وستاپەنكو – جاڭا جۇلدىز
«ايەلدەر اراسىندا «رولان گارروستىڭ» بيىلعى جەڭىمپازى كىم بولۋى مۇمكىن؟» دەگەن سۇراق تۋىنداعاندا, كوپشىلىكتىڭ ويى ءبىر جەردەن شىقتى. ساراپشىلاردىڭ باسىم بولىگى دە ء«ۇش جىل بۇرىن فينالدا كەتكەن ەسەنى وسى جولى سيمونا حالەپ قالاي دا قايتارۋعا ءتيىس» دەگەندى العا تارتتى. 2014 جىلى جەڭىمپاز اتانۋعا ءبىر قادام قالعان رۋمىنيالىق تەننيسشىنى ماريا شاراپوۆا توقتاتقان. بۇل جولى حالەپ پاريجتە تولىسقان تاجىريبەمەن كەلدى. ەڭ باستىسى, بيىلعى دودادا سىرالعى قارسىلاستارى سەرەنا ۋيليامس تە, ماريا شاراپوۆا دا جوق. ونىڭ ۇستىنە توبىققابىنىڭ جاراقاتىنا قاراماستان, 25 جاستاعى سپورتشىنىڭ العاشقى ماچتارداعى سەنىمدى جەڭىسى ماماندار پىكىرىنە دالەل بولعانداي.
فيزيكالىق قانا ەمەس, مورالدىق تۇرعىدا دا سيمونا ءوزىن ۇلكەن جەڭىستەرگە دايىن ەكەندىگىن بايقاتتى. سوزىمىزگە تۇزدىق رەتىندە ءۇشىنشى اينالىمداعى داريا كاساتكينامەن كەزدەسۋدىڭ ەكىنشى پارتياسىن نەمەسە شيرەك فينالداعى ەللينا سۆيتولوۆامەن ايقاستى ايتۋعا بولادى. اسىرەسە, ەكىنشىسىندە 3:6, 1:5 ەسەبىمەن ۇتىلىپ تۇرىپ, ماتچ تىزگىنىن قولعا العان حالەپ جارتىلاي فينالدا دا مىنەز تانىتتى. فينالدىڭ جولداماسى ساراپقا سالىنعان دودادا ول چەحيالىق كارولينا پليشكوۆانى قينالماي ۇتتى. وسىدان سوڭ چەح تەننيسشىسى شەشۋشى سىندا حالەپكە ءباس تىگەتىنىن حابارلاعان.
سيمونا ءتۋرنيردىڭ سوڭعى كۇنىندە ماتچتى بىرقالىپتى باستادى. العاشقى سەتتى ءوز اتىنا جازدىرعان رۋمىن قىزى ەكىنشى كەزەڭدە قارسىلاسىن – ورىمدەي ەلەنا وستاپەنكونى ەلەڭ قىلمايتىنداي كورىندى. العاشقى ءتورت گەيمدە لاتۆيالىق سپورتشىنىڭ كوسىلۋىنە ەش مۇمكىندىك بەرگەن جوق. ءبىر ساعات بويى ەلەنانىڭ تاجىريبەسىزدىگىن باقىلاعان رۋمىن قىزى بوساڭسىپ كەتكەن سياقتى. ءدال سول ساتتە تىزگىنگە وستاپەنكو يەلىك ەتە باستادى. سوققىلارى مىعىم, دوپتارى دىتتەگەن جەرىنە جەتىپ جاتىر. اياق استىنان نە بولىپ كەتكەنىن تۇسىنۋدەن قالعان حالەپ ابدىراپ قالدى. قۇددى بار بىلگەنىنەن جاڭىلعانداي.
ءۇشىنشى سەتتىڭ باسىندا تەپە-تەڭدىك ورناعانداي كورىنگەن. بەلسەندىلىك تانىتۋعا تىرىسقان حالەپ ەسەپتە العا شىعىپ ەدى, لاتۆيالىق تارازى باسىن تەڭەستىرىپ قانا قويماي, تابلوداعى كورسەتكىشتى 5:3-كە جەتكىزدى. سوڭعى گەيمدە تاۋەكەلگە بارعان وستاپەنكونىڭ جويقىن سوققىسىنا حالەپ ۇلگەرە المادى. ەسەپ – 6:4, 4:6, 3:6. ەلەنا – «ۇلكەن دۋلىعا» جەڭىمپازى!
