بۇل قوبىز مولىقباي ولگەن سوڭ, يەسىز قالىپ, سوعىس كەزىندە كەرەگەدە ءىلۋلى تۇرىپتى. ەل قامىعىپ, قارا جامىلعاندا كۇڭىرەنگەن ءۇن شىعارادى ەكەن دەيدى ءبىر اڭىز. قاراعايدان شابىلعان, تەمىرمەن ۇستالعان, جيەگى كۇمىستەلگەن. ازداعان جارىعى بار. سول جاق بۇيىرىندەگى بۇتاقتىڭ تۇقىلى ابدەن كەۋىپ, ءتۇسىپ قالعان. بۇل بەرتىندە اسپاپقا رەستاۆراتسيا جاساۋشىلاردىڭ پىكىرى. ەل اۋزىندا بۇل جارىقتىڭ پايدا بولۋى تۋرالى دا اڭىز بار. بايساق بىردە الدەكىمنىڭ بوساعاسىن اتتاي بەرگەندە, بوسانعان ايەلدىڭ جولداسى كومىلگەن, بىلقىلداپ جاتقان شۇڭقىرعا اياعى كىرىپ كەتىپ, جىعىلىپتى. سوندا بايساقتىڭ ءوز ءۇيىنىڭ تورىندە ءىلۋلى تۇرعان قوبىز دا وزدىگىنەن قۇلاپ تۇسكەن كورىنەدى. سول ساپار بايساقتىڭ جىلىنشىگى سىنىپ, قوبىزدىڭ الگى جاڭقاسى ۇشىپ كەتىپتى. وسى وقيعادان كەيىن ەل-جۇرت قوبىزعا كيە قوندى دەپ ەسەپتەپ, «جارىق قارا قوبىز» اتاپ كەتىپتى. جارىق قارا قوبىز ءوزىنىڭ كيەسىن بەرتىندە دە كورسەتكەن كورىنەدى. 1978 جىلى تۇگەل جانىپ كەتكەن ءۇيدىڭ ىشىنەن وسى قوبىز عانا امان قالىپتى.
ايگىلى مولىقباي اۋليەنىڭ قوبىزى تالدىقورعانداعى ءىلياس جانسۇگىروۆتىڭ ادەبي مۋزەي ۇيىندە تۇر. مۋزەيگە 1984 جىلى وتكىزىلگەن. مولىقبايدىڭ ءوزى تۇرمەدە ولگەنشە قاسىنان تاستاماعان ء(تىپتى تۇرمەدە دە) قوبىز 1930 جىلدان باستاپ كەلىنى اداسقاننىڭ ۇيىندە ساقتالىپتى.
قوبىز قازىر دە تارتۋعا جاراپ تۇر. 2007 جىلى مولىقباي قوبىزشىنىڭ 150 جىلدىعى قارساڭىندا رەستاۆراتسيالانعان. سوڭعى رەت 2017 جىلى مامىر ايىندا, مۋزەيلەر كۇنى قارساڭىندا تارتىلعان.
الماس ءنۇسىپ,
«ەگەمەن قازاقستان»
الماتى وبلىسى
