جۇگىنىپ جاتىرمىز», - دەيدى ول.
ال كەنىش ماڭىنداعى تۇرعىندارعا كەلسەك, توتەنشە وقيعا تىركەلگەن 7 مامىردان باستاپ ولار كاسىپورىننىڭ ريددەر قالاسىنداعى پروفيلاكتوريىنە كوشىرىلىپ, جاتار ورىن, ىشەر اسپەن قامتاماسىز ەتىلىپتى. دۇنيە-م ۇلىكتەرى قاراۋعا الىنىپ, كۇزەت قويىلىپتى. «قازتسينك» جشس اكىمشىلىك ماسەلەلەر جونىندەگى اتقارۋشى ديرەكتورى اندرەي لازارەۆتىڭ ايتۋىنشا, قازىرگى ۋاقىتتا كارەر ماڭىندا ورنالاسقان جەتى ءۇيدىڭ تۇرعىندارىنىڭ بارلىعى دا باسپانامەن قامتاماسىز ەتىلگەن. كاسىپورىن بۇل ماقساتقا 50 ميلليون تەڭگە كولەمىندە قارجى قاراستىرىپتى.
«كەنىشتى سۋ العانىن ءبىز اۋەلدە اڭعارعان جوقپىز. بىراق قوراداعى قاز-تاۋىقتارىمىزدىڭ تىپىرشىپ, مازاسىزدانعانىن كوردىك. سۋ باسقان كۇننىڭ ەرتەڭىندە ءبىزدى قاۋىپسىز جەرگە كوشىردى. بۇرىن ەكى بولمەلى ءۇيىمىز بولسا, قازىر مىنە, ءتورت بولمەلى باسپاناعا قول جەتكىزدىك», - دەيدى ريددەردەن جاڭا باسپانا العان زەينەتكەر ۆەرا فەكليستوۆا.
ازامات قاسىم,
«ەگەمەن قازاقستان»
شىعىس قازاقستان وبلىسى, ريددەر قالاسى