بيىل گۋستاۆو كۋەرتەننىڭ «رولان گارروستاعى» سەنساتسيالىق جەڭىسىنە تۋرا 20 جىل تولدى. 1997 جىلى برازيليالىق تەننيسشى فرانتسياعا اتتانعاندا رەيتينگتە العاشقى 50 تەننيسشىنىڭ قاتارىنا دا كىرمەگەن. بۇل تۋرالى گۋستاۆونىڭ ءوزى: «مەن پاريجگە جۇلدىزداردىڭ ويىنىنان ءلاززات الۋ ءۇشىن باردىم. ەشتەڭەدەن ءۇمىت كۇتكەن جوقپىن, بار-جوعى ءار دوپ ءۇشىن كۇرەستىم. ناتيجەسىندە جەڭىسكە جەتتىم», – دەپ ەسكە الادى. وستاپەنكونىڭ وقيعاسى دا وسىعان ۇقساس.
وسىلايشا وستاپەنكو ءوزىنىڭ العاشقى مەيدجورىندە توپ جارعان ءبىرىنشى تەننيسشى اتانىپ وتىر. ەندى بۇعان لاتۆيانىڭ ماقتانىشى دەگەن اتاق قوسىلارى حاق. سەبەبى, ول – وسى ەلدەن شىققان تەننيسشىلەردىڭ اراسىندا «ۇلكەن دۋلىعا» ءتۋرنيرىن جەڭگەن تۇڭعىش سپورتشى.
قۋانىشى قوينىنا سىيماعان جەڭىمپاز «سەنە الار ەمەسپىن, مەن «رولان گارروستا جەڭىسكە جەتتىم! جاسىم بار-جوعى 20-دا بولسا دا, «ۇلكەن دۋلىعادا» توپ جارعانىما سەنە الار ەمەسپىن!» – دەگەندى عانا قايتالاي بەردى. ال ءبىز ەلەناعا بۇل سەنىڭ جەڭىستەرىڭنىڭ باسى عانا دەگىمىز كەلەدى.
قۇمايت كورتتىڭ كورولى
ەرلەر اراسىندا باستى كۋبوكقا تالاس «رولان گارروستىڭ» توعىز دۇركىن چەمپيونى رافاەل نادال مەن «ۇلكەن دۋلىعانىڭ» ءۇش دۇركىن جەڭىمپازى ستەن ۆاۆرينكا اراسىندا ءوربىدى. ءبىر قاراعانعا, نادالعا «باسۋ» ايتار ءبىر ادام بولسا, ول وسى ۆاۆرينكا سەكىلدى كورىنگەن. بۇل – ۆاۆرينكانىڭ «دۋلىعاداعى» ءتورتىنشى فينالى. وسىعان دەيىنگى ۇشەۋىندە جەڭىس تويىن تويلاعان. ونىڭ ۇستىنە شۆەيتساريالىقتىڭ ءبىر ۇتىمدى تۇسى, وسىعان دەيىنگى شەشۋشى سىنداردىڭ ۇشەۋىندە دە الەمنىڭ ءبىرىنشى راكەتكالارىنان باسىم تۇسكەن ەكەن. ەكى كۇن بۇرىن الەمنىڭ ۇزدىگىن تاعى دا قاپىدا قالدىرعانىن ايتتىق. سوندىقتان ستەەننىڭ توپىراق توسەنىشتىڭ «كورولىن» تاعىنان ءبىرجولا تايدىرماسا دا, شابۋىلدا ساۋاتتىلىق تانىتىپ, بەكحەندىن جۇزەگە اسىرۋى ارقىلى 2015 جىلعى جەتىستىگىن قايتالۋىنا مۇمكىندىگى بار ەدى.
دەگەنمەن ستاتيستيكالىق مالىمەتتەردىڭ ءوزى يسپان جىگىتىنىڭ جاعىندا. نادال بۇل فرانتسيا اشىق بىرىنشىلىگىنە قۇرالاقان كەلگەن جوق. باسقا تابىستارىن قوسپاعاندا, پاريج تورىندە ول توعىز رەت ءوزىنىڭ مىقتىلىعىن مويىنداتىپ ۇلگەرگەن.
ال فينالعا رافا ەش قينالماستان جەتتى. بىردە-ءبىر ويىنشى يسپان جىگىتىنە لايىقتى قارسىلىق كورسەتە العان جوق. ودان قالدى, بيىلعى ماۋسىمدا توپىراق توسەنىشتە وتكەن ويىنداردىڭ بارلىعى يسپان جىگىتىنىڭ پايداسىنا شەشىلىپ كەلدى. تەك ريمدەگى «ماسترەستە» اۆستريالىق دومينيك تيمگە جول بەرگەن. ونىڭ وزىندە سول ەسەسىن «رولان گارروستىڭ» جارتىلاي فينالىندا قايتاردى. ۆاۆرينكا بولسا العاشقى بەس ماتچىن ءۇش سەتتە جەڭگەنىمەن, جارتىلاي فينالدا ەندي ماررەي وڭاي شاعىلار جاڭعاق ەمەستىگىن اڭعارتتى. ءتورت ساعاتتان استام ۋاقىتقا سوزىلعان وسى كەزدەسۋدى ەرلەر اراسىنداعى ەڭ تارتىستى ايقاسقا تەڭەۋگە ابدەن بولادى.
ەكى تەننيسشى ءوزارا 18 رەت كەزدەسىپ, سونىڭ 15-ىندە رافا جەڭىسكە جەتكەن. توپىراق توسەنىشتە ۆاۆرينكا ءبىر رەت – 2015 جىلعى ماۋسىمدا ريمدە شەبەرلىك جاعىنان باسىم تۇسسە, «رولان گارروستاعى» ماتچ يسپانيالىقتىڭ پايداسىنا شەشىلگەن. سوندىقتان وسى جولى ۆاۆرينكا تەكەتىرەسىپ باعادى دەپ باعامدادىق. سويتسەك, «كورولدىڭ» كوزدەگەنى باسقا ەكەن.
نادال فينالدىق ويىندى دا جوعارى دەڭگەيدە باستادى. العاشقى سەتتە برەيكتى جۇزەگە اسىرا الماي قالعان ستانيسلاس ءوز سوققىلارىنىڭ ارقاسىندا تەك ەكى گەيم الدى. شۆەيتساريالىقتىڭ بار كورسەتكەن قارسىلىعى وسى عانا. قالعان ءتورت گەيمدە رافاەل بىردە-ءبىر قاتەلىك جاساعان جوق.
ال ەكىنشى جانە ءۇشىنشى سەتتەردە شيراق, جيناقى قيمىلداعان يسپانيالىق قارسىلاسىن قىسپاققا الۋمەن جالپى ەسەپتى 3:0-گە جەتكىزدى – 6:2, 6:3, 6:1.
2017 جىلعى ماۋسىمدا نادال مونتە-كارلو, بارسەلونا مەن ءپاريجدى 10-رەتتەن باعىندىرىپ, مادريدتە ءوزىنىڭ بەسىنشى كۋبوگىنا قول جەتكىزدى. جاسى 31-گە كەلسە دە بابىن جوعالتقان جوق. قايتا كۇشەيگەن ۇستىنە كۇشەيىپ كەلەدى. وردا بۇزار جاستىڭ اسەرى بولسا كەرەك. كورتتا شەبەر قيمىلداپ, قاتەلىكتەرگە دە بوي الدىرماۋعا تىرىسادى.
ء«بارى كۇندەلىكتى اتقارىلاتىن جۇمىسقا بايلانىستى. مەن وسىمەن 10-شى رەت وسى جەردە جەڭىسكە جەتتىم. بارىنە كوڭىلىم تولادى, مۇنى قۇددى عاجايىپ دەرسىڭ. بۇل كۇن مەن ءۇشىن وتە ماڭىزدى بولدى. جاراقاتىم, اۋىر كەزەڭدەر از بولعان جوق. سونىڭ بارىنەن ءوتىپ قايتا ۇلكەن جەڭىسكە جەتكەنىمە شەكسىز قۋانىشتىمىن. ءار اپتادان, ءار ويىننان ءلاززات الامىن. وسى باعىتتا جالعاستىرۋدى كوزدەيمىن», – دەدى نادال جەڭىسىنەن سوڭ بەرگەن سۇحباتىندا.
بۇل ناتيجە ونىڭ اتر رەيتينگىندە 2-ورىنعا كوتەرىلۋىنە سەبەپ بولدى. ەندىگى ماقساتى – رەيتينگتە دە ۇزدىك اتانۋ. وسى قارقىنىنان تايماسا, ول كۇن دە الىس ەمەس.
«رولان گارروستىڭ» جۇپتىق سىندارىندا دا جەڭىمپازدار انىقتالدى. ايەلدەر اراسىندا, ماماندار بولجاعانداي, بەتاني ماتتەك-سەندس پەن ليۋسي شافارجوۆا دۋەتى جەڭىس تويىن تويلادى. فينالدا ەشلي بارتي مەن كەيسي دەللاكۋانى 6:2, 6:1 ەسەبىمەن ۇتىپ, قاتارىنان ءۇشىنشى «دۋلىعاعا» يەلىك ەتتى.
ءمادينا اسىلبەك,
جۋرناليست
استانا
